អង្គភាពអ្នកនាំពាក្យរាជរដ្ឋាភិបាល នាំក្រុមអ្នកព័ត៌មានទស្សនកិច្ចនៅចំការ និងរោងចក្រកែច្នៃផ្លែស្វាយនាំចេញ
04-September-2023 / សេដ្ឋកិច្ច
ភ្នំពេញ៖ លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល នៅថ្ងៃទី២០ ខែធ្នូ ឆ្នាំ២០១៩នេះ បានដឹកនាំក្រុមអ្នកព័ត៌មានមកពីតាមស្ថាប័ននានា ចុះទស្សនកិច្ចនៅចំការស្វាយ និងរោងចក្រកែច្នៃផ្លែស្វាយស្ថិតនៅក្នុងខេត្តកំពង់ស្ពឺ។
លោក ផៃ ស៊ីផាន ឱ្យដឹងថាគោលបំណងនៃ ការរៀបចំដំណើរទស្សនកិច្ចរបស់អ្នកព័ត៌មានមកកាន់ចំការស្វាយ និងរោងចក្រកែច្នៃផ្លែស្វាយក្នុងខេត្តកំពង់ស្ពឺ ដើម្បីចូលរួមចំណែកក្នុងកិច្ចផ្សព្វផ្សាយឱ្យបានកាន់តែទូលាយបន្ថែមទៀត ពីសក្តានុពលវិនិយោគនៃដំណាំស្វាយនៅកម្ពុជា ជាពិសេសនៅក្នុងខេត្តកំពង់ស្ពឺ។
ប្រភពីក្រសួងកសិកម្មបានឱ្យដឹងថា នៅកម្ពុជាមានផ្ទៃដីដាំដុះស្វាយជាង ១០ម៉ឺនហិកតា។ ផ្ទៃដីដាំដុះស្វាយច្រើនជាងគេមាននៅក្នុងខេត្តកំពង់ស្ពឺ បាត់ដំបង កំពត និងបន្ទាយមានជ័យ។ លោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទ បានឱ្យដឹងថា ខេត្តកំពង់ស្ពឺមានផ្ទៃដីដាំដុះស្វាយជិត ៥ម៉ឺនហិកតា តែផ្ទៃដីដែលប្រមូលផលស្វាយបានជិត ៤ម៉ឺនហិកតា ស្មើនឹង ៩លានដើម។ ក្នុងខេត្តកំពង់ស្ពឺនេះ ផ្ទៃដីដែលដាំដុះស្វាយបានល្អនោះ មាននៅក្នុងស្រុកភ្នំស្រួច ឱរ៉ាល់ ថ្ពង និងបសេដ្ឋ។ លោកប្រធានមន្ទីរបានឱ្យដឹងដែរថា ខេត្តកំពង់ស្ពឺ មានរោងចក្រសម្រាប់កែច្នៃផ្លែស្វាយចំនួន៤ និងរោងចក្រសម្រាប់វេចខ្ចប់ផ្លែស្វាយចំនួន១។
លោក យឹម ណន ប្រធានមន្ទីរកសិកម្ម បានរៀបរាប់ពីការងារមួយចំនួនដែលមន្ទីរបានជួយអន្តរាគមន៍ទៅដល់អ្នកដាំដុះស្វាយ មានដូចជាការជួយរៀបចំជ្រើសរើសពូជ ការបណ្តុះបណ្តាលពីបច្ចេកទេសដាំដុះ និងការថែទាំជាដើម។ បើទោះបីជាយ៉ាងណាមន្ទីរកសិកម្មជួបបញ្ហាក្នុងការចុះជួយអន្តរាគមន៍ដល់អ្នកដាំដុះស្វាយនៅពេលពួកគាត់ជួបបញ្ហា ដោយសារមន្ត្រីនៅមន្ទីរមានចំនួនតិច។
លោកប្រធានមន្ទីរពាណិជ្ជកម្មខេត្ត បានលើកបង្ហាញពីសកម្មភាពមួយចំនួនរបស់ខ្លួន ដូចជាការចុះទៅពន្យល់ប្រជាពលរដ្ឋពាក់ព័ន្ធនឹងគុណភាពផ្លែស្វាយដែលជាការកំណត់របស់ទីផ្សារក្រៅប្រទេសជាដើម។ តែបើទោះបីជាយ៉ាងណាតាមការរៀបរាប់របស់ប្រធានមន្ទីរពាណិជ្ជកម្ម គឺនៅមានភាពចន្លោះប្រហោង និងខ្វះទំនួលខុសត្រូវមួយចំនួនលើភារកិច្ចរបស់ខ្លួនក្នុងការជួយសម្រួលដល់ការលក់ដូរស្វាយរបស់ប្រជាពលរដ្ឋ។តំណាងរបស់ប្រធានមន្ទីរឧស្សាហកម្ម និងសិប្បកម្ម បានឱ្យដឹងថា ដើម្បីជួយដល់ផលិតកម្មស្វាយខ្លួនបានចុះធ្វើការងារមួយចំនួន ជាពិសេសពាក់ព័ន្ធការត្រួតពិនិត្យទៅលើប្រព័ន្ធទឹកដែលទាញយកទៅប្រើប្រាស់សម្រាប់លាងស្វាយ។
ដោយឡែកផ្នែកអ្នកដាំដុះស្វាយវិញ បើទោះបីថាបច្ចុប្បន្នផ្លែស្វាយរបស់ពួកគេមិនជួបបញ្ហាទីផ្សារយ៉ាងណាក្តី តែក៏នៅប្រឈមបញ្ហាមួយចំនួនផងដែរ ដូចជាខ្វះចំណេះដឹងលើការដាំដុះស្វាយ កង្វះកម្លាំងពលកម្ម កង្វះដើមទុន ការពិបាករកកម្ចីពីគ្រឹះស្ថានហិរញ្ញវត្ថុ ប្រឈមនឹងគ្រោះធម្មជាតិ និងសត្វល្អិតជាដើម។
លោក អ៉ិន ឆាយវ៉ាន ប្រធានសមាគមស្វាយកំពង់ស្ពឺ ដែលមានសមាជិកប្រមាណ ៣៥៣នាក់បានឱ្យដឹងថា ការលក់ស្វាយនាពេលបច្ចុប្បន្នមានទីផ្សារល្អប្រសើរជាងពីមុន។ តែអ្វីដែលនៅប្រឈមការខ្វះដើមទុនសម្រាប់ផលិតស្វាយ និងចំណាយពលកម្មជាដើម។
លោក បានស្នើរាជរដ្ឋាភិបាល គួររៀបចំកញ្ចប់ថវិកាណាមួយ ដើម្បីជួយដល់សហគមន៍ ក៏ដូចជាអ្នកដាំដុះស្វាយ ដើម្បីទ្រទ្រង់ដល់សកម្មភាពរបស់ពួកគេ។
ក្រៅពីជួបមន្ត្រី និងជួបអ្នកដាំដុះស្វាយហើយនោះ លោក ផៃ ស៊ីផាន ក៏បាននាំអ្នកព័ត៌មានទៅជួបភាគីរោងចក្រកែច្នៃផ្លែស្វាយ បឹងកេតផ្លានធីនអ៊ីនដាសស្ទ្រឿល ដែលជារោងចក្រមួយកំពុងកែច្នៃផ្លែស្វាយទៅជាដំណាប់នាំទៅកាន់ទីផ្សារប្រទេសចិន។
លោក ហេង ស្រេង តំណាងរោងចក្រ បានឱ្យដឹងថា ដំណាប់ស្វាយកំពុងមានទីផ្សារខ្ពស់នៅក្នុងប្រទេសចិន ហើយរោងចក្ររកផ្លែស្វាយមកច្នៃជាដំណាប់មិនគ្រប់ទៅតាមផែនការរបស់ខ្លួននោះឡើយ។បើតាមលោក ហេង ស្រេង បានអះអាងថា ក្នុងមួយថ្ងៃរោងចក្ររបស់លោកត្រូវការផ្លែស្វាយចន្លោះពី ១៥០តោន ទៅ ១៨០តោន សម្រាប់ធ្វើដំណាប់ស្វាយ ប៉ុន្តែលោកប្រមូលទិញបានចន្លោះត្រឹមពី ៦០តោន ទៅ១០០តោនប៉ុណ្ណោះក្នុង១ថ្ងៃ។
លោក ហេង ស្រេង បានអំពាវនាវដល់អ្នកដាំដុះស្វាយយកស្វាយទៅលក់ឱ្យក្រុមហ៊ុនរបស់លោក គឺក្រុមហ៊ុនលោកទទួលទិញក្នុងតម្លៃសមរម្យ។
