តាមទាន់ប្តីស្រាតនៅលើគ្រែជាមួយសាហាយប្តឹងប៉ូលិសឲ្យចាប់ខ្លួននិងសុំសម្តេចហ៊ុនសែនដេញចេញពីតួនាទីជាមន្ត្រី
21-September-2026 / សន្តិសុខសង្គម
ខេត្តរតនគិរី ៖តាមទាន់ប្តីកំពុងរួមរ័កជាមួយស្រីសាហាយទាំងអាក្រាតកាយកាលពីថ្ងៃទី១៣ ខែកក្កដា ឆ្នាំ២០១៩ ប្រពន្ធដើម ប្តឹងសមត្ថកិច្ចឱ្យចាប់ខ្លួនប្តី ព្រមទាំងបានស្នើសុំ នាយករដ្ឋមន្ត្រី អនុវត្តនូវអភិក្រមទី៥គឺដេញចេញពីតួនាទីនៅមន្ទីរសាធារណការ និងដឹកជញ្ជូនខេត្តរតនៈគីរី។
អ្នកស្រីពួយ ច័ន្ទសុគុណដែលត្រូវជាប្រពន្ធដើម បានសរសេរក្នុងហ្វេប៊ុកថា “សូមគោរពជូនសម្តេចតេជោនាយករដ្ឋមន្ត្រី នៃព្រះរាជាណាច្រកកម្ពុជា និងសម្តេចកិត្តិព្រឹទ្ធបណ្ឌិត មេត្តាជួយរកយុត្តិធម៌ដល់នាងខ្ញុំពួយ ច័ន្ទសុគុណ ដែលត្រូវបានលោកទុន ដារ៉ា ជាប្តី គឺជាអនុប្រធានការិយាល័យគណនេយ្យ នៃមន្ទីរសាធារណការ និងដឹកជញ្ជូន ខេត្តរតនគិរី បានផិតក្បត់លួចមានប្រពន្ធមួយទៀតឈ្មោះនុត សុគន្ធផាន់នី។
តាំងពីលួចមានប្រពន្ធថ្មី បានធ្វើបាបគ្រប់បែបយ៉ាងទាំងផ្លូវកាយនិងចិត្ត ថែមទាំងគំរាមសម្លាប់មកលើនាងខ្ញុំនិងកូន និងស្រីសហាយជេរប្រមាថ ដល់រូបនាងខ្ញុំនិងកូនគ្រប់ពេលវេលា។ អាស្រ័យដូចនេះ នាងខ្ញុំសូមសម្តេចពុក សម្តេចម៉ែ មេត្តាជួយផ្តល់យុត្តិធម៌ និងសុំសម្តេចអនុវត្តអភិក្រមទីប្រាំ (វះកាត់) ស្នើដកតំណែងលោកទុន ដារ៉ា និងបញ្ឈប់ពីមន្ត្រីរាជការ និងសុំអនុវត្តច្បាប់ចំពោះលោកទុន ដារ៉ា ដោយក្តីអនុគ្រោះដ៏ខ្ពង់ខ្ពស់បំផុត។
នៅថ្ងៃនោះតាមបណ្តឹងប្រពន្ធដើមនិងតាមច្បាប់ឯកពន្ធភាពប៉ូលិសក្រុងបានលុង បានឃាត់ខ្លួនឈ្មោះទុន ដារ៉ា ជាប្រធានការិយាល័យគណនេយ្យនៃមន្ទីរសាធារណការនិងដឹកជញ្ជូនខេត្តរតនគិរី និងជាអតីតមន្ត្រីបម្រើការនៅមន្ទីរសាធារណការនិងដឹកជញ្ជូនខេត្តស្ទឹងត្រែង ពាក់ព័ន្ធករណីលួចមានស្នេហាត្រីកោណខណៈខ្លួនមានប្រពន្ធនិងកូនពីរនាក់នៅក្នុងបន្ទុករួចទៅហើយ ។
អ្នកស្រីពួយ ច័ន្ទសុគុណ ត្រូវជាប្រពន្ធលោកទុន ដារ៉ា បានប្រាប់សមត្ថកិច្ចថា ប្តីរបស់គាត់តែងតែចូលចិត្តទៅរកស្រីនៅក្រៅផ្ទះ ភ្លេចប្រពន្ធនិងកូនជាយូរឆ្នាំកន្លងមកហើយ គឺចាប់ពីអំឡុងឆ្នាំ២០១១ កាលនៅឯខេត្តស្ទឹងត្រែង។ កាលណោះ ប្តីនេះបានសន្យានៅចំពោះមុខសមត្ថកិច្ចថា នឹងកែខ្លួនធ្វើជាប្តីល្អព្រមមករួមរស់ កសាងអនាគតជាមួយប្រពន្ធនិងកូនវិញ ហើយគេក៏ឱ្យគាត់បោះបង់ការងារជាគ្រូបង្រៀន រួចនាំគាត់និងកូនមករួមរស់នៅខេត្តរតនគិរី ដោយសង្ឃឹមថា គេមិនផិតក្បត់គាត់ទៀតទេ។
ប៉ុន្តែក្រោយមកប្តីបានផិតក្បត់គាត់ដដែល គឺទៅមានស្រីលួចលាក់នៅភូមិថ្មដា សង្កាត់បឹងកន្សែង ក្រុងបានលុង លែងខ្វល់ជាមួយក្រុមគ្រួសារ។ លុយកាក់ដែលរកបាន រួមនិងប្រាក់ខែ គេមិនបានយកមកចិញ្ចឹមប្រពន្ធកូនជាងបីឆ្នាំមកហើយ ពេលសួរនាំពីរឿងនេះគេតែងតែគំរាមប្រើអំពើហិង្សាមកលើគាត់ជាប្រពន្ធ។ គាត់ស៊ូទ្រាំខាំមាត់ សង្កត់ចិត្តឱបទុក្ខជាច្រើនឆ្នាំ មិនបានលែងលះឬតតាំងនឹងប្តីឡើយ ព្រោះដើម្បីអនាគតកូនទាំងពីរនាក់។
ដោយសារអត់ទ្រាំលែងបាន ទើបនៅព្រឹកថ្ងៃទី១៣ ខែកក្កដា ឆ្នាំ២០១៩ គាត់ក៏បានសម្រេចប្តឹងទៅប៉ូលិសក្រុងបានលុង ឱ្យចាប់ប្តីកំហូចនោះរួមនិងស្រីសហាយ ទៅអធិការដ្ឋានក្រុងបានលុង ដើម្បីសាកសួរតាមច្បាប់ បន្ទាប់ពីគាត់តាមទាន់ឃើញផ្ទាល់នឹងភ្នែក ពួកគេកំពុងដេកឱបរួមរ័កគ្នាទាំងអាក្រាតកាយនៅលើគ្រែ។លោកស៊ុន ប៉ូលីន ប្រធានមន្ទីរសាធារណការនិងដឹកជញ្ជូនខេត្តរតនគិរី បានបញ្ជាក់ថា ករណីលោកទុន ដារ៉ា ប្រធានការិយាល័យគណនេយ្យនៃមន្ទីរសាធារណការនិងដឹកជញ្ជូនខេត្ត ដែលប៉ូលិសបានឃាត់នោះគឺជារឿងផ្ទាល់ខ្លួន មិនជាប់ពាក់ព័ន្ធជាមួយអង្គភាពឡើយ។
លោកតេង សាវុធ អធិការរងក្រុងបានលុងបានបញ្ជាក់ថាជនសង្ស័យឈ្មោះទុន ដារ៉ា បានទទួលស្គាល់ថាខ្លួនពិតជាមានស្រីថ្មីមែនដោយសារតែខ្លួនមិនអាចនៅរួមរស់ជាមួយប្រពន្ធដើមបានតទៅទៀត។ ឯភាគីខាងស្រីឈ្មោះនុត សុគន្ធផានី ដែលគេអះអាងជាសហាយស្មន់នោះបានសារភាពថានាងបានស្រលាញ់លោកទុន ដារ៉ា មែនដោយសារបុរសរូបនោះប្រាប់ថាខ្លួនជាបុរសពោះម៉ាយនិងមានលិខិតបញ្ជាក់ពីចៅសង្កាត់បឹងកន្សែង ទើបនាងជឿហើយទទួលយកធ្វើជាប្តីរស់នៅជាមួយគ្នាតែម្តង។
នៅថ្ងៃទី១៤ ខែកក្កដា ឆ្នាំ២០១៩ អ្នកស្រីពួយ ច័ន្ទសុគុណ បានសរសេរក្នុងហ្វេសប៊ុកថា “កូនអើយកូន មិនអាណិតទ្រូងម្តាយទេអី ប្តីមានស្រីហើយ កូនក៏ឈឺ លុយក៏គ្មាន នេះហើយទុក្ខប្រពន្ធ ប្តីលួចមានស្រី”។
