តើមានអាថ៌កំបាំងអ្វីនៅពីក្រោយ? ទំនិញគេចពន្ធឆ្លងដែនទៅថៃយ៉ាងរលូន ខណៈសមត្ថកិច្ចប្រចាំការបែរជាបាត់ដានសូន្យឈឹង!

ខេត្តបាត់ដំបង៖កាលពីវេលាម៉ោង ៨:៣០ នាទីយប់ ថ្ងៃទី ២៦ ខែមេសា ឆ្នាំ ២០២៦ ស្ថិតក្នុងភូមិចំការត្រប់ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង មានករណីនាំចេញទំនិញគេចពន្ធ (ស្រាបារី) ឆ្លងដែនទៅកាន់ប្រទេសថៃយ៉ាងអនាធិបតេយ្យ ដោយគេឃើញក្រុមឈ្មួញ និងកម្មករសម្រុកលីជញ្ជូនឆ្លងដែនយ៉ាងរលូនបំផុត។ 

​អ្វីដែលជាចម្ងល់ដ៏ធំ និងជាសំណួររបស់មហាជននោះគឺ៖អវត្តមានសមត្ថកិច្ចជំនាញ៖ នៅចំណុចកើតហេតុ ដែលជាច្រករបៀងស្ថិតក្រោមការគ្រប់គ្រងរបស់ វរសេនាតូចនគរបាលការពារព្រំដែនគោកលេខ ៨១៧ និងវរះ៥៥១តែ បែរជាមិនឃើញមានវត្តមានមន្ត្រីណាម្នាក់មកធ្វើការទប់ស្កាត់ ឬបង្ក្រាបឡើយ។

​កម្លាំងចម្រុះនៅឯណា? បើទោះបីជាបច្ចុប្បន្ន មានការដាក់ពង្រាយកម្លាំង វរសេនាតូចលេខ ៥៥១ ដើម្បីយាមកាមតាមក្រវាត់ព្រំដែនយ៉ាងតឹងរ៉ឹងក៏ដោយ ប៉ុន្តែនៅយប់កើតហេតុ បទល្មើសបែរជាអាចប្រព្រឹត្តទៅបានយ៉ាងចំហរ ហាក់បីដូចជាគ្មានការយាមល្បាតទាល់តែសោះ។មហាជនកំពុងដាក់មន្ទិលសង្ស័យថា តើការបាត់វត្តមានសមត្ថកិច្ចនៅកន្លែងកើតហេតុ ជាយុទ្ធសាស្ត្រ "ធ្វើមិនដឹង មិនឮ" ដើម្បីទុកផ្លូវឲ្យមេឈ្មួញនាំទំនិញចេញដោយសុវត្ថិភាពឬយ៉ាងណា? ចំណែកឯអត្តសញ្ញាណមេឈ្មួញវិញ កម្មករលីសែងហាក់មានការរុញរា និងមិនហ៊ានបង្ហើបឈ្មោះម្ចាស់ទំនិញនោះឡើយ ដែលនេះសបញ្ជាក់ថា ម្ចាស់ទំនិញអាចជាអ្នកមានឥទ្ធិពល ឬមានខ្សែស្រឡាយមិនធម្មតា។

​

អ្នកសារព័ត៌មានបានចុះថតផ្ដិតយករូបភាពផ្ទាល់ និងបានសួរកម្មករលីកទំនិញនៅទីនេះពីអត្តសញ្ញាណនៃម្ចាស់ទំនិញ តែកម្មករនៅទីនោះមិនបានសហការផ្តល់ព័ត៌មានច្បាស់ មកក្រុមការងារព័ត៌មាននោះទេ ។តាមប្រភពដដែលបានឲ្យដឹងថា សកម្មភាពនេះត្រូវបានអនុវត្តដោយក្រុមឈ្នួលដឹកជញ្ជូន ដែលសង្ស័យថាមានការរៀបចំជាប្រព័ន្ធ ដោយធ្វើការនាំទំនិញឆ្លងកាត់ព្រំដែនដោយគ្មានការអនុញ្ញាតពីស្ថាប័នគយ និងអាជ្ញាធរពាក់ព័ន្ធ។ ទំនិញដែលត្រូវបាននាំចេញមិនទាន់មានការបញ្ជាក់ច្បាស់លាស់អំពីប្រភេទ ប៉ុន្តែអាចជាទំនិញដែលគេចវេសការបង់ពន្ធ ឬជាទំនិញដែលត្រូវការការត្រួតពិនិត្យពិសេសតាមច្បាប់។បើសកម្មភាពនេះពាក់ព័ន្ធនឹងការដឹកជញ្ជូនទំនិញខុសច្បាប់ ឬទំនិញហាមឃាត់ នោះអ្នកពាក់ព័ន្ធអាចត្រូវទទួលទោសតាមផ្លូវច្បាប់ មកដល់ពេលម៉ោងផ្សាយនេះ មិនទាន់មានសេចក្តីបញ្ជាក់ផ្លូវការពីស្ថាប័នពាក់ព័ន្ធអំពីការចុះបង្ក្រាបមេឈ្មួញ ឬការឃាត់ខ្លួនជាក់លាក់នៅឡើយទេ។