ទូតជប៉ុនជួបលោកកឹមសុខាទូតអាមេរិកជួបសម្តេចក្រឡាហោម!
22-January-2026 / ផ្សេងៗ
រាជធានីភ្នំពេញ៖ លោកម៉ាសាហ៊ីរ៉ូមីកាមិ( Masahiro Mikami) ឯកអគ្គរាជទូតជប៉ុនប្រចាំកម្ពុជា ក៏បានសំដែង នូវការស្វាគមន៍ពីជំនួបថ្មីៗនេះ រវាងសម្ដេចតេជោ ហ៊ុន សែន ជាមួយ លោក កឹម សុខា។នេះបើតាមហ្វេសប៊ុកលោកកឹមសុខា។
លោកកឹមសុខាអតីតប្រធានគណបក្សសង្គ្រោះជាតិដែលកំពុងជាប់ចោទនិងត្រៀមចាំបន្តសវនាកាត់ទោសបន្ត បានទទួលជួបជាមួយ លោកម៉ាសាហ៊ីរ៉ូមីកាមិ( Masahiro Mikami) នៅគេហដ្ឋាន របស់លោក ក្នុងរាជធានីភ្នំពេញមានរយៈពេលជាង ០២ម៉ោងកាលពីរសៀលថ្ងៃទី២២ ខែឧសភា ឆ្នាំ២០២០នេះ ។
លោក កឹម សុខា បានសរសេរសារផ្ញើតាមបណ្តាញសង្គមហ្វេសប៊ុក របស់លោកថា បានផ្លាស់ប្តូរទស្សនៈ និងស្វែងយល់គ្នាអំពីចំណងមិត្តភាពកម្ពុជា-ជប៉ុន , ដំណើរការប្រជាធិបតេយ្យ, វិស័យសេដ្ឋកិច្ច និងសង្គម ជាពិសេសអំពីផលប៉ះពាល់ដល់ជីវភាពរស់នៅ របស់ប្រជាពលរដ្ឋ ក្នុងពេល និងក្រោយពេលការរីករាលដាល នៃជំងឺកូវីដ-១៩។
លោក កឹម សុខា បញ្ជាក់បន្តថា លោក Masahiro Mikami ឯកអគ្គរាជទូតជប៉ុន សង្ឃឹមថា ជំនួប រវាងរូបលោក ជាមួយសម្តេច ហ៊ុន សែន ប៉ុន្មានសប្តាហ៍មុននេះ គឺជាជំនួប ដ៏មានសារសំខាន់ ហើយនឹងអាចនាំមក នូវលទ្ធផលជាវិជ្ជមាន សម្រាប់ប្រជាពលរដ្ឋខ្មែរ។
សម្រាប់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃវិញ បានវាយតម្លៃបេសកកម្មការទូត របស់លោកប៉ាទ្រិកមឺហ្វី( W. Patrick Murphy )នៅកម្ពុជា ធ្វើឲ្យទំនាក់ទំនងប្រទេសទាំងពីរមានលក្ខណៈកាន់តែល្អប្រសើរឡើង។ សម្តេចក្រឡាហោម ស ខេង បានវាយតម្លៃខ្ពស់ចំពោះជំនួបតាមទូរស័ព្ទរវាងសម្តេចហ៊ុន សែន និងរដ្ឋមន្ត្រីការបរទេសសហរដ្ឋអាមេរិក លោក Mike Pompeo នាពេលកន្លងមកនេះ ថាបានពង្រឹងពង្រីកកិច្ចសហប្រតិបត្តិការ កម្ពុជា អាមេរិកកាន់តែល្អប្រសើរឡើង។
សម្តេចឧបនាយករដ្ឋមន្ត្រីបានលើកឡើងបែបនេះ នៅក្នុងឱកាសទទួលជួបលោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅព្រះរាជាណាចក្រកម្ពុជា នៅរសៀលថ្ងៃអង្គារ ២៦ ខែឧសភា ឆ្នាំ២០២០នេះនៅទីស្តីការក្រសួងមផ្ទៃ។
លោក W. Patrick Murphy បានគាំទ្រការលើកឡើងរបស់សម្ដេចក្រឡាហោម ស ខេង និងបានគូសបញ្ជាក់ថាឆ្នាំនេះ ជាខូប៧០ឆ្នាំទំនាក់ទំនងការទូតកម្ពុជាអាមេរិក។ នៅក្នុងឆ្នាំនេះ ស្ថានទូតអាមេរិកប្រចាំនៅទីក្រុងភ្នំពេញ បានរៀបចំព្រឹត្តិការណ៍ជាច្រើនប្រចាំខែដើម្បីលើកកម្ពស់កិច្ចសហប្រតិបត្តិការលើគ្រប់វិស័យនៃប្រទេសទាំងពីរ។
លោកឯកអគ្គរដ្ឋទូតបានបញ្ជាក់ថាអាមេរិកបានកំពុងធ្វើការយ៉ាងជិតស្និទ្ធជាមួយកម្ពុជានៅក្នុងវិស័យពីរ គឺស្ថាប័នអនុវត្តច្បាប់និងវិស័យសុខាភិបាល។ឯកអគ្គរដ្ឋទូតអាមេរិកបានស្នើដល់កម្ពុជាធ្វើការស៊ើបអង្កេតនិងចាប់ខ្លួនឃាតករ ដែលបានសម្លាប់ជនជាតិអាមេរិកម្នាក់កាលពីឆ្នាំ២០១៣ នៅកោះរ៉ុង ខេត្តព្រះសីហនុផងដែរ។សម្តេចក្រឡាហោម ស ខេង បានទទួលយកសំណើនេះ។ ជនជាតិ អាមេរិកដែលត្រូវ បានសម្លាប់នៅលើកោះរ៉ុងឈ្មោះ Katherine Grgich (ខាធើរីនហ្គ្រិច) ភេទស្រី អាយុ ៥៥ឆ្នាំ។ ស្ត្រីរូបនេះ បាន ចេញពីផ្ទះសំណាក់នៅថ្ងៃទី ២៣ ខែកញ្ញាឆ្នាំ២០១៣ និងបាន ប្រទះឃើញសាកសពនៅព្រឹកបន្ទាប់នៅថ្ងៃទី ២៩ ខែកញ្ញា ឆ្នាំ២០១៣។ជនសង្ស័យឈ្មោះ យ៉ាន យឿន បានរត់គេចខ្លួនទៅ ប្រទេសថៃ។ សាលាដំបូងខេត្តព្រះសីហនុបានចេញដីកាចាប់ខ្លួនឈ្មោះ យ៉ាន យឿន កាលពីថ្ងៃទី១៨ ខែតុលា ឆ្នាំ២០១៣។
នៅក្នុងជំនួបនេះបន្តភាគីទាំងពីរ បានលើកឡើងពីសេចក្តីព្រាងច្បាប់ទប់ស្កាត់ការលាងលុយដែលកម្ពុជាកំពុងបង្កើតដើម្បីធានាសន្តិសុខសង្គមប្រទេសជាតិ និងអន្តរជាតិផងដែរ៕
