រឿងកូវិដ១៩ចិនសសើរកម្ពុជាអាមេរិករិះគន់ចិន
ភ្នំពេញ៖ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន បានអរគុណកម្ពុជា ដែលបានប្រឆាំងនឹងការធ្វើនយោបាយតូបនីយកម្ម និងល្បែងទម្លាក់កំហុសក្នុងពេលដែលយើងត្រូវរួមគ្នាដើម្បីប្រឈមនឹងការគំរាមកំហែងរួមចំពោះមនុស្សជាតិ។
លោក វ៉ាង យីបានចាត់ទុកការដែលកម្ពុជាគាំទ្រកិច្ចប្រឹប្រែងរបស់អង្គការសុខភាពពិភពលោក (WHO) គឺជាជំហរមួយដ៏ត្រឹមត្រូវ។ នេះបើតាមសេចក្តីប្រកាសរបស់ក្រសួងការបរទេសកម្ពុជា ស្តីពីកិច្ចសន្ទនាតាមទូរស័ព្ទ រវាងប្រមុខការទូតកម្ពុជានិងចិន កាលពីរសៀលថ្ងៃទី២៧ ខែមេសា ឆ្នាំ២០២០ .។ លោកឧបនាយករដ្ឋមន្ត្រី ប្រាក់ សុខុន ក៏បានសម្តែងការគាំទ្រចំពោះគំនិតផ្តួចផ្តើមរបស់ចិន ដែលអំពាវនាវឱ្យមានការឯកភាពគ្នាក្នុងការប្រឆាំង COVID-19 (Covid-19: A Call for Unity)
ក្នុងកិច្ចប្រជុំតាមប្រពន្ធវិដេអូស្តីពីកិច្ចសហប្រតិបត្តិការប្រយុទ្ធប្រឆាំងនឹងជំងឺឆ្លងកូវីដ-១៩ នាថ្ងៃទី២៣ ខែមេសា ឆ្នាំ២០២០ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានជំរុញឱ្យអាស៊ាន-អាមេរិក រួមគ្នាបញ្ឈប់ការរាលដាលនូវព័ត៌មានមិនពិតពាក់ព័ន្ធនឹងបញ្ហាកូវីដ១៩ និងឈប់ចោទប្រកាន់គ្នាទៅវិញទៅមក។«យើងត្រូវការបង្កើនកិច្ចសហប្រតិបត្តិការចេញពីបណ្តាញផ្សព្វផ្សាយព័ត៌មាន ដើម្បីបញ្ឈប់ការរាលដាលព័ត៌មានមិនពិត ដែលអាចបណ្តាលឱ្យមានការភ័យតក់ស្លុតជាសាធារណៈ ការរើសអើងគ្នា និងការចោទប្រកាន់គ្នាទៅវិញទៅមក។ យើងគួរកោតសរសើរចំពោះកិច្ចខិតខំប្រឹងប្រែងទាំងឡាយ ក៏ដូចជាតួនាទីនាំមុខរបស់អង្គការសុខភាពពិភពលោក ជាស្ថាប័នសុខភាពពិភពលោកមួយដែលគួរឱ្យគោរពក្នុងការផ្តល់ជូននូវព័ត៌មាន ការបណ្តុះបណ្តាល និងអនុសាសន៍នានា និងការត្រួសត្រាយផ្លូវសម្រាប់បុព្វហេតុដ៏ធំ របស់មនុស្សជាតិ»។
ដោយឡែកបើតាមបណ្តាញផ្សព្វផ្សាយអាស៊ី(chanell news asia)ផ្សាយយថា៖ផ្ទុយពីកម្ពុជាលោកប្រធានាធិបតីអាមេរិច ដូណាល់ ត្រាំ បាននិយាយរិះគន់ចិននៅថ្ងៃចន្ទថា ចិនគួរតែអាចបញ្ឈប់វីរុសកូរ៉ូណាបាន មុនពេលវាឆ្លងរាតត្បាតទៅកាន់ពិភពលោក។ លោកថ្លែងថា រដ្ឋាបាលរបស់លោកកំពុង តែធ្វើការស៊ើបអង្កេតយ៉ាងម៉ដ្ឋចង់ចំពោះអ្វីដែលបានកើតឡើង។ “ពួកយើងកំពុងតែធ្វើការស៊ើបអង្កេតយ៉ាហ្មត់ចត់… ពួកយើងមិនសប្បាយចិត្តជាមួយនឹងចិនឡើយ”។
“មានវិធីជាច្រើនដែលអ្នកអាចឲ្យពួកគេទទួលខុសត្រូវ”។“យើងជឿជាក់ថា វាគួរតែអាចត្រូវបញ្ឈប់បាននៅកន្លែងវាផ្ទុះ។ វាគួរត្រូវគេបញ្ឈប់បានយ៉ាងលឿន ហើយដូច្នេះ វានឹងមិនមានការឆ្លងរាតត្បាតជុំវិញពិភពលោកឡើយ”។ត្រាំ និយាយទៀតថា គាត់ប្រហែលនឹងទារសំណងនៃការខូចខាតពីចិន។ កាលពីពេលថ្មីៗកាសែតអាល្លឺម៉ង់ ស្នើឲ្យចិនផ្តល់សំណងជាទឹកប្រាក់ ១៦៥ពាន់លានដុល្លារដល់អាល្លឺម៉ង ដោយសារតែសេដ្ឋកិច្ចអាល្លឺម៉ង់ត្រូវបំផ្លាញដោយវីរុស។
លោកត្រាំ ត្រូវបានគេសួរថាតើគាត់នឹងពិចារណា ធ្វើដូចអាល្លឺម៉ងឬយ៉ាងណា ហើយគាត់បាននិយាយថា “ពួកយើងអាចធ្វើអ្វីផ្សេងដែលស្រួលជាងនោះ”។
លោកថ្លែងថា “អាល្លឺម៉ង់កំពុងសម្លឹងមើលរឿងមួយ ពួកយើងកំពុងមើលរឿងមួយ។ ពួកយើងកំពុងតែនិយាយពីបញ្ហាលុយច្រើនជាងដែលអាឡឺម៉ងកំពុងនិយាយ”។“ពួកយើងមិនទាន់បានកំណត់ពីចំនួនទឹកប្រាក់នៅឡើយទេ”។
កាលពីសប្តាហ៍មុន រដ្ឋមន្ត្រីការបរទេសអាមេរិច លោក Mike Pompeo បាននិយាយថា អាមេរិចជឿជាក់ថា ទីក្រុងប៉េកាំងខកខានក្នុងការរាយការណ៍ ពីការផ្ទុះវីរុសឲ្យទាន់ពេលវេលា និងបិទបាំងពីគ្រោះថ្នាក់ដែលបង្កឡើងដោយវីរុស។ចំណែកអ្នកនាំពាក្យក្រសួងការបរទេសចិន Hua Chunying បានធ្វើការឆ្លើយតបវិញថា លោក Pompeo “គួរឈប់លេងល្បែងនយោបាយ”។ យកល្អគួរសន្សំកម្លាំងជួយសង្គ្រោះជីវិតវិញ។ចិនបានចោទប្រកាន់អាមេរិក ថាមានចេតនាបំផ្លាញកិត្តិយសរបស់ចិន នៅលើឆាកអន្តរជាតិ។
សារព័ត៌មាន Sputnik របស់រុស្ស៊ីនៅថ្ងៃទី២៨ខែមេសាបានដកស្រង់សម្តីអ្នកនាំពាក្យក្រសួងការបរទេសចិនបញ្ជាក់ថា ទីក្រុងវ៉ាស៊ីនតោនចាត់វិធានការទប់ស្កាត់កូវីដ១៩យឺតយ៉ាង ក្នុងពេល អ៊ីតាលី និងប្រទេសតំបន់អឺរ៉ុបឆ្លងច្រើនហើយតែអាមេរិក ធ្វើប្រងើយ។អ្នកនាំពាក្យក្រសួងការបរទេសចិន លោក Geng Shuang បានបញ្ជាក់ថា«មនុស្សគ្រប់គ្នាចង់ដឹងថាកូវីដ១៩ កើតឡើងនៅលើទឹកដីអាមេរិកដំបូងគេនាពេលណា? តើរដ្ឋាភិបាលអាមេរិកបានលាក់បាំងអ្វីខ្លះ? ហេតុអ្វីបានជាអាមេរិកព្យាយាមទម្លាក់កំហុសទៅឲ្យប្រទេសដទៃនិងអង្គការអន្តរជាតិ។មន្ត្រីចិនបានបញ្ជាក់ថាទាំងអាមេរិក និងចិន សុទ្ធតែរងគ្រោះដោយសារកូវីដ១៩ ដូចគ្នា។ កូវីដ គឺជាសត្រូវរួមរបស់មនុស្សជាតិ ហើយរាល់ការចោទប្រកាន់ទម្លាក់កំហុសទៅឲ្យចិន គឺជារឿងបរាជ័យ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងចេញពីប្រទេសចិនកាលពីចុងឆ្នាំ ២០១៩។ រហូតមកដល់ពេលនេះ វីរុសដ៏កាចសាហាវនេះ បានឆក់យកជីវិតមនុស្សច្រើនជាង ២១១.០០០នាក់ និងឆ្លងទៅកាន់មនុស្សជាង ៣.០០០.០០០នាក់ជុំវិញពិភពលោក។
អាមេរិកគឺជាប្រទេសរងគ្រោះខ្លាំងជាងគេពីវីរុសកូវិដ១៩នេះ ដោយមានអ្នកឆ្លងសរុបជិត ១.០០០.០០០នាក់ និងស្លាប់ជាង ៥០.០០០នាក់៕
