ប្រជាជនវៀតណាមជិតពាក់កណ្តាលប្រទេស នឹងរកប្រាក់ចំណូលបានច្រើនជាង ២០ ដុល្លារអាម៉េរិកក្នុងមួយថ្ងៃនៅឆ្នាំ២០៣០ពេលនាយករដ្ឋមន្ត្រីកំពុងស្វែងយន្តការធានាស្ថានភាពម៉ាក្រូសេដ្ឋកិច្ច
30-May-2025 / ព័ត៌មានអន្តរជាតិ
វៀតណាម៖ ធនាគារ (HSBC) របស់អង់គ្លេស បានចេញផ្សាយដោយព្យាករណ៍ថា នៅឆ្នាំ ២០៣០ ខាងមុខ ប្រជាជនវៀតណាមចំនួន ៤៨ លាននាក់ ឬជិតពាក់កណ្តាលនៃចំនួនប្រជាជនសរុប នឹងមានសមត្ថភាពអាចរកប្រាក់ចំណូលលើសពី ២០ ដុល្លារអាម៉េរិកក្នុងមួយថ្ងៃ ។របាយការណ៍ដដែលនេះ បានបន្ថែមថា គេកំណត់ថាវៀតណាម គ្រោងនឹងរំកិលចំណាត់ថ្នាក់របស់ខ្លួនពីលេខរៀងទី១៣ កាលពីឆ្នាំមុន ទៅកាន់លេខរៀងទី១០ នៅក្នុងចំណោមប្រទេសដែលមានចំនួនប្រជាជនច្រើនបំផុត ដែលរកបានប្រាក់ចំណូលច្រើនជាង ២០ដុល្លារអាម៉េរិក ក្នុងមួយថ្ងៃ ដោយផ្អែកលើភាពស្មើគ្នានៃខ្ទង់ ចំណាយប្រចាំឆ្នាំ ២០១១ ។
ក្នុងរយៈពេលប្រាំបីឆ្នាំទៅមុខទៀត ប្រទេសចិន ទំនងជានឹងរក្សាតំណែងរបស់ខ្លួន នៅលើកំពូលតារាង តាមពីក្រោយដោយឥណ្ឌា សហរដ្ឋអាម៉េរិក និងឥណ្ឌូណេស៊ី ។ ខណៈគេរំពឹងថា អត្រាចំណាយ (ការចាយវាយ) នៅតាមបណ្តាប្រទេសមួយចំនួនដូចជា ប្រទេសវៀតណាម បង់ក្លាដេស និងឥណ្ឌា នឹងមានការកើនឡើងយ៉ាងខ្លាំងនៅចន្លោះឆ្នាំ ២០២១-២០៣០ ។ក្នុងចំណោមប្រជាជាតិអស់ទាំងនោះ ក្រុមប្រជាជនដែលមានចំណូលមធ្យមកម្រិតខ្ពស់ក្នុងប្រទេសវៀតណាម គឺមានសមត្ថភាពរកប្រាក់ចំណូលបាន ៥០-១១០ ដុល្លារអាម៉េរិកក្នុងមួយថ្ងៃ នឹងមានចំនួនកើនឡើង ១៧% ជារៀងរាល់ឆ្នាំ ចាប់ពីពេលនេះរហូតដល់ឆ្នាំ ២០៣០ខាងមុខ។
ទោះជាយ៉ាងណាដើម្បីធានាកំណើនសេដ្ឋកិច្ចរបស់ប្រទេសនេះដែរនាយករដ្ឋមន្ត្រីវៀតណាមផាមមិញជិញ( Pham Minh Chinh) មានប្រសាសន៍ថា ទោះបីជាមានការធ្លាក់ចុះសេដ្ឋកិច្ចពិភពលោកនាពេលបច្ចុប្បន្នក៏ដោយ ក៏វៀតណាមនឹងមិន “អង្គុយរង់ចាំ” ប៉ុន្តែត្រូវស្វែងរកមធ្យោបាយដើម្បីរក្សាស្ថិរភាព និងស្តារសេដ្ឋកិច្ចឡើងវិញ។ នេះបើយោងតាមកាសែត VN Express របស់វៀតណាម។ការអះអាងរបស់លោកជិញ( Chinh) បានធ្វើឡើងខណៈដែលលោកធ្វើជាអធិបតីក្នុងសន្និសីទមួយកាលពីថ្ងៃច័ន្ទទី១២កញ្ញាស្តីពីការរក្សាស្ថិរភាពម៉ាក្រូសេដ្ឋកិច្ច ការគ្រប់គ្រងអតិផរណា ការជំរុញកំណើន និងការធានាឱ្យមានតុល្យភាពសេដ្ឋកិច្ច។
កាសែត VN Express បានរាយការណ៍ថា លោកនាយករដ្ឋមន្ត្រីបានកត់សម្គាល់ពីការផ្លាស់ប្តូរយ៉ាងខ្លាំងនូវបរិយាកាសភូមិសាស្ត្រនយោបាយពិភពលោកក្នុងរយៈពេលប៉ុន្មានខែចុងក្រោយនេះ ដោយមានការប្រែប្រួលលឿន និងស្មុគស្មាញ។ ភាពតានតឹងរវាងរុស្ស៊ីនិងប្រទេសអ៊ុយក្រែននៅឆ្ងាយពីការធូរស្រាល។ កត្តាទាំងនេះមានផលប៉ះពាល់ទាំងរយៈពេលខ្លី និងរយៈពេលវែងសម្រាប់សេដ្ឋកិច្ចពិភពលោកនិងវៀតណាម។
លោកនាយករដ្ឋមន្ត្រីវៀតណាមបានសង្កត់ធ្ងន់ថា ក្នុងគ្រាដ៏លំបាកនេះ វៀតណាមនឹងមិនអង្គុយរង់ចាំទេ ប៉ុន្តែត្រូវស្វែងរកយ៉ាងសកម្មនូវមធ្យោបាយនានាដើម្បីធានាថា ម៉ាក្រូសេដ្ឋកិច្ច និងគោលដៅអភិវឌ្ឍន៍ត្រូវសម្រេចបាន។
លោក Chinh បាននិយាយថា វៀតណាមបានរក្សាស្ថិរភាពម៉ាក្រូសេដ្ឋកិច្ច ជាពិសេសលើបញ្ហាអស្ថិរភាពនៅក្នុងសេដ្ឋកិច្ចសំខាន់ៗមួយចំនួន ហានិភ័យ និងវិបត្តិសេដ្ឋកិច្ច។ អតិផរណាស្ថិតនៅក្រោមការគ្រប់គ្រង ហើយមូលធននីយកម្ម និងគោលយោបាយរូបិយវត្ថុមានលក្ខណៈគ្រប់គ្រាន់សម្រាប់ស្ថានភាពបច្ចុប្បន្ន។កាសែត VN Express រាយការណ៍ទៀតថា យោងតាមក្រសួងផែនការ និងវិនិយោគវៀតណាម ប្រទេសវៀតណាមអាចរក្សាស្ថិរភាពទីផ្សារក្នុងរយៈពេលប្រាំបីខែដំបូងជាមួយនឹងចំណូលថវិកាកើនឡើងជាង ១៩% ធៀបនឹងរយៈពេលដូចគ្នាកាលពីឆ្នាំមុន។
អតិរេកពាណិជ្ជកម្មរបស់វៀតណាមបានកើនឡើង ១៥,៥% ធៀបនឹងរយៈពេលដូចគ្នាកាលពីឆ្នាំមុន ដល់ប្រមាណ ៥០០ពាន់លានដុល្លារក្នុងអំឡុងពេលដូចគ្នានេះ។ ទីផ្សារការងាររបស់ខ្លួនបានស្ទុះងើបឡើងវិញបន្ទាប់ពីការផ្ទុះឡើងនៃជំងឺកូវីដ-១៩ ហើយកំណើនផលិតផលក្នុងស្រុកសរុបទំនងជាកើនលើសពី ៧% នៅក្នុងត្រីមាសទី៣ ប្រសិនបើគ្មានការវិវឌ្ឍអវិជ្ជមានធំៗណាមួយកើតឡើងទេនោះ។លោក Nguyen Chi Dung រដ្ឋមន្ត្រីក្រសួងផែនការ និងវិនិយោគ បានថ្លែងនៅក្នុងសន្និសីទនេះថា៖ «កំណើនពេញមួយឆ្នាំត្រូវបានព្យាករថានឹងលើសពីគោលដៅពី ៦ ទៅ ៦,៥% ហើយប្រសិនបើមានការខិតខំប្រឹងប្រែងបន្ថែមទៀត វានឹងកើនឡើងកាន់តែខ្ពស់»៕
