នាងគីម យ៉ូជុងប្អូនស្រីលោកគីមជុងអ៊ុនត្រូវបានគេវាយតម្លៃថាជាមនុស្សតែម្នាក់គត់ដែលនឹងបន្តតំណែងពីបងប្រុស!
06-April-2025 / ព័ត៌មានអន្តរជាតិ
កូរ៉េខាងជើង៖អវត្តមានមេដឹកនាំកូរ៉េលោកគីមជុងអ៊ុន ក្នុងខួបគម្រប់ទី ១០៨ នៃថ្ងៃកំណើតរបស់ជីតារបស់លោក គឺ លោកគីម អ៊ីលស៊ុង បិតាស្ថាបនិកកូរ៉េខាងជើងានថ្វើឲ្យមានសំណួរជាច្រើនស្តីពីសុខភាពលោក។ព្រោះធម្មតាពិធីរំលឹកខួបប្រចាំឆ្នាំគឺជាព្រឹត្តិការណ៍ដ៏សំខាន់បំផុតរបស់កូរ៉េខាងជើងហើយលោកគីមអាយុ ៣៦ ឆ្នាំមិនដែលខកខានម្តងណាឡើយតាំងពីទទួលអំណាចពីឪពុករបស់គាត់កាលពីចុងឆ្នាំ ២០១១។
ប្រព័ន្ធផ្សព្វផ្សាយរដ្ឋកូរ៉េខាងជើងកាលពីថ្ងៃពុធបាននិយាយថាលោកគីមបានផ្ញើសារថ្លែងអំណរគុណដល់ប្រធានាធិបតីស៊ីរីចំពោះការជូនពរនៅថ្ងៃកំណើតជីតារបស់គាត់ប៉ុន្តែមិនបានរាយការណ៍អំពីសកម្មភាពផ្សេងទៀតទេ។តែបណ្តាញឃោសនាកូរ៉េខាងត្បូងបានបញ្ជាក់ម្តងទៀតថាគ្មានការវិវត្តខុសប្រក្រតីណាមួយត្រូវបានរកឃើញនៅកូរ៉េខាងជើងទេ។
លោកគីមធ្លាប់បាត់មុខជាសាធារណៈយ៉ាងយូរនាពេលកន្លងមក ហើយចរិតនៃភាពសម្ងាត់របស់កូរ៉េខាងជើងអនុញ្ញាតឱ្យអ្នកខាងក្រៅតិចតួចណាស់ហ៊ានអះអាងយ៉ាងមានទំនុកចិត្តថាតើគាត់មិនស្រួលខ្លួនឬយ៉ាងណា។លោកគីមគឺជាជំនាន់ទី ៣ នៃគ្រួសាររបស់គាត់ដែលបានគ្រប់គ្រងប្រទេសកូរ៉េខាងជើង ហើយការគោរពបុគ្គលយ៉ាងមុតមាំត្រូវបានកសាងឡើងនៅជុំវិញខ្លួនគាត់ ឪពុកគាត់ និងជីតាគាត់។សាច់ឈាមនៃគ្រួសារ “ផែកទូ” (Paektu) ដែលដាក់ឈ្មោះតាមភ្នំខ្ពស់បំផុតនៅឧបទ្វីបកូរ៉េ ត្រូវគេនិយាយថាផ្តល់សិទ្ធិឱ្យតែសមាជិកគ្រួសារនេះផ្ទាល់ប៉ុណ្ណោះដើម្បីគ្រប់គ្រងប្រទេស។
ប្រការនោះធ្វើឱ្យប្អូនស្រីរបស់លោកគីមជាមន្ត្រីជាន់ខ្ពស់គណបក្សកាន់អំណាច នាងគីម យ៉ូជុង ក្លាយជាបេក្ខជនទំនងជាងគេបំផុតដើម្បីដឹកនាំប្រទេស ប្រសិនបើបងប្រុសរបស់នាងមានជំងឺធ្ងន់ធ្ងរ ពិការកាយសម្បទា ឬស្លាប់។ប៉ុន្តែអ្នកជំនាញខ្លះនិយាយថា ការដឹកនាំជាសមូហភាព ដែលអាចនឹងបញ្ចប់ការគ្រប់គ្រងវង្សត្រកូលគ្រួសារគីម ក៏អាចទៅរួចបានដែរ។
អ្នកវិភាគឈ្មោះ ចឹង សឹងចាង នៅវិទ្យាស្ថានឯកជនសេជុងក្នុងប្រទេសកូរ៉េខាងត្បូងនិយាយថា “ក្នុងចំណោមឥស្សរជនមានអំណាចនៅកូរ៉េខាងជើង នាងគីម យ៉ូជុង មានឱកាសខ្ពស់បំផុតក្នុងការទទួលបានអំណាច ហើយខ្ញុំគិតថាលទ្ធភាពគឺច្រើនជាង ៩០ ភាគរយ។ កូរ៉េខាងជើងគឺដូចជារាជវង្សមួយអ៊ីចឹង ហើយយើងអាចចាត់ទុកពូជពង្សផែកទូជាឈាមជ័ររាជវង្ស ដូច្នេះវាទំនងជាគ្មាននរណាលើកឡើងពីបញ្ហាជុំវិញនាងគីម យ៉ូជុង ឡើងកាន់អំណាចនោះទេ”។
ដោយគេជឿថាមានអាយុខ្ទង់៣០ឆ្នាំ នាងគីម យ៉ូជុងទទួលបន្ទុកកិច្ចការឃោសនារបស់កូរ៉េខាងជើងហើយនៅដើមខែនេះត្រូវបានតែងតាំងជាសមាជិកការិយាល័យនយោបាយដ៏មានឥទ្ធិពលម្នាក់។
ជារឿយៗនាងបានបង្ហាញខ្លួនជាមួយបងប្រុសរបស់នាងនៅឯសកម្មភាពសាធារណៈដោយឈរក្នុងចំណោមមន្ត្រីប្រុសៗវ័យចំណាស់។នាងបានអមដំណើរលោកគីមជុងអ៊ុននៅឯកិច្ចប្រជុំធំៗរបស់លោកជាមួយប្រធានាធិបតីដូណាល់ត្រាំនិងមេដឹកនាំពិភពលោកដទៃទៀត។ ភាពជិតស្និទ្ធរបស់នាងចំពោះគាត់ក្នុងអំឡុងកិច្ចប្រជុំទាំងនោះបានធ្វើឱ្យអ្នកខាងក្រៅជឿថានាងជាមន្ត្រីលេខ ២ របស់កូរ៉េខាងជើង។
ទីប្រឹក្សាសន្តិសុខជាតិអាម៉េរិកលោករ៉ូបឺត អូប្រ៊ីន បានប្រាប់អ្នកយកព័ត៌មានកាលពីថ្ងៃអង្គារថា “ខ្ញុំសន្មត់ជាមូលដ្ឋានថាប្រហែលជាអ្នកណាម្នាក់នៅក្នុងគ្រួសារនឹងជំនួសលោកគីមជុងអ៊ុន។ ទោះបីយ៉ាងណាលោកប្រធានាធិបតីដូណាល់ត្រាំមិនបានអធិប្បាយអ្វីពីករណិយ៍នេះឡើយក្រៅតែពីជូនពរលោកីមឲ្យមានសុខភាពល្អពេលឆ្លើយសំណួរអ្នកកាសែត។កាលពេលថ្មីៗនេះ សារព័ត៌មាន Daily NK របស់ក្រុមអ្នករត់ចោលកូរ៉េខាងជើងដែលមានមូលដ្ឋាននៅកូរ៉េខាងត្បូងបាននិយាយថា លោក គីម ជុងអ៊ុន បានទទួលការវះកាត់ព្យាបាលសរសៃឈាមបេះដូងកាលពីដើមខែនេះ ដែលបានបណ្តាលមកពីការជក់បារីច្រើន ការធាត់លើសទម្ងន់ និង ការអស់កម្លាំង៕
.jpg&h=97&w=146)
