សម្តេចតេជោប្រតិកម្មជាមួយកសែតវៀតណាមនិងហាមរោងចក្រកុំយកឡេះបិទហើយឈ្មួញកុំតម្លើងថ្លៃ
19-November-2024 / ព័ត៌មានជាតិ
ពោធិ៍សាត់ ៖ ថ្លែងក្នុងពិធីសម្ពោធផ្លូវជាតិលេខ៥៥ នៅស្រុកវាលវែង ខេត្តពោធិ៍សាត់ នៅថ្ងៃទី០៩នាយករដ្ឋមន្ត្រីនៃកម្ពុជានៅថ្ងៃនេះបានប្រតិកម្មខ្លាំងៗទៅនឹងការចុះផ្សាយរបស់ ទីភ្នាក់ងារព័ត៌មាន VNA របស់វៀតណាម ដែលបានផ្សាយថា វៀតណាមបានរឹតត្បិតចំពោះពលរដ្ឋកម្ពុជា ដែលឆ្លងចូលទៅកាន់ប្រទេសវៀតណាម ដើម្បីទប់ស្កាត់ការរីករាលដាលនៃជំងឺកូវីត១៩។
សម្តេចតេជោចាត់ទុកថា ការផ្សព្វផ្សាយបែបនេះ អាចធ្វើឱ្យមានការយល់ច្រឡំចំពោះកម្ពុជា ហើយអាចនឹងបង្កឱ្យមានការខឹងសម្បារ និងតវ៉ាខ្លាំងពីសំណាក់ប្រជាពលរដ្ឋខ្មែរ ដោយសារតែជាការផ្សព្វផ្សាយខុសការពិតមួយ ដែលមិនអាចទទួលយកបានជាដាច់ខាត។«សូម្បីតែថ្ងៃសៅរ៍ និងថ្ងៃអាទិត្យ ខ្ញុំត្រូវតវ៉ាឱ្យរដ្ឋមន្ត្រីការបរទេស តវ៉ាទៅវៀតណាម។ ហេតុអ្វីបានត្រូវការតវ៉ាទៅវៀតណាម មិនមែនទៅរដ្ឋាភិបាលវៀតណាមទេ ប៉ុន្តែសារព័ត៌មាន VNA របស់វៀតណាម បានចុះផ្សាយដ៏អាក្រក់ពីកម្ពុជា ដោយខ្ញុំមិនខ្លាចទេ»។
សម្តេចតេជោ ហ៊ុន សែន បញ្ជាក់ថា «អញ្ចឹងកម្ពុជា ចូលក្នុងចំណាត់ថ្នាក់ដែលត្រូវវៀតណាមដាក់ឱ្យនៅជាមនុស្សចម្លែក អញ្ចឹងខ្ញុំអត់ព្រមទេ ខ្ញុំប្រាប់ ប្រាក់ សុខុន (ប្រមុខការទូតកម្ពុជា) ឱ្យទាក់ទងវៀតណាមភ្លាម»។ សម្តេចបានថ្លែងបន្តថា បើសិនជាសារព័ត៌មាននេះមិនទាន់ដកព័ត៌មាននោះទេ នឹងមានការតវ៉ាកំណត់ទូតទៅវៀតណាម។សម្តេចក៏បានបន្ថែមថា «រឿងនេះវាក្លាយជាបញ្ហា បើសិនជាប្រជាជនកម្ពុជាប្រតិកម្មវិញ ប្រជាជនកម្ពុជាអាចនឹងបិទមិនឱ្យវៀតណាមឆ្លងមកវិញ ប៉ុន្តែបានដោះស្រាយកាលពីម្សិលមិញហើយ»។
របាយការណ៍របស់ស្ថានទូតវៀតណាម ប្រគល់ជូនក្រសួងការបរទេសកម្ពុជា នៅស្ថិតនៅក្នុងពេលមានវិបត្តិកូរ៉ូណាថ្មីនេះ គណៈការពារសុខភាពរបស់វៀតណាម បានណែនាំឱ្យមានការពង្រឹងសុវត្ថិភាពនៃការចេញចូលប្រទេស គ្រប់ជាតិសាស្ត្រទាំងអស់ ប៉ុន្តែបែរជាសារព័ត៌មាន VNA របស់វៀតណាមថា រឹតបន្តឹងចំពោះពលរដ្ឋដែលមកពីអឺរ៉ុប និងកម្ពុជាទៅវិញ ដែលខុសពីអ្វីដែលគណៈការពារសុខភាពរបស់វៀតណាមបានប្រកាស។
ក្រៅពីរឿងកាសែតវៀតណាមសម្ដេចតេជោនាយករដ្ឋមន្ត្រី បានឲ្យដឹងថា មិត្តចិនបានរៀបចំនាវាចំនួន ៧គ្រឿង សម្រាប់ដឹកវត្ថុធាតុដើមយកមកផ្គត់ផ្គង់រោងចក្រ សហគ្រាសនៅកម្ពុជា។ ជាក់ស្ដែង នៅថ្ងៃនេះផ្ទាល់នាវាបានចាប់ផ្ដើមចូលជើងទី១ ថ្ងៃស្អែកចូលជើងទី២ ហើយក្នុងចំណោមនាវាទាំង៧គ្រឿងនេះ មាន ៥គ្រឿង ចូលចតនៅកំពង់ផែក្រុងព្រះសីហនុ ចំណែកនាវា ២គ្រឿងទៀត ចូលចតនៅកំពង់ផែនៅទីក្រុងហូជីមិញ ប្រទេសវៀតណាម។
ការដឹកវត្ថុធាតុដើមនេះ គឺដឹកជញ្ជូនរហូតដល់ខែឧសភា ពោលគឺរហូតដល់សភាពការណ៍ធូរស្រាលឡើងវិញ ដែលនេះជាសញ្ញាវិជ្ជមានបង្ហាញថា ចង្វាក់ផលិតកម្មនៅតាមរោងចក្រ សហគ្រាសនានារបស់កម្ពុជា ជិតបានបើកដំណើរការឡើងវិញហើយ ខណៈការព្យួរការងារកម្មករនិយោជិតនៅបន្តនៅឡើយ។
សម្ដេចតេជោ ហ៊ុន សែន បានលើកជាសំណើចំនួន ៣ចំណុច ដល់ក្រសួង ស្ថាប័ន គ្រឹះស្ថាន និងអង្គភាពពាក់ព័ន្ធ ដើម្បីប្រកាន់នូវការយោគយល់ចំពោះកម្មករនិយោជិតក្នុងដំណាក់កាលលំបាកនេះ ក្នុងនោះរួមមាន៖
ទី១- ម្ចាស់រោងចក្រ សហគ្រាសនានា ក្នុងពេលព្យួរការងាររបស់កម្មករនិយោជិត សូមកុំឆ្លៀតឱកាសលុបកិច្ចសន្យាការងារជាមួយកម្មករ ក្នុងពេលវេលាដែលកម្មករជួបការលំបាក។ សម្ដេចតេជោ ថ្លែងយ៉ាងដូច្នេះថា «សូមឱ្យគោរពឱ្យបានហ្មត់ចត់ ហើយក្រសួងការងារ និងបណ្ដុះបណ្ដាលវិជ្ជាជីវៈ ក៏បានប្រកាសរួចហើយដែរ ហ្ចឹងឆ្លៀតពេលផ្អាកការងារ ឬព្យួរការងារនេះ សូមកុំលុបកិច្ចសន្យាការងារចោល, រឿងនេះកុំឱ្យមានឱ្យសោះ»។
ទី២- ចំពោះគ្រឹះស្ថានមីក្រូហិរញ្ញវត្ថុ និងធនាគារ ត្រូវលើកលែងការប្រាក់សម្រាប់កម្មករដែលត្រូវបានព្យួរការងារ ពីព្រោះពួកគេត្រូវព្យួរការងារហើយ ដូច្នេះគ្រឹះស្ថានមីក្រូហិរញ្ញវត្ថុ និងធនាគារត្រូវពន្យារការសង ឬមិនយកការប្រាក់ក៏រឹតតែល្អ។
សម្ដេចតេជោ បានថ្លែងបន្តថា «អ្នកដែលទទួលរងផលប៉ះពាល់មានមិនដល់ ២០,០០០នាក់ទេ ក្នុងចំណោមនេះអាចថា ៥០% ចុះ ដែលខ្ចីលុយពីធនាគារ និងមីក្រូហិរញ្ញវត្ថុ»។
ប្រមុខរាជរដ្ឋាភិបាលក៏បានបញ្ជាទៅកាន់ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមជាមួយលោក ជា ចាន់តូ ទេសាភិបាលធនាគារជាតិ ត្រូវបើកកិច្ចប្រជុំបន្ទាន់មួយ ពិសេសត្រូវតាមដានត្រួតពិនិត្យការងារនេះឱ្យបានហ្មត់ចត់បំផុត។
ទី៣- ម្ចាស់បុរី ឬម្ចាស់ផ្ទះ ដែលលក់ ឬបង់រម្លស់ផ្ទះឱ្យកម្មករនិយោជិត និងអ្នកធ្វើការនៅតាមសណ្ឋាគារនានា ដែលត្រូវព្យួរការងារដូចគ្នានោះ ក៏សូមយោគយល់ពន្យារពេលសង ឬបង់រម្លស់នេះផង។
ទាក់ទងនិងការព្រួយយបារម្ភពីជម្ងឺកូវិត១៩រហូតនាំគ្នាទៅទិញស្បៀងអាហារទុកម្តេចតេជោ ហ៊ុន សែន បានថ្លែងទៀតថា សម្តេចមិនរារាំងចំពោះការទិញអង្ករ និងគ្រឿងបរិភោគស្តុកទុកនេះទេ ប៉ុន្តែសម្តេចគ្រាន់តែអំពាវនាវដល់អ្នកលក់ កុំដំឡើងថ្លៃទំនិញហួសហេតុ ក្នុងពេលមានតម្រូវការខ្លាំងនោះ៖«ប៉ុន្មានថ្ងៃនេះមានការភ័យខ្លាចច្រើនហួស រហូតដល់អ្នកខ្លះទៅទិញអង្ករ ទិញមីយកមកស្តុក ទិញប៊ីយ៉ាទិញស្រាយកមកស្តុក ក្រែងមិនបានចេញទៅផឹក។
ឥឡូវអីចេះ ចាប់យកយុទ្ធសាស្ត្ររុញទូកបណ្តោយទឹកតែម្តង អង្ករកំពុងតែលក់មិនដាច់ផង កំពុងចុះថោក អីចឹងទេបើបានជាជ្រុលទិញហើយ ទិញតែម្តងទៅព្រោះ៤០០សហគ្រាសដែលជាកន្លែងកិនស្រូវ អង្ករមិនខ្វះទេ សូម្បីតែយើងមិនធ្វើមួយឆ្នាំក៏អត់ទាន់ខ្វះអង្ករហូបនៅក្នុងស្រុកខ្មែរដែរ ហើយគ្រាន់តែអំពាវនាវអ្នកនៅតាមទីផ្សារ កុំដំឡើងថ្លៃជ្រុល»។សម្តេចតេជោ បានចោទសំណួរ ថា «តើការទិញស្តុកទុកនេះ ប្រុងរត់ទៅណា? បើស្រុកកើតសង្គ្រាមទើបការទិញទុកនោះ គឺជារឿងត្រឹមត្រូវ ប៉ុន្តែបច្ចុប្បន្ននេះ តើការទិញនេះប្រុងរត់ទៅណា? បើទៅក៏ដូចតែគ្នា»។
