មេទ័ពខ្មែរវៀតណាមឯកភាពគ្នាថាពេលមានគ្រោះមហន្តរាយកងទ័ពទាំងពីរ អាចចូលក្នុងទឹកដីគ្នា តាមបណ្ដោយព្រំដែនបាន!
ភ្នំពេញ៖ នៅព្រឹកថ្ងៃព្រហស្សតិ៍ ទី៣១ ខែតុលា ឆ្នាំ២០១៩នេះ នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ និង លោក ឧត្តមសេនីយ៍ឯកបម្រុង ផាន វ៉ាន់ហ្សាង (Phan Van Giang) អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការ នៃកងទ័ពប្រជាជនវៀតណាម បានឯកភាពគ្នាក្នុងជំនួបពីភាក្សាឲ្យកងទព័ម្ខាងៗអាចឆ្លងចូលទឹកដីគ្នាបានពេលជួបគ្រោះមហន្តរាយ!។
ក្នុងជំនួប និងកិច្ចប្រជុំពិភាក្សាការងារនាពេលនោះ លោក ឧត្ដមសេនីយ៍ឯកបម្រុង ផាន វ៉ាន់ហ្សាង បានបញ្ជាក់ថា៖ កិច្ចសហប្រតិបត្តិការ រវាងក្រសួងការពារជាតិទាំងពីរ គឺបានប្រព្រឹត្តទៅយ៉ាងល្អប្រសើរ លើការពង្រឹងពង្រីកចំណងទាក់ទង នៃការរឹតចំណងសាមគ្គីភាព មិត្តភាព កិច្ចសហប្រតិបត្តិការ រវាងកងទ័ព និងប្រជាជនប្រទេសទាំងពីរ ពិសេសលើការរៀបចំឲ្យមានការធ្វើសមយុទ្ធរួមគ្នា លើប្រធានបទសង្គ្រោះគ្រោះមហន្តរាយ និងមនុស្សធម៌ សំដៅត្រៀមជាស្រេច ពេលមានគ្រោះមហន្តរាយកើតឡើងជាយថាហេតុ នៅតាមបណ្ដោយព្រំដែន នៃប្រទេសទាំងពីរ ដែលសមយុទ្ធនោះ នឹងប្រព្រឹត្តទៅនៅក្នុងខែធ្នូ ឆ្នាំ២០១៩ខាងមុខ។
លោក បានថ្លែងថា៖ ការថែរក្សាសន្តិសុខ និងសណ្ដាប់ធ្នាប់ តាមបណ្តោយព្រំដែន និងការស្វែងរកអដ្ឋិធាតុ រួមជាមួយនឹងការហ្វឹកហាត់បណ្ដុះបណ្ដាលនាយទាហាន គឺជាប្រការសំខាន់ចាំបាច់បំផុត ដែលកងទ័ពប្រទេសយើងទាំងពីរត្រូវតែផ្ដល់កិច្ចសហការ ជួយគ្នាដូចដែលប្រទេសយើងទាំងពីរធ្លាប់បានធ្វើកន្លងមក ទៅតាមកិច្ចព្រមព្រៀងរបស់ក្រសួងការពារប្រទេស នៃប្រទេសទាំងពីរ។
ឯលោក នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ក៏បាន មានប្រសាសន៍ថា៖ នេះជាការអនុវត្តមួយ ដែលផ្ដល់នូវផលប្រយោជន៍ដល់ប្រជាជនទាំងពីរ នៅពេលដែលមានគ្រោះមហន្តរាយ ជាពិសេសនៅពេលដែលមានភ្លើងឆេះព្រៃ និងមានខ្យល់ព្យុះ ទឹកជំនន់ជាដើម។ លោក បន្តថា៖ ភ្លើងឆេះព្រៃ វាមិនស្គាល់ព្រំដែនទេ ដូច្នេះការអនុវត្តសមយុទ្ធនេះ ត្រូវតម្រូវអោយកងទ័ពកម្ពុជា អាចចូលទៅក្នុងទឹកដីវៀតណាម ហើយកងទ័ពវៀតណាម ក៏អាចចូលមកក្នុងទឹកដីកម្ពុជា តាមបណ្ដោយព្រំដែន ដែលមានបញ្ហាទាំងនោះ ។
ដើម្បីជៀសវាងដល់ការយល់ច្រឡំ និងអោយមានការយល់ដឹងទូលំទូលាយផងនោះ លោកអគ្គមេបញ្ជាការ បានផ្តល់អនុសាសន៍ថា៖ ឲ្យមានសកម្មភាពមនុស្សធម៌ ជាមួយគ្នាក្នុងសមយុទ្ធនោះ គឺភាគីកម្ពុជា អាចចូលទៅជួយសង្គ្រោះ ព្យាបាលប្រជាជនវៀតណាម ហើយភាគីវៀតណាម អាចចូលមកជួយសង្គ្រោះ និងជួយព្យាបាលប្រជាជនកម្ពុជា ដើម្បីត្រៀមនៅពេលមានគ្រោះមហន្តរាយ ហើយក៏អាចជំរុញឲ្យមាន កម្មវិធីដូចជាកីឡា សិល្បៈរួមគ្នាផងដែរ។
លោកនាយឧត្តមសេនីយ៍វង្ស ពិសេន បានស្មើដល់លោក អនុរដ្ឋមន្ត្រីការពារប្រទេស និងជាប្រធានអគ្គសេនាធិការកងទ័ពប្រជាជនវៀតណាម ឲ្យបន្តជួយបណ្ដុះបណ្ដាលធនធានមនុស្សដល់កងយោធពលខេមរភូមិន្ទបន្តទៀត និងជួយផ្ដល់នៃការសាងសង់អាគារសាលប្រជុំមួយកន្លែង ដែលអាចចំណុះមនុស្សបានចំនួន ៥០០ នាក់ នៅក្នុងអគ្គបញ្ជាការដ្ឋាន រួមនឹងការកសាងនូវសំណង់និមិត្តរូប នៃការរឹតចំណងសាមគ្គីភាព មិត្តភាព រវាងប្រទេសទាំងពីរ នៅតាមបណ្ដាខេត្តជាប់ព្រំដែនផងដែរ។ លោក ឧត្តមសេនីយ៍ឯកបម្រុង ផាន វ៉ាន់ហ្សាង បានទទួលយក នូវរាល់សំណើរបស់ភាគីអគ្គមេបញ្ជាការ នៃកងយោធពលខេមរភូមិន្ទ ដើម្បីរាយការណ៍ជូនថ្នាក់ដឹកនាំក្រសួងការពារប្រទេសវៀតណាម ក្នុងការពិនិត្យ នឹងផ្តល់លទ្ធភាព ដោះស្រាយជូនដល់ភាគីមិត្ត នៅពេលដែលលោក និង គណ:ប្រតិភូ និវត្តន៍ទៅដល់ប្រទេសវៀតណាមវិញ៕
