ម៉ៃប៉ុមពីអូចោទលោកចនបុលតុនថាជាមនុស្សក្បត់ព្រោះតែរឿងចេញសៀវភៅ!
31-October-2023 / ព័ត៌មានអន្តរជាតិ
អាមេរិក៖រដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូនៅថ្ងៃព្រហស្បតិ៍ទី១៨មិថុនា បានហៅអតីតទីប្រឹក្សាសន្តិសុខជាតិអាមេរិក លោក ចន បូលតុន ថាជា «មនុស្សក្បត់» ដែលចោទថាលោក ដូណាល់ ត្រាំ មិនសក្តិសមធ្វើជាប្រធានាធិបតី។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅរសៀលថ្ងៃសុក្រ ទី១៩ ខែមិថុនា ឆ្នាំ២០២០។
លោក ប៉ុមប៉េអូ បានគូសបញ្ជាក់នៅក្នុងសេចក្ដីថ្លែងការណ៍ ដូច្នេះថា «វាគឺជារឿងគួរឱ្យសោកសៅ និងគ្រោះថ្នាក់ ដែលតួនាទីជាសាធារណៈចុងក្រោយរបស់លោក ចន បូលតុន ត្រឹមជាមនុស្សក្បត់ម្នាក់ ដែលបានបំផ្លាញសហរដ្ឋអាមេរិក តាមរយៈការបំពានលើទំនុកចិត្តរបស់លោក ជាមួយប្រជាជនខ្លួនឯង»។
គួរបញ្ជាក់ថា ការលើកឡើងខាងលើរបស់លោក ម៉ៃក៍ ប៉ុមប៉េអូ កើតមានឡើងក្រោយ កាសែតអាមេរិក New York Times បានចេញផ្សាយនួវសម្រង់សំណេរមួយ នៃអត្ថបទ ចេញពីសៀវភៅ «The Room Where It Happened» របស់លោក បូលតុន ដែលអះអាងថា លោកបានទទួលកំណត់ហេតុមួយពីរដ្ឋមន្ត្រីការបរទេសអាមេរិក លោក ប៉ុមប៉េអូ បន្ទាប់ពីកិច្ចប្រជុំកំពូលជាមួយមេដឹកនាំកូរ៉េខាងជើង លោក គីម ជុងអ៊ុន ឆ្នាំ២០១៨។
សៀវភៅដែលមានចំណងជើងថា៖ «បន្ទប់ដែលរឿងរ៉ាវបានកើតឡើង៖ កំណត់ប្រវត្តិសេតវិមាន (The Room Where It Happened: A White House Memoir) ។ ក្រសួងយុត្តិធម៌បានដាក់បទបញ្ជាបន្ទាន់មួយ កាលពីយប់ថ្ងៃពុធ ដើម្បីបញ្ឈប់ការចេញផ្សាយសៀវភៅរបស់លោក Bolton នេះ គឺមួយថ្ងៃ បន្ទាប់ពីបានដាក់ពាក្យបណ្ដឹង ។ រដ្ឋបាលលោក Trump អះអាងថា លោក Bolton កំពុងធ្វើឲ្យមានគ្រោះថ្នាក់ដល់រឿងសន្តិសុខជាតិ
លោកត្រាំបានសរសេរនៅក្នុងបណ្តាញសង្គម Twitter នាថ្ងៃព្រហស្បតិ៍ ទី១៨ មិថុនាថា សៀវភៅរបស់លោកបុលតុនបានចងក្រងដោយរឿងកុហក និងច្នៃប្រឌិត។
បើតាមលោក បូលតុន នៅក្នុងកំណត់ហេតុនេះលោក ប៉ុមប៉េអូ បាននិយាយខាងក្រោយខ្នងថា លោក ត្រាំ គឺជា «មនុស្សឡប់និយាយមិនដឹងអី»និងថា ការទូតដោះស្រាយបញ្ហាជាមួយកូរ៉េខាងជើង របស់លោក ដូណាល់ ត្រាំ គឺមិនជោគជ័យឡើយ។សៀវភៅរបស់លោកបុលតុនគ្រោងនឹងចេញលើកជាផ្លូវការនៅថ្ងៃទី២៣ មិថុនាខ្លឹមសារមួយចំនួនត្រូវបានទម្លាយដោយកាសែតអាមេរិក New York Times Washington Post និង Wall Street Journal នាថ្ងៃពុធ ទី១៧ មិថុនា។
សេតវិមានកំពុងព្យាយាមរារាំងកុំឲ្យចេញលក់បានវិញ មានរឿងជាច្រើនដែលលោកបុលតុនបានឆ្កឹះកកាយ ពិសេសរឿងជាមួយចិន កូរ៉េខាងជើង និងអ៊ុយក្រែន។ បន្ទាប់មក លោកបុលតុនបាននិយាយពីគ្រួសារនិយមដោយផ្តោតលើកូនស្រី និងកូនប្រសាររបស់លោកត្រាំដែលមានឋានៈជាទីប្រឹក្សាផ្ទាល់។ បន្ទាប់មកទៀត លោកបុលតុនបានលើកឡើងពីអកប្បកិរិយារបស់លោកត្រាំជាមួយអ្នកធ្វើការជាមួយលោកដែលអ្នកខ្លះពិបាកទ្រាំទ្រ និងតែងចង់លាឈប់ពីតំណែង។ នៅក្នុងរឿងនេះ លោកបុលតុនបានលើកឡើងពីករណីរូបលោកផ្ទាល់ និងករណីប្រមុខការទូតលោកម៉ៃ ប៉ុមប៉េអូ។ តាមលោកបុលតុន លោកប៉ុមប៉េអូដែលតែងបង្ហាញភាពស្មោះត្រង់ជាមួយលោកត្រាំក៏បានរិះគន់លោកត្រាំពីក្រោយខ្នង ដូចជាថាលោកត្រាំនិយាយផ្តេសផ្តាស់ច្រើនអត់បានការ។
នៅក្នុងសៀវភៅរបស់លោក អតីតទីប្រឹក្សាសន្តិសុខជាតិរូបនេះបានរៀបរាប់ពីជំនួបទ្វេភាគីរវាងលោកដូណាល់ ត្រាំ និងសមភាគីចិនលោកស៊ី ជីនពីងនៅក្រៅក្របខ័ណ្ឌនៃជំនួបកំពូល G២០ ដែលបានរៀបចំក្នុងទីក្រុងអូសាកា ប្រទេសជប៉ុនកាលពីខែមិថុនា ឆ្នាំ ២០១៩។ តាមលោកបុលតុន នៅក្នុងជំនួបទ្វេភាគីជាមួយនឹងវត្តមានអ្នកបកប្រែ លោកត្រាំបានបង្វែរកិច្ចសន្ទនាដោយទាញលោកស៊ីឲ្យជួយគិតគូររឿងបោះឆ្នោតប្រធានាធិបតីអាមេរិកនាខែវិច្ឆិកា ឆ្នាំ ២០២០។
នៅក្នុងអត្ថបទមួយចុះផ្សាយក្នុងកាសែត Wall Street Journal កាលពីថ្ងៃពុធ លោក Bolton បានសរសេរថា នៅក្នុងអំឡុងពេលកិច្ចប្រជុំ G-20 ក្នុងទីក្រុង Buenos Aires ប្រទេសអាហ្សង់ទីន កាលពីឆ្នាំ ២០១៨ លោក Trump បានស្នើលោក Xi Jinping ឲ្យបង្កើនការទិញនូវផលិតផលកសិកម្មរបស់សហរដ្ឋអាមេរិក ដើម្បីជួយខ្លួនលោក ឲ្យទទួលបានសន្លឹកឆ្នោតគាំទ្រពីបណ្ដារដ្ឋកសិកម្មនានា នៅក្នុងការបោះឆ្នោតប្រធានាធិបតី នៅខែវិច្ឆិកា ឆ្នាំ២០២០ ខាងមុខ ជាថ្នូរនៃការយកពន្ធគយលើទំនិញចិន ក្នុងអត្រាមួយដែលចិនពេញចិត្ត ។
លោក Bolton បានសរសេរថា នៅក្នុងការប្រជុំរបស់លោកទាំងពីរ កាលពីថ្ងៃទី២៩ ខែមិថុនា ឆ្នាំ២០១៩ អំឡុងពេលកិច្ចប្រជុំ G-20 នៅក្នុងទីក្រុង Osaka ប្រទេសជប៉ុន លោក Xi Jinping បានប្រាប់លោក Trump ថា ទំនាក់ទំនងរវាងសហរដ្ឋអាមេរិក និងចិន គឺជាទំនាក់ទំនងដ៏សំខាន់ជាងគេបំផុតនៅលើពិភពលោក ។ រឿងរ៉ាវដូចគ្នានៃទំនាក់ទំនងរវាងលោក Trump និងលោក Xi Jingping ក៏មានបង្ហាញផងដែរ នៅក្នុងសៀវភៅសកម្រាស់ ៥៩២ ទំព័រ របស់លោក Bolton ដែលនឹងជិតចេញផ្សាយក្នុងពេលឆាប់ៗនេះ ។
មានអាយុ ៧១ឆ្នាំ លោកចន បុលតុនបានធ្វើការជាមួយលោកដូណាល់ ត្រាំក្នុងនាមជាទីប្រឹក្សាសន្តិសុខជាតិអស់រយៈពេលជាង ១ឆ្នាំ ពោលពីខែមីនា ឆ្នាំ ២០១៨ដល់ខែកញ្ញា ឆ្នាំ ២០១៩។ តែមុននឹងទទួលតំណែងជាទីប្រឹក្សាសន្តិសុខជាតិ លោកបុលតុនធ្លាប់ធ្វើជាឯកអគ្គរដ្ឋទូតអាមេរិកប្រចាំអង្គការសហប្រជាជាតិជាច្រើនឆ្នាំ។ 
