វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7743 នាក់
ម្សិលមិញ 8227 នាក់
សរុប 14134624 នាក់
ភ្នំពេញ៖រសៀលម៉ោង០៣ ថ្ងៃពុធ ទី១៣ ខែឧសភា ឆ្នាំ២០២០ នេះ លោកផៃ សីុផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល រួមជាមួយមន្ត្រី និងសហការីបានទទួលការអនុញ្ញាតិឲ្យចូលសម្តែងការគួរសម និងរាយការណ៍អំពីសកម្មភាពការងារបច្ចុប្បន្ន និងទិសដៅការងារបន្តរបស់អង្គភាពអ្នកនាំពាក្យរាជរដ្ឋាភិបាលជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅទីស្តីការក្រសួងមហាផ្ទៃ។
លោក ផៃ ស៊ីផាន បានជំរាបជូនអំពីសកម្មភាពការងារមមាញឹកនៃអង្គភាពអ្នកនាំពាក្យរាជរដ្ឋាភិបាលតាមរយៈសន្និសីទសារព័ត៌មានស្តីអំពីសមិទ្ធផល និងទិសដៅការងារបន្តថ្នាក់ជាតិរបស់ក្រសួងនិមួយៗដែលទើបបញ្ចប់ទាំងស្រុង និងឈានចូលសមិទ្ធផល និងទិសដៅការងារបន្តថ្នាក់ក្រោមជាតិគ្រប់ខេត្តក្រុង រួមទាំងបច្ចុប្បន្នភាពសំខាន់ៗកំពុងវិវឌ្ឍន៍នៅទូទាំងព្រះរាជាណាចក្រកម្ពុជា។
ក្រៅពីការងាររៀបចំធ្វើសន្និសីទសារព័ត៌មាន អង្កភាពអ្នកនាំពាក្យរាជរដ្ឋាភិបាលបានរៀបចំវគ្គហ្វឹកហ្វឺនបំប៉នអ្នកសារព័ត៌មានប្រកបដោយវិជ្ជាជីវៈដើម្បីលើកស្ទួយ និងបង្កើនសមត្ថភាពអ្នកសារព័ត៌មាន ជាពិសេសការផ្តួចផ្តើមគំនិតរៀបចំសំណួរអោយចំស្នូលនៃបញ្ហា និងការយល់ដឹងអំពីព័ត៌មានសេរី។ លោក ផៃ ស៊ីផានក៏ បានជំរាបជូនសម្តេចក្រឡាហោមផងដែរអំពីការរៀបចំការិយាល័យវៃឆ្លាតរបស់អង្គភាពអ្នកនាំពាក្យក្នុងទិសដៅទទួលបានពត៍មាននិការដោះស្រាយបញ្ហាឆ្ពោះទៅការបោះឆ្នោតឃុំ-សង្កាត់ឆ្នាំ២០២២ និងការបោះឆ្នោតសកលឆ្នាំ២០២៣។
សម្តេចក្រឡាហោម ស ខេង ថ្លែងអំណគុណចំពោះកិច្ចខិតខំប្រឹងប្រែងរបស់អង្គភាពអ្នកនាំពាក្យរាជរដ្ឋាភិបាលដែលបានជួយផ្សព្វផ្សាយជូនសាធារណជនគ្រប់ស្រទាប់វណ្ណៈអោយយល់ដឹងអំពីសមិទ្ធផលជាតិដែលរាជរដ្ឋាភិបាលបានកសាង អភិវឌ្ឍន៍ និងទិសដៅការងារសំរាប់ឆ្នាំបន្តបន្ទាប់។ សម្តេចក្រឡាហោមក៏បានលើកឡើងអំពីកិច្ចការងារសន្តិសុខ ការបង្ក្រាបគ្រឿងញៀន បញ្ហាដីធ្លី ការគ្រប់គ្រងធនធានធម្មជាតិ អំពើហឹង្សាក្នុងគ្រួសារ ការជួញដូរមនុស្ស កំណែទំរង់រដ្ឋបាលថ្នាក់ក្រោមជាតិ កំណែទំរង់វិស័យអប់រំនៅខេត្តបាត់ដំបង អភិបាលកិច្ចល្អ ការអនុវត្តអនុក្រឹត្យថ្មីស្តីអំពីច្បាប់ចរាចរណ៍ផ្លូវគោកជាដើម។
សម្តេចក្រឡាហោមបានគូសបញ្ជាក់អំពីការរិតបណ្តឹងច្បាប់ចរាចរណ៍ផ្លូវគោកក្នុងគោលបំណងរក្សាជីវិត និងទ្រព្យសម្បត្តិប្រជាពលរដ្ឋតែប៉ុណ្ណោះ។ជាមួយគ្នានោះ សម្តេចក្រឡាហោមបានមានប្រសាសន៍បញ្ជាក់អំពីផលប្រយោជន៍ និងភាពងាយស្រួលអំពីច្រកចេញចូលតែមួយដើម្បីសម្រួលការងារលិខិតស្នាមនានា រួមទាំងលិខិតឆ្លងដែនជូនប្រជាជនទូទៅផងដែរ។ សម្តេចក្រឡាហោម ស ខេង បានលើកទឹកចិត្ត និងគាំទ្រសកម្មភាពការងាររបស់អង្គភាពអ្នកនាំពាក្យរាជរដ្ឋាភិបាលតាមរយៈការងារវិលជុំប្រចាំឆ្នាំដើម្បីផ្តល់ឱកាសពេញលេញជូនមន្ត្រីថ្នាក់ជាតិ ថ្នាក់ក្រោមជាតិ រាប់ចាប់ពីថ្នាក់ខេត្ត ស្រុក រហូតដល់ថ្នាក់ឃុំអាចបង្ហាញសមិទ្ធផលនានាជូនជនរួមជាតិកម្ពុជា៕ដកស្រង់អត្ថបទលោកStevinn Sun,