អ្នកណាទួលខុសត្រូវរឿងនាំសម្រាមជាង១ពាន់តោនចូលស្រុកខ្មែរ?គយឬបរិស្ថានប្រហែលគ្មានទេមើលទៅ!?
06-August-2026 / ព័ត៌មានជាតិ
ខេត្តព្រះសីហនុ៖ អគ្គនាយកដ្ឋានគយ និងរដ្ឋាករកម្ពុជា នៅព្រឹកថ្ងៃទី២៩ កក្កដា ឆ្នាំ២០១៩នេះ បានប្រកាសពី ការរៀបចំ ធ្វើសន្និសីទសារព័ត៌មាន នៅវេលាម៉ោង៤រសៀល ថ្ងៃទី៣០ ខែកក្កដា ឆ្នាំ២០១៩ ពាក់ព័ន្ធជាមួយ ការនាំចូលសំរាមចំនួន៨៣កុងតឺន័រមានទម្ងន់ប្រមាណ ១៦០០ តោន ពីបរទេស មកប្រទេសកម្ពុជា ហើយត្រូវសមត្ថកិច្ចបង្ក្រាប បាន នៅកំពង់ផែស្វ័យតខេត្តព្រះសីហនុ។ 
សូមរំលឹកថា កាលពីថ្ងៃទី១៦ ខែកក្កដា ឆ្នាំ២០១៩ ក្រសួងបរិស្ថាន អគ្គនាយកដ្ឋានគយ និងរដ្ឋាករ នៃក្រសួងសេដ្ឋកិច្ច និងស្ថាប័នពាក់ព័ន្ធពិសេសក្រសួងបរិស្ថាន បានសម្រេចគាស់ កុងតឺន័រ៨៣ទូ ដើម្បីពិនិត្យមើលនៅកំពង់ផែ ខេត្តព្រះសីហនុ ក្រោយពីមានការសង្ស័យ និងរកឃើញ សំណល់ប្លាស្ទិកទាំង ៨៣កុងតឺន័រ នៅក្នុងនោះ ដែលជាទំនិញហាមឃាត់ដែលក្រោយមកខាងបរិស្ថានគេថា មានប្រភពមកពីសហរដ្ឋអាមេរិក និងប្រទេសកាណាដា ។
កាលពីថ្ងៃសុក្រទី១៩ កក្កដា ២០១៩នេះ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានប្រាប់កាសែតបរតេសរ៉យទ័រថា ក្រុមហ៊ុនចិន(តែមិនប្រាប់ឈ្មោះថៅកែ) ដែលមានមូលដ្ឋាននៅកម្ពុជា ជាអ្នកនាំចូលកាកសំណល់សំរាមប្លាស្ទិក ៨៣កុងតឺន័រ ទម្ងន់១៦០០តោន ពីសហរដ្ឋអាមេរិក និងកាដាណា នៅកំពង់ផែស្វយ័តក្រុងព្រះសីហនុ ។បើតាមលោក គុណ ញឺម ថាក្រុមហ៊ុនចិននេះមានឈ្មោះថា Chungyuen ។
រដ្ឋាភិបាលនឹងចាត់វិធានការលើក្រុមហ៊ុនដែលនាំចូលសំរាមខាងលើនេះ។ លោក គុណ ញឹម បញ្ជាក់ថា «យើងនឹងផាកពិន័យ ហើយឈានដល់ការបិទក្រុមហ៊ុននោះ ប្រសិនបើស្រាវជ្រាវរកឃើញថា បានប្រព្រឹត្តបទល្មើសធ្ងន់ធ្ងរ »។លោក គុណ ញឺម បានបញ្ជាក់ថា កាកសំណល់សំរាមប្លាស្ទិកទាំង៨៣កុងតឺន័រនេះ បានមកដល់កម្ពុជា ចាប់តាំងពីអំឡុងខែតុលា ឆ្នាំ២០១៨ មកម្ល៉េះ ។ លោក គុណ ញឹម មិនទាន់អាចបញ្ជាក់កាលបរិច្ឆេទបាននៅឡើយទេពីការបញ្ជូនសំរាមត្រឡប់ទៅប្រទេសដើមវិញ ដោយត្រូវធ្វើការតាមនីតិវិធីសិន ។ លោកថា «ត្រូវការពេលវេលា និងនីតិវិធីបន្តិច ហើយសប្ដាហ៍ក្រោយនេះ យើងនឹងកោះហៅក្រុមហ៊ុន ដើម្បីជជែកគ្នាពីការបញ្ជូនសំរាមត្រឡប់ទៅវិញ អាចនឹងឆាប់ៗនេះ» ។
ស្ថានទូតសហរដ្ឋអាមេរិក នៅទីក្រុងភ្នំពេញ បាននិយាយថា ខ្លួនបានដឹងអំពីរបាយការណ៍នេះ ។ បើតាមលោកស្រី Emily Zeeberg អ្នកនាំពាក្យរបស់ស្ថានទូតសហរដ្ឋអាមេរិក បានប្រាប់រ៉យទ័រថា “យើងបានស្នើសុំព័ត៌មានបន្ថែម និងកំពុងផ្តល់ទៅរដ្ឋាភិបាលសហរដ្ឋអាមេរិក ដើម្បីកំណត់ទាំងអ្នកនាំចេញ(ប្រទេសនៃប្រភពដើម) និងអង្គភាពនាំចូលប្រទេសកម្ពុជា” ។ស្ថានទូតកាណាដានៅភ្នំពេញ មិនបានឆ្លើយតបភ្លាមៗទៅនឹងការស្នើសុំពីអ្នកសារព័ត៌មានរ៉យទ័រ ដើម្បីសុំការបំភ្លឺនោះទេ ។លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឲ្យដឹងថា ពួកគេក្លែងឈ្មោះទំនិញដោយដាក់ថា “ផលិតផលកែច្នៃ” ។
សម្ដេចតេជោ ហ៊ុន សែន ប្រមុខរាជរដ្ឋាភិបាល ក្នុងឱកាសអញ្ជើញពិនិត្យ ការដ្ឋានសាងសង់ ពហុកីឡដ្ឋានជាតិ មរតកតេជោ នៅថ្ងៃទី២៩ កក្កដានេះ បានបញ្ជាក់ថា កម្ពុជា នឹងបញ្ជូនសំរាម សំណល់ប្លាស្ទិក ចំនួន៨៣កុងតឺន័រ មានទម្ងន់ ប្រមាណ១៦០០ តោន មានប្រភពមក ពីសហរដ្ឋអាមេរិក និងប្រទេសកាណាដា ដែលជាទំនិញហាមឃាត់ទាំងនេះ ទៅប្រទេសដើមវិញ ព្រោះកម្ពុជា មិនមែនជាធុងសំរាម បោះចោលបច្ចេកវិទ្យា ហួសសម័យទេ។សម្តេចថាវាមិនមែនមានតែស្រុកខ្មែរទេនៅប្រទេសគេក៏មានចឹងដែរ។
បើតាមសម្តីខាងលើគេជឿថានឹងគ្មានអ្នកណាមួយនឹងត្រូវទទួលពិន័យក្នុងករណីយ៍ឃុបឃឹតគ្នាស៊ីញ៉េឲ្យនាំចូលសម្រាមនេះឡើយរាប់តាំងពីមេគយខេត្តព្រះសីហនុខាងក្រសួងបរិស្ថានជាដើម។ខុសពីកាលអំឡុងឆ្នាំ១៩៩៨ សំរាមមានជាតិពុលរ៉ត (Mercury)ប្រមាណ ៣០០០តោន ដែលគេនាំចូលពីតៃវ៉ាន់ចូលមកកម្ពុជា ដោយក្រុមហ៊ុន ហ្វ៊ម៉ូសា (Formosa) លោកអ៊ិនសារឿងដែលទើបឡើងធ្វើជាមេគយបានជាង១ឆ្នាំត្រូវបានដកគ្រវាត់ចោលហើយដាក់លោកប៉ែនស៊ីម៉នជំនួសវិញ។
