វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5200 នាក់
ម្សិលមិញ 6359 នាក់
សរុប 14091833 នាក់
ប្រទេសបារាំង ៖លោកប្រ៊ុយណូ ឡឺម៊ែររដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបារាំងនៅថ្ងៃអង្គារ ទី៣ ធ្នូ បានបញ្ចេញប្រតិកម្មតបនឹងរដ្ឋបាលអាមេរិកដែលគំរាមដំឡើងពន្ធលើផលិផលបារាំងមួយចំនួនដែលនាំចូលអាមេរិកដោយព្រមានបកវិញដោយចាត់ទុកទណ្ឌកម្មថ្មីអាមេរិកលើបារាំងជារឿងមិនអាចទទួលយកបាន និងថា បារាំង រួមទាំងអឺរ៉ុបនឹងធ្វើការវាយបកចាស់ដៃលើអាមេរិកវិញ។
មានទឹកប្រាក់ប្រមាណ២ ៤០០លានដុល្លារ ដែលរដ្ឋបាលអាមេរិកអាចទទួលបានពីការដំឡើងពន្ធលើផលិតផលបារាំងមួយចំនួន រួមមាន ស្រា កាបូបដៃ គ្រឿងសំអាង និង Fromage ឬ Cheeseដែលនាំចូលអាមេរិក។ ការគំរាមរបស់រដ្ឋបាលអាមេរិកបានធ្វើនៅរសៀលថ្ងៃចន្ទ ទី២ ធ្នូបានធ្វើឡើង ក្រោយពីអ្នកតំណាងពាណិជ្ជកម្មអាមេរិកចាត់ទុក ច្បាប់ពន្ធ Gafa យកពន្ធលើក្រុមហ៊ុនបច្ចេកវិទ្យាអាមេរិកាំងចំនួន៤ គឺ Google Appel Facebook និង Amazon ថាបានធ្វើឲ្យខូចប្រយោជន៍ដល់ក្រុមហ៊ុនអាមេរិកាំង។« ខ្ញុំនឹងមិនទុកឲ្យបារាំងយកពន្ធលើក្រុមហ៊ុនអាមេរិកាំងទេ » នេះជាការថ្លែងរបស់ប្រធានាធិបតីអាមេរិកលោកដូណាល់ ត្រាំពីទីក្រុងឡុងដ៏ ប្រទេសអង់គ្លេសដែលលោកអញ្ជើញចូលរួមនៅក្នុងជំនួបកំពូលអូតង់។
ជាចម្លើយតប រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោកប្រ៊ុយណូ ឡឺម៊ែរបានបញ្ជាក់ថា ទណ្ឌកម្មថ្មីរបស់អាមេរិកប្រឆាំងបារាំងជារឿងមិនអាចទទួលយកបាន និងថា បារាំង រួមជាមួយអឺរ៉ុបនឹងធ្វើការវាយបកចាស់ដៃវិញ។« គម្រោងទណ្ឌកម្មនេះជារឿងមួយដែលមិនអាចទទួលបានទេ។ វាជាវិធានការដែលមិនសក្តិសមនឹងសម្ព័ន្ធមិត្តម្នាក់សោះ។ វាក៏មិនមែនជាឥរិយាបទដែលគេកំពុងរង់ចាំពីអាមេរិកចំពោះបារាំងដែលជាសម្ព័ន្ធមិត្តដ៏សំខាន់មួយ និងចំពោះអឺរ៉ុប និយាយជាទូទៅទេ។អ្វីៗគឺច្បាស់ណាស់រវាងអាមេរិក និងយើង ខ្ញុំចង់និយាយថាអឹរ៉ុប ប្រសិនបើមានទណ្ឌកម្មថ្មីរបស់អាមេរិក សហភាពអឺរ៉ុបនឹងត្រៀមខ្លួនរួចជាស្រេចដើម្បីវាយបកវិញ។ នេះជាការថ្លែងរបស់លោកប្រ៊ុយណូ ឡឺម៊ែរ។
គួររម្លឹកថា Gafa មកពីពាក្យពេញ Google Appel Facebook និង Amazon ហើយនៅក្នុងច្បាប់ពន្ធ Gafa នេះ រដ្ឋាភិបាលបារាំងបានសម្រេចយកពន្ធដល់កម្រិត ៣% លើប្រាក់ចំណូលដែលក្រុមហ៊ុនអាមេរិកទាំង ៤ រកស៊ីបាននៅក្នុងប្រទេសបារាំង។
សេតវិមានបានប្រកាសថា នៅថ្ងៃសុក្រ លោកដូណាល់ ត្រាំ បាននិយាយពិភាក្សា តាមទូរស័ព្ទ ជាមួយ ប្រធានាធិបតី បារាំង លោកម៉ាក្រុង ពីច្បាប់បារាំង យកពន្ធលើប្រាក់ចំណូលរបស់ក្រុមហ៊ុនបច្ចេកវិទ្យា។ វិមានប្រធានាធិបតី បារាំង នៅថ្ងៃសៅរ៍៣០វិច្ឆិកា បានបញ្ជាក់បន្ថែមថា នៅក្នុងកិច្ចសន្ទនាជាមួយ លោកដូណាល់ ត្រាំ លោកអេម៉ានុយអែល ម៉ាក្រុង បានអះអាងថា ការបង្កើតច្បាប់ យកពន្ធលើប្រាក់ចំណូលរបស់ក្រុមហ៊ុនឌីជីថល ជារឿងផលប្រយោជន៍រួម ប៉ុន្តែ មិនមែនជារឿងរបស់បារាំងតែម្នាក់នោះទេ។ បារាំង ដែលរៀបចំជំនួបកំពូលក្រុមប្រទេសមហាអំណាចឧស្សាហកម្ម G 7នៅខែសីហាខាងមុខ ចង់ឲ្យគេបង្កើតកិច្ចព្រមព្រៀងថ្នាក់អន្តរជាតិមួយ ដើម្បី យកពន្ធលើក្រុមហ៊ុនបច្ចេកវិទ្យា។
លោកដូណាល់ ត្រាំ គំរាមចង់សងសឹក ដំឡើងពន្ធ លើស្រាបារាំង ដោយសារលោកមិនសប្បាយចិត្តនឹងព្រឹទ្ធសភាបារាំង ដែលកាលពី ២សប្តាហ៍មុន បានបោះឆ្នោតអនុម័តច្បាប់ថ្មីមួយ ដើម្បីចាប់តម្រូវឲ្យក្រុមហ៊ុនបច្ចេកវិទ្យាអ៊ីនធ័រនិត ទាំងអស់ ដែលរកចំណូលបាននៅលើទឹកដីបារាំង បង់ពន្ធជូនរដ្ឋបារាំង។
បារាំង គឺជាប្រទេសទីមួយ នៅអឺរ៉ុប ដែលមានច្បាប់របៀបនេះ។ តាមច្បាប់ថ្មី រដ្ឋបារាំងមានសិទ្ធិ ទារពន្ធ ៣% នៃប្រាក់ចំណូលដែលក្រុមហ៊ុនឌីជីថល រកបាន មកពីការផ្សាយពាណិជ្ជកម្ម ពីការលក់ទិន្នន័យលើអ៊ីនធ័រនែត ដើម្បីផ្សាយពាណិជ្ជកម្ម និងការតភ្ជាប់ទិន្នន័យ របស់អ្នកប្រើប្រាស់ នៅតាម គេហទំព័រអ៊ីនធ័រនែតជាដើម។ គេវាយតម្លៃ ច្បាប់ថ្មីនេះ នឹងអនុញ្ញាតឲ្យរដ្ឋបារាំង ប្រមូលពន្ធ បាន ៤០០លានអឺរ៉ូ ក្នុងឆ្នាំនេះ និងអាចឡើងដល់៦៥០លានអឺរ៉ូ នៅឆ្នាំ២០២០។ ក្រុមហ៊ុនបរទេស យ៉ាងហោច ៣០ នឹងអាចជាប់សំណាញ់របស់ច្បាប់បារាំង ក្នុងនោះមានក្រុមហ៊ុនអាមេរិកាំង ធំៗ ដូចជា Google Apple Amazon Facebook ជាដើម។អាមេរិក ជាទីផ្សារដ៏ធំ ស្រូបយក១ភាគបី នៃស្រាបារាំង ដែលនាំចេញទៅបរទេសដូច្នេះការដំឡើងពន្ធ បន្ថែម លើស្រាបារាំង នឹងអាចប៉ះពាល់ដល់ឧស្សាហកម្មផលិតស្រាបារាំង ៕