រដ្ឋមន្ត្រីការពារជាតិសឹង្ហបុរី និងកម្ពុជាបានបញ្ជាក់ថា៖ យើងនឹងធ្វើការរួមគ្នាដើម្បីសន្តិភាព ក្នុងតំបន់អាស៊ាន
21-September-2026 / ផ្សេងៗ
សឹង្ហបុរី៖ អញ្ជើញចូលរួមកិច្ចប្រជុំកំពូលសន្តិសុខអាស៊ីលើកទី២១ (កិច្ចសន្ទនាសាំងគ្រីឡា) លោក នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីការពារជាតិ នាថ្ងៃទី១ ខែមិថុនា ឆ្នាំ២០២៤ បានចូលជួបសម្តែងការគួរសម លោក អឹង អេងហេន(Ng Eng Hen) រដ្ឋមន្ត្រីការពារជាតិសឹង្ហបុរី ។
លោក ទៀ សីហាបានថ្លែងអំណរគុណដល់ រដ្ឋមន្ត្រីក្រសួងការពារជាតិសឹង្ហបុរី ដែលបានផ្ដល់ឱកាសឲ្យគណៈប្រតិភូក្រសួងការពារជាតិកម្ពុជាបានមកចូលរួមក្នុងកិច្ចសន្ទនាសាំងគ្រីឡា ឆ្នាំ២០២៤ ។ លោករដ្ឋមន្ត្រីក៏បានពាំនាំនូវការផ្ដាំផ្ញើសាកសួរទុក្ខពីសម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និង ជាអតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កម្ពុជា ជូនចំពោះ ឯកឧត្តម រដ្ឋមន្ត្រីការពារជាតិសិង្ហបុរី ។ ជាការមតិឆ្លើយតប ឯកឧត្តម រដ្ឋមន្ត្រីការពារជាតិសឹង្ហបុរី បានផ្ដាំផ្ញើសាកសួរទុក្ខដល់ សម្ដេចពិជ័យសេនា ទៀ បាញ់ ដែលជាមិត្តចាស់ហើយជាអ្នកដែលមានវ័យចំណាស់ជាងគេ ក្នុងកិច្ចប្រជុំរដ្ឋមន្ត្រីកម្ពុជាតិអាស៊ាន (ADMM )។
លោក ទៀ សីហា បានលើកឡើងពីទំនងទំនាក់ទំនងកិច្ចសហការរវាងប្រទេសទាំងពីរ កងទ័ពទាំងពីរ កម្ពុជា សឹង្ហបុរី ដែលក្នុងនោះ ទាំងវិស័យស៊ីវិល និង យោធាប្រទេសសឹង្ហបុរីបានជួយបណ្ដុះបណ្ដាលធនធានបានយ៉ាងល្អប្រសើរ ហើយកម្ពុជាបានទទួលលទ្ធផលផ្លែផ្កាជាច្រើន ពីសិក្ខាកាមដែលបានបញ្ចប់ការបណ្ដុះបណ្ដាលធនធានមនុស្សនៅសឹង្ហបុរី ។ លោកទៀសីហា បានបញ្ជាក់ថា៖ចូលមកដល់ឆ្នាំ២០២៤ នេះ បន្ទាប់ពីមានកិច្ចសហប្រតិបត្តិការរវាងកងទ័ពជើងគោក យើងបន្តធ្វើកិច្ចសហប្រតិបត្តិការ រវាងកងទ័ពជើងទឹក ប្រទេសទាំងពីរ ស្របពេលដែលកម្ពុជាបានបំពេញជំនាញលើវិស័យកងទ័ពជើងទឹក ។
លោក ទៀ សីហា បានបញ្ជាក់បន្ថែមថា៖ ក្នុងឆ្នាំ២០២៤ នេះដែរ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់លើការបណ្ដុះបណ្ដាលធនធានមនុស្សក្នុងខ.ភ.ម ការធ្វើទំនើបកម្មលើរចនាសម្ព័ន្ធ និងជំនាញដល់កងទ័ព ។ លោក អឹង អេងហេន ( Ng Eng Hen) រដ្ឋមន្ត្រីការពារជាតិសឹង្ហបុរី បានសម្តែងនូវក្តីសោមនស្សរីករាយ ចំពោះកិច្ចសហប្រតិបត្តិការលើវិស័យកងទ័ពជើងទឹកប្រទេសទាំងពីរ ដែលទៅថ្ងៃខាងមុខ យើងនឹងផ្តោតការធ្វើលំហាត់សមយុទ្ធរួមគ្នា រវាងកងទ័ពជើងទឹកអាស៊ានផងដែរ ។ លោក រដ្ឋមន្ត្រីការពារជាតិសឹង្ហបុរី បានបញ្ជាក់ថា៖ យើងនឹងធ្វើការរួមគ្នាដើម្បីសន្តិភាព ក្នុងតំបន់អាស៊ានរបស់យើង ។
សូមបញ្ជាក់ថានៅក្រោមប្រធានបទ «ការកសាងសន្តិសុខសហប្រតិបត្តិការនៅអាស៊ី-ប៉ាស៊ីហ្វិក» លោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា បានឡើងថ្លែងនៅចំពោះមុខបណ្តាប្រមុខការពារជាតិរបស់ប្រទេសធំៗនៅក្នុងពិភពលោកថា កម្ពុជាបានមើលឃើញការប្រកួតប្រជែងភូមិសាស្ត្រនយោបាយ សង្គ្រាមនៅអ៊ុយក្រែន នៅតំបន់ដើមបូព៌ា រួមទាំងភាពតានតឹងក្នុងពិភពលោក នៅក្នុងជ្រុងមួយផ្សេង។
លោក ទៀ សីហាឲ្យដឹងថា កម្ពុជាជារដ្ឋតូចដែលគ្មានសមត្ថភាពទៅបង្ហាញឥទ្ធិពល ក្នុងសំណុំរឿងអន្តរជាតិធំបានឡើយ។ ផ្ទុយមកវិញ កម្ពុជាតែងតែគាំទ្រដល់ការពិភាក្សា ស្វែងរក ការសម្របសម្រួលគ្នា ដោយដំណោះស្រាយឈ្នះ-ឈ្នះ។ “បញ្ហាដែលកំពុងកើតមានឡើងនៅក្នុងពិភពលោក គឺចាំបាច់ត្រូវមានការផ្តួចផ្តើមគំនិត បង្កើតក្រុមសហប្រតិបត្តិផ្នែកសន្តិសុខ សម្រាប់រក្សាសន្តិភាពនិងការអភិវឌ្ឍន៍ក្នុងតំបន់។
ក្នុងនាមជាប្រទេសសមាជិកអាស៊ាន កម្ពុជាតែងរួមចំណែក ផ្តល់អាទិភាពដល់ការរក្សាសន្តិភាព ការអភិវឌ្ឍន៍ និងភាពរុងរឿង ដោយយោងទៅលើគោលការណ៍ជជែកគ្នា និងការគោរពគ្នាទៅវិញទៅមក។
ដោយលើកពីករណីដែលកើតឡើងក្នុងតំបន់អាស៊ី និងផ្ទៃក្នុងអាស៊ាន ប្រមុខការពារជាតិកម្ពុជា បានអះអាងថា អាស៊ានបានព្យាយាមសម្លឹង ពីភាពវិជ្ជមានក្នុងបញ្ហាសមុទ្រចិនខាងត្បូង។ ចំពោះស្ថានការណ៍ក្នុងប្រទេសភូមាវិញ រដ្ឋមន្ត្រីការពារជាតិកម្ពុជាបានអះអាងពីជំហររបស់អាស៊ាន ដែលនៅតែបន្តឈរ លើគោលការណ៍ជាឯកច្ឆ័នប្រាំចំណុច ដើម្បីដោះស្រាយបញ្ហាភូមា។
គួរបញ្ជាក់ថា កិច្ចប្រជុំកំពូលសន្តិសុខអាស៊ី ប៉ាស៊ីហ្វិក ឬហៅមួយបែបទៀតថា កិច្ចប្រជុំសាំងគ្រីឡា ជាកិច្ចប្រជុំប្រចាំឆ្នាំដែលនិយាយពីបញ្ហាសន្តិសុខតំបន់និងអន្តរជាតិ ដោយមានឥស្សរជនជាមេដឹកនាំ ឬឋានៈជារដ្ឋមន្ត្រីការពារជាតិចូលរួម។ នៅឆ្នាំនេះ លោក Lloyd Austin ដែលជារដ្ឋមន្ត្រីការពារជាតិអាមេរិក បានបង្ហាញមុខជាថ្មី នៅក្នុងកិច្ចប្រជុំសាំងគ្រីឡា។ បន្ទាប់ពីចូលរួមក្នុងកិច្ចប្រជុំកំពូលនៅសិង្ហបុរី ប្រមុខការពារជាតិអាមេរិក នឹងបន្តធ្វើទស្សនកិច្ចនៅកម្ពុជា នៅថ្ងៃទី០៤មិថុនា ដើម្បីជួបជជែកពីបញ្ហាសន្តិសុខ និងការពារជាតិជាមួយនាយករដ្ឋមន្ត្រីថ្មីរបស់កម្ពុជា៕
