ទូតខ្មែរប្រចាំអាមេរិក ប្រតិកម្មជាមួយអតីតថ្នាក់ដឹកនាំនៃអតីតបក្សសង្គ្រោះជាតិដែលចោទថាមិនយកចិត្តទុកដាក់ជាមួយប្រជាពលរដ្ឋ
11-February-2026 / ផ្សេងៗ
ភ្នំពេញ៖ ស្ថានទូតកម្ពុជាប្រចាំរដ្ឋធានីវ៉ាស៊ីនតោន (Washington DC) សហរដ្ឋអាមេរិកបានប្រតិកម្មជាមួយការលើកឡើងរបស់អតីតថ្នាក់ដឹកនាំនៃអតីតបក្សប្រឆាំង លោកស្រី មូរ សុខហួរ ដែល កាលពីកាលពីព្រឹកថ្ងៃទី១០ ខែវិច្ឆិកា ឆ្នាំ២០២០ និយាយនៅមុខនិវេសនដ្ឋានទូតថា ស្ថានទូតយកចិត្តទុកដាក់ធ្វើការបម្រើប្រជាពលរដ្ឋខ្មែរទាំងអស់ ។ស្ថានទូតអះអាងថា “ស្ថានទូតផ្សារភ្ជាប់យ៉ាងជិតស្និតជាមួយប្រជាពលរដ្ឋខ្មែរទូទៅ តែមិនមែនជាមួយបុគ្គលក្រៅច្បាប់ឡើយ”។
សូមបញ្ជាក់ថាកាលពីថ្ងៃទី១០ ខែវិច្ឆិកា ឆ្នាំ២០២០ អតីតថ្នាក់ដឹកនាំនៃអតីតគណបក្សសង្គ្រោះជាតិ ដឹកនាំដោយលោកស្រី មូរ សុខហួរ បាននៅដាក់លិខិតនៅស្ថានទូតកម្ពុជា ប្រចាំនៅនៅរដ្ឋធានីវ៉ាស៊ីនតោន សហរដ្ឋអាមេរិក ដើម្បីស្នើសុំឲ្យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្តល់សុពលភាពលិខិតឆ្លងដែនឡើងវិញ ដល់អតីតថ្នាក់ដឹកនាំ នៃអតីតគណបក្សសង្គ្រោះជាតិចំនួន១១រូប ប៉ុន្តែត្រូវបានខាងស្ថានទូតមិនចេញទទួលឡើយទោះចុចកណ្តឹងច្រើនដងក៏ដោយ។
បើតាមអ្នកនាំពាក្យស្ថានទូតកម្ពុជាបានបញ្ជាក់ថា ហេតុការណ៍ដែលបានកើតឡើងនៅមុខស្ថានទូត កាលពីព្រឹកថ្ងៃទី១០ ខែវិច្ឆិកា ហើយស្ថានទូតមិនអើពើនោះ គឺជាវត្តមានរបស់បុគ្គលមួយគ្រាប់តូចក្រោមផ្លាករបស់អង្គការចាត់តាំងនយោបាយក្រៅច្បាប់មួយ ក្រោយពីត្រូវបានតុលាការកំពូលរបស់ព្រះរាជាណាចក្រកម្ពុជាសម្រេចរំលាយចោល តាមសាលដីកាចុះថ្ងៃទី ១៦ ខែវិច្ឆិកា ឆ្នាំ២០១៧ ហើយបន្ទាប់មកត្រូវបានក្រសួងមហាផ្ទៃសម្រេចលុបឈ្មោះចេញពីបញ្ជីគណបក្សនយោបាយនៅកម្ពុជា តាមសេចក្តីប្រកាសចុះថ្ងៃទី១៧ ខែវិច្ឆិកា ឆ្នាំ២០១៧។ ដូច្នេះករណីនេះ ពុំអាចយកមកប្រើប្រាស់ក្នុងការចោទប្រកាន់ថា សានទូតមិនទទួលជួបពលរដ្ឋខ្មែរនោះបានឡើយ។
អ្នកនាំពាក្យស្ថានទូតបញ្ជាក់ថា ស្របតាមគោលនយោបាយរបស់រាជរដ្ឋាភិបាលកម្ពុជា និងការណែនាំរបស់ក្រសួងការបរទេស និងសហប្រតិបត្តិការអន្តរជាតិស្ថានទូតបានប្រើដោយការយកចិត្តទុកដាក់ជាពិសេសដល់ការលើកកម្ពស់ទំនាក់ទំនងរបស់ស្ថានទូតជាមួយសហគមន៍ខ្មែរនៅក្នុងប្រទេស ដែលស្ថានទូតតាំងនៅ។
ក្នុងស្មារតីនេះ ស្ថានទូតបាន និងកំពុងខិតខំបំពេញ ដោយការយកចិត្តទុកដាក់ និងការទទួលខុសត្រូវខ្ពស់ ក្នុងការផ្ដល់នូវសេវាផ្សេងៗដល់ពលរដ្ឋខ្មែរទូទៅ ស្របទៅតាមសំណូមពរ និងតម្រូវការរបស់បងប្អូនទាំងអស់ និងលទ្ធភាពជាក់ស្ដែងរបស់ស្ថានទូត។
លោកអេង ឆៃអ៊ាង បានគូសបញ្ជាក់ថា ថ្នាក់ដឹកនាំនៃអតីតគណបក្សសង្គ្រោះជាតិចង់មកកម្ពុជា ដើម្បីចូលរួមនៅក្នុងសវនាការរបស់តុលាការ។ ប៉ុន្តែពួកគេមិនអាចមកបាន ដោយសារតែលិខិតឆ្លងដែនរបស់ពួកគេត្រូវបានបញ្ចប់សុពលភាព។ ហេតុដូច្នេះហើយទើបពួកគេស្នើសុំឱ្យក្រសួងមហាផ្ទៃផ្តល់សុពលភាពលិខិតឆ្លងដែនឡើងវិញ។
លោកខៀវ សុភ័គ អ្នកនាំពាក្យក្រសួងមហាផ្ទៃកម្ពុជា បានអះអាងថា មធ្យោបាយមកកម្ពុជាវិញរបស់មន្ត្រីអតីតបក្សប្រឆាំង គឺអាស្រ័យទៅតាមការនីតិវិធីរបស់តុលាការ។ អ្នកនាំពាក្យរូបនេះបានការពារថា ការបញ្ចប់សុពលភាពលិខិតឆ្លងដែនរបស់ពួកគេ គឺត្រឹមត្រូវតាមច្បាប់ ដោយសារពួកគេកំពុងមានពិរុទ្ធភាព ហើយរត់គេចទៅបរទេស និងថា បញ្ហាដែលបានកើតឡើងចំពោះពួកគេនេះ គឺពួកគេជាអ្នកបង្កឡើងដោយខ្លួនឯង។
ក្រសួងការបរទេសកម្ពុជាបានសម្រេចបញ្ចប់សុពលភាពលិខិតឆ្លងដែនធម្មតារបស់មន្ត្រីជាន់ខ្ពស់នៃអតីតគណបក្សប្រឆាំងទាំង១១រូបនេះកាលពីខែវិច្ឆិកា ឆ្នាំ២០១៩កន្លងទៅ ។ អ្នកនាំពាក្យក្រសួងការបរទេសកម្ពុជា លោកកុយ កួង បានគូសបញ្ជាក់ថា ការបញ្ចប់សុពលភាពលិខិតឆ្លងដែននេះ បានធ្វើឱ្យមន្ត្រីជាន់ខ្ពស់អតីតបក្សប្រឆាំងក្លាយជាជនអន្តោប្រវេសន៍ខុសច្បាប់នៅក្នុងប្រទេសដែលពួកគេកំពុងស្នាក់នៅ។ លើសពីនេះទៅទៀត លោកថា ប្រទេសទាំងនោះ អាចនឹងចាប់បញ្ជូនពួកគេមកកាន់ប្រទេសកំណើតរបស់ខ្លួនវិញបាន។
សូមបញ្ជាក់ថា អតីតថ្នាក់ដឹកនាំ នៃអតីតគណបក្ស សង្គ្រោះជាតិទាំង១១ រូបនោះរួមមាន ១. អ្នកស្រី មូរ សុខ ហួរ , ២. លោក អេង ឆៃអ៊ាង , ៣. លោក ហូរ វ៉ាន់ , ៤. លោក ឡុង រី , ៥. លោក សោ ចាន់ដេត , ៦. លោក គង់ សភា ,៧. លោក វ៉ាន់ ណារិទ្ធ , ៨. លោក ដាង ចំរើន , ៩. លោក ញឹម គិមញុល , ១០. លោក ហេង ដាណារ៉ូ និង១១. លោក ម៉ន ផល្លា៕
