វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1036 នាក់
ម្សិលមិញ 10264 នាក់
សរុប 14140218 នាក់
ភ្នំពេញ៖ក្រសួងសង្គមកិច្ចបានឲ្យដឹងថា អាជ្ញាធរបានសម្រេចបិទខ្ទប់ទីតាំងសមាគមជាបណ្តោះអាសន្ន ដើម្បីបង្ការការរាលដាលជំងឺកូវីដ-១៩។លោកឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ បានប្រាប់វិទ្យុបារាំងថា ក្រសួងសង្គមកិច្ចនិងអាជ្ញាធររាជធានីបានចុះទៅធ្វើការបិទខ្ទប់ទីតាំងសមាគមតន្រីសំនៀងជនពិការ ដើម្បីឲ្យក្រុមគ្រូពេទ្យរៀបចំថ្នាំនិងរៀបចំស្បៀងអាហារចូលទៅព្យាបាលជនពិការទាំងនោះដល់ទីតាំងផ្ទាល់តែម្តងបន្ទាប់ពីបានឆ្លងកូវីត។
លោកចាប តូ ប្រធានសមាគមតន្ត្រីសំនៀងជនពិការបានឲ្យដឹងថា៖ក្នុងចំណោមជនពិការភ្នែកដែលរកឃើញវិជ្ជមានកូវីដ-១៩នៅក្នុងសមាគម មានអាយុចាប់ពី៤៥ឆ្នាំចុះក្រោម ដោយរួមមានកុមារចំនួន២រូប ស្ត្រីមានផ្ទៃពោះ១រូប អ្នកមានជំងឺបេះដូង១រូប និងអ្នកមានជំងឺសរសៃប្រសាទចំនួន២រូប។ ក្រៅពីជនពិការភ្នែកទាំង៣៧នាក់នេះ អ្នកដែលរស់នៅក្នុងសមាគមនិងជនពិការភ្នែកផ្សេងទៀតចំនួន២៧នាក់ក៏បានធ្វើតេស្តសំណាករកវីរុសកូវីដ-១៩ដូចគ្នា តែលទ្ធផលអវិជ្ជមាន។ លោកចាប តូ ថា អ្នកទាំង២៧នាក់រួមមានទាំងរូបលោកផង ក៏ត្រូវរង់ចាំការធ្វើតេស្តជាលើកទី២ និងលើកទី៣បន្តទៀត។
បើតាមលោកចាប តូ ការរកឃើញវិជ្ជមានកូវីដ-១៩ទៅលើជនពិការភ្នែកទាំង៣៧នាក់នេះ នៅមិនទាន់រកប្រភពចម្លងច្បាស់លាស់នៅឡើយ ខណៈដែលពួកគេរកឃើញវិជ្ជមានកូវីដ-១៩ចាប់តាំងពីថ្ងៃសុក្រទី៩កក្កដាមក ហើយជាស្ថានភាពបច្ចុប្បន្នជនពិការភ្នែកដែលវិជ្ជមានកូវីដ-១៩មួយចំនួនមានសភាពធូរស្រាលខ្លះៗហើយ ដោយសារតែពួកគេទាំងនោះសុទ្ធតែបានចាក់វ៉ាក់សាំងការពារជំងឺកូវីដ-១៩ចំនួន២ដូសទាំងអស់។
លោកឯម ច័ន្ទមករា អះអាងថាកន្លងមកក្នុងបរិបទជំងឺកូវីដ-១៩ ក្រសួងសង្គមកិច្ច និងអគ្គលេខាធិការក្រុមប្រឹក្សាសកម្មភាពជនពិការ ព្រមទាំងស្ថាប័នពាក់ព័ន្ធមួយចំនួន បានព្យាយាមផ្តល់ជាជំនួយជាច្រើនដល់បណ្តាជនពិការនៅទូទាំងប្រទេស។ ក្រៅពីនេះ ក៏បានជួយសម្របសម្រួលជនពិការទាំងនោះឲ្យបានទទួលវ៉ាក់សាំងបង្ការការឆ្លងនៃជំងឺកូវីដ-១៩ដូចគ្នា ដោយជាតួលេខមានប្រមាណ៥ទៅ៦ពាន់នាក់ក្នុងរាជធានីភ្នំពេញ។
គួរបញ្ជាក់ជូនថា បើតាមរបាយការណ៍របស់ក្រសួងសង្គមកិច្ចអតីតយុទ្ធជន និងយុវនីតិសម្បទា បច្ចុប្បន្នកម្ពុជាមានជនពិការនៅទូទាំងប្រទេសប្រមាណ៦០ម៉ឺននាក់ ដោយរាប់ទាំងអ្នកពិបាកផ្នែកផ្លូវកាយ និងផ្លូវចិត្ត៕