កោះហៅស្នងការរងនគរបាលខេត្តកណ្តាលមួយរូបចូលតុលាការករណិយ៍បំភាន់មន្ត្រីសុរិយោដី និងប្រើអំពើហិង្សាទៅលើអ្នកកាន់កាប់អចលនវត្ថុ
07-May-2026 / ព័ត៌មានជាតិ
ខេត្តកណ្តាល ៖ លោក សេង រិទ្ធី ព្រះរាជអាជ្ញារង នៃអយ្យការអមសាលាដំបូងខេត្តកណ្តាល បានចេញដិកា កោះហៅ លោកផ្កាយ១ ឈ្មោះ អ៊ុល ប៊ុណ្ណាមកុលាកា ករណីបំភាន់មន្ត្រីសុរិយោដី និងប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត។ នេះបើយោងតាមដីកាកោះ ដែល សារព័ត៌មាន ទទួលបាននៅព្រឹកថ្ងៃទី២០ ខែមេសា ឆ្នាំ២០២២។ ដោយបញ្ជាក់ថា, អញ្ជើញ ៖ ឈ្មោះ អ៊ុល ប៊ុណ្ណា ភេទប្រុស អាយុ៤០ ឆ្នាំ ជនជាតិខ្មែរ សញ្ជាតិខ្មែរជា ជនសង្ស័យ។
ដីការបញ្ជាក់ថាជនសង្ស័យមានទីលំនៅ ៖ ភូមិព្រែកត្រែង សង្កាត់សិល្បៈ ក្រុងតាខ្មៅ ខេត្តកណ្តាល។ ចូលមកកាន់ ៖ អយ្យការអមសាលាដំបូងខេត្តកណ្តាល នៅថ្ងៃទី ២៦ ខែ មេសា ឆ្នាំ២០២២ វេលាម៉ោង ០៨ និង ៣០ នាទីព្រឹក ដើម្បីសាកសួរ ពីដំណើររឿង បំភាន់មន្ត្រីសុរិយោដី និងប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត តាមពាក្យបណ្តឹងរបស់ឈ្មោះ ប៊ុន ចាន់សុទ្ធា កាលពីថ្ងៃទី ១៨ ខែមីនា ឆ្នាំ ២០២២ ។ សូមរំលឹកថា លោកឧត្តមសេនីយ៍ត្រី អុល ប៉ុណ្ណា អតីត ស្នងការរង នគរបាលខេត្តកណ្ដាល ដែលសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចេញលិខិតវិន័យរបស់កងកម្លាំងនគរបាលជាតិជាលើកទីមួយកន្លងទៅនេះ ពិតជាមានភាពមិនប្រក្រតីជាច្រើនក្នុងការបំពេញការងារ។
កន្លងទៅសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេច អនុវត្តវិន័យក្រោមរូបភាព ព្រមានលើកទី១ ចំពោះឧត្តមសេនីយ៍ត្រី អុល ប៊ុណ្ណា អត្តលេខ ៦ ១៧៤៣ អតីតស្នងការរង នៃស្នងការដ្ឋាននគរបាលខេត្តកណ្តាល ។ មូលហេតុ ល្មើសវិន័យរបស់កងកម្លាំងនគរបាលជាតិ ។ សាមីខ្លួនដែលមានឈ្មោះ ត្រូវកែប្រែនូវកំហុសឆ្គងឱ្យបានត្រឹមត្រូវ ។ ក្នុងករណីនៅតែប្រព្រឹត្តផ្ទុយពីការណែនាំទៀតនោះ នឹងចាត់វិធានការតាមវិន័យរបស់កងកម្លាំងនគរបាលជាតិ ។សូមបញ្ជាក់ថា, បុគ្គលខាងលើនេះ ធ្លាប់យកឈ្មោះអ្នកធំទៅប្រើប្រាស់ក្នុងជំនួញរកស៊ីដីធ្លី និងរត់ការផ្សេងៗស៊ីដាច់លុយគេទៀតផង និងបានយករថយន្តពន្លត់អគ្គិភ័យរបស់អង្គភាព ទៅប្រើប្រាស់ជួលឲ្យឯកជន។
ករណីយ៍កោះហៅនេះលោកឧត្តមសេនីយ៍ត្រី អុល ប៊ុណ្ណា ស្នងការរងនគរបាលខេត្តកណ្ដាល បានប្រាប់សារព័ត៌មាន នាល្ងាចថ្ងៃទី២០ ខែមេសា ឆ្នាំ២០២២នេះថា លោកនឹងចូលទៅបំភ្លឺនៅចំពោះមុខ សាលាដំបូងខេត្តពាក់ព័ន្ធជម្លោះដីធ្លីមួយកន្លែង ដែលត្រូវភាគីម្ខាងទៀតប្តឹង ប៉ុន្តែលោកអះអាងថារឿងនេះកើតឡើងយូរហើយជាមួយឈ្មោះ ប៊ុន ចាន់សុធា។លោកឧត្តមសេនីយ៍ត្រីស្នងការរង បានបន្តថា រឿងហេតុដែលគេប្ដឹងខ្លួនទៅកាន់តុលាការខេត្តកណ្ដាល គឺផ្ដើមចេញពីជម្លោះដីធ្លីមួយជាយូរណាស់មកហើយរវាងម្ដាយក្មេក, សាច់ញាតិខាងប្រពន្ធ និងឈ្មោះ ប៊ុន ចាន់សុធា ហើយឈ្មោះ ប៊ុន ចាន់សុធា មានបំណងរំលោភយកដីគ្រួសាររបស់លោក តែដឹងខ្លួនថានឹងចាញ់ ក៏ប្ដឹងម្ដាយក្មេក និងសាច់ញាតិរបស់លោកទៅកាន់តុលាការតែម្តង។
លោក អុល ប៊ុណ្ណា ថ្លែងប្រាប់បន្តថា នៅថ្ងៃទី២០ ខែមេសា ឆ្នាំ២០២២នេះថា លោកមិនទាន់បានទទួលដីកាកោះពីតុលាការនៅឡើយទេ ហើយលោកក៏មិនដឹងរឿងអ្វីដែរ តែលោកនឹងចូលខ្លួនទៅបំភ្លឺចំពោះមុខ តុលាការតាមការកោះហៅ ព្រោះដឹងថា ជម្លោះដីធ្លីរបស់គ្រួសារខាងប្រពន្ធនឹងឈ្នះដោយសារមានឯកសារទិញគ្រប់គ្រាន់ ខណ:ដែលភាគីខាងគេនោះចង់រំលោភយកតែពុំបានសម្រេចក៏ប្ដឹងទៅតុលាការតែម្តង។
លោកស្នើសុំតុលាការខេត្តកណ្ដាល មេត្តាជួយផ្ដល់យុត្តិធម៌ដល់ម្ចាស់ដីពិតប្រាកដ និងសូមចាត់ការចំពោះជនខិលខូចតាមផ្លូវច្បាប់ បើរកឃើញថាមានទោសកំហុស។
