វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4923 នាក់
ម្សិលមិញ 5378 នាក់
សរុប 14084216 នាក់
ថៃ៖ទីភ្នាក់ងារសារព័ត៌មានរ៉យទរ័( Reuters )បានឲ្យដឹងថានៅថ្ងៃអង្គារ ទី២៥ ខែសីហា ក្រុមហ៊ុន ហ្វេសប៊ុក បានប្លុកចោលក្រុមមនុស្សមួយក្រុមដែលមានសមាជិក ១ លាននាក់ នៅក្នុងប្រទេសថៃ ដោសារពិភាក្សាគ្នាអំពីព្រះមហាក្សត្រនិងការទាមទារឲ្យមានការកែរដ្ឋធម្មនុញ្ញដើម្បីកែទម្រងរបបរាជានិយមថៃតាមការទាមទារពីរដ្ឋាភិបាលថៃដែលបានគំរាមថានឹងចាត់វិធានការផ្លូវច្បាប់ ចំពោះការប្រមាថព្រះមហាក្សត្រថៃ ។
ក្រុមហ្វេសប៊ុកដែលមានឈ្មោះថា “ទីផ្សាររាជានិយម” Royalist Marketplace ត្រូវបានបង្កើតឡើងនៅក្នុងខែមេសា ដោយលោកប៉ាវីនចាចាវ៉ាពុង( Pavin Chachavalpongpun)ដែលជាអ្នកសិក្សានិរទេសខ្លួនដែលបានដឹកនាំការរិះគន់របបរាជានិយម ក្នុងប្រទេសថៃ។ កាលពីយប់ថ្ងៃច័ន្ទទី២៤សីហា គេហទំព័ររបស់ក្រុមរិះគន់បានបញ្ចេញសារមួយឲ្យដឹងថា “ការចូលទៅកាន់ក្រុមនេះ ត្រូវបានរឹតត្បិតនៅក្នុងប្រទេសថៃ ដោយយោងតាមសំណើស្របច្បាប់ពីក្រសួងសេដ្ឋកិច្ច និងសង្គម” ។
លោកប៉ាវីន( Pavin) ដែលរស់នៅក្នុងប្រទេសជប៉ុន បាននិយាយថា៖ ក្រុមហ៊ុនហ្វេសប៊ុកបានឱនក្បាលចំពោះសម្ពាធរបស់រដ្ឋាភិបាល ដែលត្រួតត្រាដោយយោធា ។ លោក Pavin បានប្រាប់រ៉យទ័រថា “ក្រុមរបស់យើង គឺជាផ្នែកមួយនៃដំណើរការប្រជាធិបតេយ្យនីយកម្ម ។ វា គឺជាកន្លែងសម្រាប់សេរីភាពនៃការបញ្ចេញមតិ” ។ បន្ទាប់ពីក្រុមជជែកពិភាក្សាខាងលើ ត្រូវបានបិទ មិនបានប៉ុន្មានម៉ោងផង លោក Pavin Chachavalpongpun បានបង្កើតក្រុមថ្មីមួយទៀត ដែលមានឈ្មោះស្រដៀងគ្នា ដោយទទួលបានសមាជិកជាងកន្លះលាននាក់ ក្នុងរយៈពេល ត្រឹមមួយថ្ងៃ។ សកម្មជនដែលកំពុងរស់នៅជប៉ុនរូបនេះ បានប្រាប់ទីភ្នាក់ងារ Reuters យ៉ាងដូច្នេះថា៖ «ប្រសិនបើអ្នកចង់បិទវាម្តងទៀត ខ្ញុំនឹងបង្កើតក្រុមថ្មី មួយទៀត...ដើម្បីលើកកម្ពស់សេរីភាពនៃការបញ្ចេញមតិ ខ្ញុំនឹងធ្វើវាភ្លាម»។
ក្រុមហ៊ុនហ្វេសប៊ុក (Facebook) បាននិយាយនៅថ្ងៃអង្គារនេះថា ខ្លួនគ្រោងនឹងហៅរដ្ឋាភិបាលថៃឲ្យធ្វើការបញ្ជាក់តាមផ្លូវច្បាប់ ក្រោយពេលខ្លួនត្រូវបានបង្ខំឲ្យបិទការចូលក្នុងក្រុមទីផ្សាររាជានិយម (Royalist Marketplace) នៅក្នុងប្រទេសថៃ ដែលក្រុមនេះមានសមាជិកក្នុងហ្វេសប៊ុកចំនួន ១លាននាក់។
អ្នកនាំពាក្យហ្វេសបុកបាននិយាយក្នុងសេចក្តីប្រកាសថា “សំណើរបែបនេះគឺធ្ងន់ធ្ងរ ផ្ទុយពីច្បាប់សិទ្ធិមនុស្សអន្តរជាតិ និងមានឥទ្ធិពលលើសមត្ថភាពរបស់ប្រជាជន ក្នុងការបញ្ចេញមតិរបស់ពួកគេ”។ “ពួកយើងធ្វើកិច្ចការដើម្បីការពារសិទ្ធិរបស់អ្នកប្រើប្រាស់អ៊ីនធឺណិតទាំងអស់ ហើយយើងកំពុងរៀបចំដើម្បីជំទាស់ ផ្នែកផ្លូវច្បាប់លើសំណើនោះ”។
កាលពីសប្តាហ៍មុនក្រសួងបានដាក់ពាក្យបណ្តឹងតាមប្រព័ន្ធអ៊ីនធឺណេតដាច់ដោយឡែកមួយ ប្រឆាំងនឹងលោក Pavin ពីបទបង្កើតក្រុមប្រមាថរបបរាជានិយម ។ ប្រទេសថៃមានច្បាប់ហាមប្រាមការប្រមាថព្រះមហាក្សត្រ ដែលអាចមានទោសជាប់ពន្ធនាគារ រហូតដល់ ១៥ ឆ្នាំ .។
សូមបញ្ជាក់ថានៅថ្ងៃទី២៥ខែសីហា គណៈរដ្ឋមន្ត្រីថៃ បានអនុម័តពន្យារការអនុវត្តច្បាប់គ្រាមានអាសន្នបន្ថែម១ខែទៀត រហូតដល់ថ្ងៃទី៣០ ខែកញ្ញា ដើម្បីទប់ស្កាត់ការឆ្លងរាលដាលកូវីដ-១៩ ល្អបំផុត។ការពន្យារពេលបន្តអនុវត្តច្បាប់គ្រាអាសន្ន គឺជាលើកទី៥ហើយនៅក្នុងប្រទេសថៃ ចាប់តាំងពីច្បាប់នេះត្រូវបានអនុម័តកាលពីខែមីនា ឆ្នាំ២០២០។ លោកAnucha Burapachaisri អ្នកនាំពាក្យរដ្ឋាភិបាលថៃ បានឲ្យដឹងថា ការសម្រេចខាងលើរបស់រដ្ឋាភិបាលគឺបំពេញទៅតាមសំណើរបស់ មជ្ឈមណ្ឌលគ្រប់គ្រង ជំងឺឆ្លង កូវីដ-១៩ (CCSA) ដើម្បីទប់ស្កាត់ស្ថានភាពឆ្លងរាលដាលកាន់តែខ្លាំងឡើង។
កន្លងមកគណៈកម្មការសន្តិសុខជាតិ(NSC)បានយល់ព្រម ពន្យារពេលមួយខែទៀតសម្រាប់ការអនុវត្តច្បាប់គ្រាអាសន្ន ប៉ុន្តែច្បាប់នេះមិនសំដៅទៅលើក្រុមបាតុកម្មពាក់ព័ន្ធនយោបាយនោះឡើយ។