ត្រាំ ប្រកាសថា កម្លាំងទ័ពអាមេរិក នៅតែព័ទ្ធជុំវិញអ៊ីរ៉ង់ រហូតដល់កិច្ចព្រមព្រៀងពិតប្រាកដ ត្រូវបានអនុវត្ត

បន្ទាប់ពីមើលឃើញថាកិច្ចព្រមព្រៀងឈប់បាញ់អាមេរិកនិងអ៊ីរ៉ង់  នៅតែមានភាពផុយស្រួយ ឥឡូវ លោក ដូណាល់ ត្រាំ ប្រកាសថា កងកម្លាំងសហរដ្ឋអាមេរិកនឹងនៅតែបន្តឈរជើងតាមគោលដៅដដែល ព័ទ្ធជុំវិញប្រទេសអ៊ីរ៉ង់ រហូតដល់កិច្ចព្រមព្រៀងពិតប្រាកដ ត្រូវបានអនុវត្តតាម។ 

លោកប្រធានាធិបតីអាមេរិក បង្ហោះសារលើបណ្តាញសង្គម Truth Social នៅថ្ងៃព្រហស្បតិ៍ទី៩ខែមេសាឆ្នាំ២០២៦ថា៖ «រាល់នាវា, យន្តហោះ និងយោធាសហរដ្ឋអាមេរិកទាំងអស់ រួមជាមួយគ្រាប់រំសេវ គ្រឿងសព្វាវុធបន្ថែម និងអ្វីៗផ្សេងទៀតដែលសមស្រប និងចាំបាច់ សម្រាប់ការតាមកម្ទេច និងបំផ្លាញសត្រូវដែលកំពុងតែចុះខ្សោយស្រាប់ឲ្យខ្ទេចខ្ទីនោះ នឹងបន្ត នៅនឹងកន្លែង ទាំងក្នុងនិងជុំវិញប្រទេសអ៊ីរ៉ង់ រហូតទាល់តែកិច្ចព្រមព្រៀងពិតប្រាកដដែលសម្រេចបាននោះ ត្រូវបានគោរពតាមទាំងស្រុង»។

លោកបន្តថា៖ បើមិនអនុវត្តតាមកិច្ចព្រមព្រៀង ការបាញ់ប្រហារនឹងចាប់ផ្តើមដែលនឹងកាន់តែធំ កាន់តែជឿនលឿន និងខ្លាំងក្លាជាងអ្វីដែលពិភពលោកធ្លាប់បានឃើញពីមុនមក។ ក្នុងពេលជាមួយគ្នានេះ កងទ័ពដ៏អស្ចារ្យរបស់អាមេរិកកំពុងតែត្រៀមគ្រឿងយុទ្ធភណ្ឌ និងសម្រាក ដើម្បីរង់ចាំមើលទៅមុខ ចំពោះការដណ្តើមជ័យជម្នះបន្ទាប់របស់ខ្លួន។

ជុំវិញបទឈប់បាញ់នេះដែរ អនុ​ប្រធានាធិបតី​អាមេរិក JD Vance បានព្រមានខ្លាំងៗទៅអីរ៉ង់ ថា កុំ​ឲ្យ​ធ្វើរឿង «ល្ងង់ខ្លៅ» ព្រោះតែការវាយប្រហាររបស់អ៊ីស្រាអែលនៅប្រទេសលីបង់ឲ្យសោះ។

លោក JD Vance បញ្ជាក់យ៉ាងច្បាស់ៗថា សហរដ្ឋអាមេរិកមិនដែល​យល់ស្រប​ថា អ៊ីស្រាអែលត្រូវតែបញ្ឈប់ការវាយប្រហារនៅលីបង់ ក្នុងក្របខណ្ឌនៃកិច្ចព្រមព្រៀងឈប់បាញ់នេះឡើយ។ បើអីរ៉ង់ចង់​ឲ្យ​ការចរចានេះរលាយសាបសូន្យព្រោះតែរឿងលីបង់ ដែលមិនពាក់ព័ន្ធនឹងខ្លួនសោះនោះ វាក៏ជាជម្រើសរបស់អីរ៉ង់ដែរ ប៉ុន្តែវាជាជម្រើសដ៏ខុសឆ្គងបំផុត។

សូមបញ្ជាក់ថានៅថ្ងៃទី៨មេសាដែលជាថ្ងៃបទឈប់បាញ់រវាងអាម៉េរិកនិងអ៊ីរ៉ង់ ត្រឹមតែ១០នាទីប៉ុណ្ណោះអ៊ីស្រាអែលបានប្រើយន្តហោះចម្បាំង៥០គ្រឿង និងគ្រាប់បែក១៦០គ្រាប់ ចំនួន១០០កន្លែងនៅលីបង់ ។ការវាយប្រហាររបស់អ៊ីស្រាអែលលើតំបន់ពាណិជ្ជកម្ម និងលំនៅដ្ឋានជាច្រើននៅកណ្តាលទីក្រុងបៃរូតដោយគ្មានការព្រមាននិងជូនដំណឹងជាមុននៅថ្ងៃពុធម្សិលមិញនេះ គឺនៅប៉ុន្មានម៉ោងបន្ទាប់ពីមានបទឈប់បាញ់ត្រូវបានប្រកាសនៅក្នុងសង្គ្រាមអាមេរិក-អ៊ីស្រាអែលជាមួយអ៊ីរ៉ង់ដែរ។

ប្រទេសលីបង់បាននិយាយថាមនុស្ស ១១២នាក់ត្រូវសម្លាប់ និងរាប់រយនាក់បានរងរបួសនៅក្នុងអ្វីដែលពួកគេដាក់ឈ្មោះថាជាថ្ងៃដ៏សាហាវបំផុតមួយក្នុងស្ថានភាពសង្គ្រាមអ៊ីស្រាអែលនិងហេសបូឡាចុងក្រោយបង្អស់។ ប្រការនេះបានធ្វើឲ្យប្រទេសអ៊ីរ៉ងក្តៅក្រហាយចេញប្រតិកម្មបិទច្រកសមុទ្ទហម៉ុសឡើងវិញធ្វើឲ្យនាវាដឹកប្រេងរាប់រយគ្រឿង្យត្រូវត្រឡប់បកក្រោយចេញបានតែ២គ្រឿងប៉ុណ្ណោះ។កាលពីថ្ងៃពុធ រដ្ឋមន្ត្រីការបរទេសអីរ៉ង់ Abbas Araghchi បានលើកយកសេចក្តីថ្លែងការណ៍របស់នាយករដ្ឋមន្ត្រីប៉ាគីស្ថាន ដែលជាអ្នកសម្របសម្រួលការឈប់បាញ់នេះមកបង្ហាញ ដោយបញ្ជាក់ថា លីបង់គឺស្ថិតក្នុងកិច្ចព្រមព្រៀងនេះដែរ។តែអ៊ីស្រាអែលបដិសេធ។