សកម្មបង្ក្រាបបទល្មើសនេសាទនៅកំពង់ធំសកម្មតែចាប់មិនដែលបានអ្នកប្រព្រឹត្ត!

កំពង់ធំ៖ នៅថ្ងៃទី១៩ ខែកញ្ញា ឆ្នាំ២០២៦ មន្ត្រីជំនាញរដ្ឋបាលជលផល សហការជាមួយកម្លាំងចម្រុះក្នុងខេត្តកំពង់ធំ បានចុះប្រតិបត្តិការទប់ស្កាត់ និងបង្ក្រាបបទល្មើសជលផលនៅតាមតំបន់គោលដៅមួយចំនួនជាលទ្ធផលបង្ក្រាបបានចំនួន ៣ករណី រុះរើបំផ្លាញចោលឧបករណ៍ខុសច្បាប់ជាច្រើន និងបានចាក់លែងត្រីចម្រុះជាង ២១០គីឡូក្រាមចូលទៅក្នុងប្រភពទឹកធម្មជាតិវិញ។ 

​ប្រតិបត្តិការជាបន្តបន្ទាប់នៅតាមបណ្តាស្រុក រួមមាន៖​ស្រុកស្ទោង៖ លោក គន ចាន់សីហា នាយសង្កាត់រដ្ឋបាលជលផលស្ទោង បានដឹកនាំមន្ត្រីកិច្ចសន្យា សហការជាមួយលោកអនុសេនីយ៍ឯក លុយ សុភាព នាយទាហានថ្នាក់ដឹកនាំតំបន់ប្រតិបត្តិការសឹករងកំពង់ធំ (យោធភូមិភាគទី៤) និងកម្លាំងចម្រុះ ចុះបង្ក្រាបបទល្មើសនេសាទនៅចំណុចចាប់ពីត្រពាំងប្រាសាទ ដល់រហាលព្រួល ស្ថិតក្នុងឃុំប្រឡាយ ស្រុកស្ទោង ជាប់ព្រំប្រទល់ឃុំល្វែងឫស្សី ស្រុកជីក្រែង ខេត្តសៀមរាប។ ក្នុងប្រតិបត្តិការនេះ កម្លាំងសម្រេចបាន ១ករណី ដោយបានរុះរើ និងកាប់បំផ្លាញចោលនូវឧបករណ៍នេសាទខុសច្បាប់រួមមាន៖ របាំងស្បៃមុង ២៥របាំង (ប្រវែង ១,១៥០ម៉ែត្រ), ឡុក ២៥គ្រឿង, លូ/លប ៣៦មាត់, បង្គោលឈើ ៥០ដើម និងបានចាក់លែងត្រីចម្រុះប្រមាណ ១៥០គីឡូក្រាមចូលក្នុងប្រភពទឹកវិញ។

​ស្រុកសន្ទុក៖ លោក អ៊ន ហ៊ាន់ នាយសង្កាត់រដ្ឋបាលជលផលសន្ទុក បានចូលរួមជាមួយក្រុមការងារទីបញ្ជាការស្រាលស្រុកសន្ទុក និងគណៈកម្មការសហគមន៍នេសាទបឹងក្របីខ្ចក់ និងតាមុនមានលាភ ចុះបង្ក្រាបនៅចំណុចខាងកើតវត្តទួលពង្រ និងបឹងរលំ ព្រំប្រទល់ក្រុងស្ទឹងសែន ស្ថិតក្នុងឃុំកកោះ ស្រុកសន្ទុក។ ប្រតិបត្តិការនេះ បង្ក្រាបបាន ១ករណី រុះរើបំផ្លាញចោលរបាំងស្បៃមុង ១២របាំង (ប្រវែង ៥៥០ម៉ែត្រ), ឡុក ១២គ្រឿង, លូ ១២មាត់, បង្គោល ៤៥០ដើម និងរំដោះត្រីចម្រុះបានប្រមាណ ៥០គីឡូក្រាម។

​ស្រុកតាំងគោក៖ លោក កែវ សុឃឿន មន្ត្រីសង្កាត់រដ្ឋបាលជលផលបារាយណ៍ ប្រចាំស្រុកតាំងគោក បានសហការជាមួយកម្លាំងទីបញ្ជាការស្រាលកោះរះ ចុះទប់ស្កាត់បទល្មើសជលផលនៅចំណុចព្រែកទាល់ ក្តាមពង និងស្វាខ្មៅ ស្ថិតក្នុងឃុំស្រឡៅ ស្រុកតាំងគោក។ ជាលទ្ធផល បង្ក្រាបបាន ១ករណី ដោយបានរុះរើបំផ្លាញចោលរបាំងស្បៃមុង ៨របាំង (ប្រវែង ២៨០ម៉ែត្រ), ឡុក ៨គ្រឿង, លប លូ ៨មាត់, បង្គោល ៩៥ដើម និងចាក់លែងត្រីចម្រុះប្រមាណ ១០គីឡូក្រាម។

​ទោះបីជាយ៉ាងណាជុំវិញប្រតិបត្តិការបង្ក្រាបខាងលើនេះ ប្រជាពលរដ្ឋរស់នៅក្នុងតំបន់បានសម្តែងការមិនពេញចិត្ត និងបានរិះគន់ធ្ងន់ៗទៅលើសមត្ថកិច្ចពាក់ព័ន្ធ។ប្រជាពលរដ្ឋបានលើកឡើងថា ការចុះបង្ក្រាបកន្លងមក ឃើញតែសមត្ថកិច្ចកាប់បំផ្លាញ និងរុះរើឧបករណ៍នេសាទចោលប៉ុណ្ណោះ ប៉ុន្តែមិនដែលឃាត់ខ្លួន ឬចាប់បានជនល្មើសមកផ្តន្ទាទោសតាមច្បាប់បានសូម្បីតែម្នាក់។

​ប្រជាពលរដ្ឋបានចោទសួរដោយមន្ទិលសង្ស័យថា «តើមានអ្វីនៅពីក្រោយខ្នងនៃបទល្មើសទាំងនេះ?» ព្រោះឧបករណ៍នេសាទខុសច្បាប់ទ្រង់ទ្រាយធំទាំងនោះ មិនមែនតាំងឡើងតែមួយថ្ងៃ ឬពីរថ្ងៃនោះទេ ហើយបើសមត្ថកិច្ចចាប់បានតែឧបករណ៍ ប៉ុន្តែឱ្យជនល្មើសរួចខ្លួនរហូតបែបនេះ វាឆ្លុះបញ្ចាំងពី «អសមត្ថភាព ឬគ្មានប្រសិទ្ធភាពក្នុងការអនុវត្តច្បាប់»។