វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1190 នាក់
ម្សិលមិញ 4563 នាក់
សរុប 14168566 នាក់
កំពង់ធំ៖ប្រជាពលរដ្ឋរងគ្រោះ ១៩ គ្រួសាររស់នៅក្នុងឃុំចំណាលើស្រុកស្ទោងខេត្តកំពង់ធំ បានលើកដៃសំពះ សូមសំណូមពរដល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន មេត្តាជួយអន្តរាគមន៍សុំសិទ្ធិច្រូតកាត់និងប្រមូលផលស្រូវប្រាំងនៅលើផ្ទៃដីចំនួន ៥៧ ហិកតានិង ៣០អា!ដែលលោកគាំ សារឿន រារាំងមិនអោយច្រូតដោយយកលេសថាបានជំពាក់លុយគាត់។
តើជាការពិតដែរឬទេ?ប្រភពព័ត៌មានពីប្រជាពលរដ្ឋរាយការណ៍មកថា លោកគាំ សារឿន អាងអំណាចជាទីប្រឹក្សារបស់សម្ដេចក្រឡាហោម ស ខេង ដែលត្រូវគេអះអាងថា ជាថៅកែអាងទឹកស្ថិតនៅក្នុងតំបន់ ២ និងតំបន់ ៣ កំពុងកៀបសង្កត់ និងជិះជាន់កម្លាំងញើសឈាមរបស់ប្រជាពលរដ្ឋស្លូតត្រង់ សអ់រយៈពេលជាង៨ឆ្នាំមកហើយ។
ប្រជាពលរដ្ឋអះអាងថាថៅកែអាងទឹកឈ្មោះ គា៓ សារឿន មានតួនាទីជាទីប្រឹក្សារបស់សម្ដេចក្រឡាហោម ស ខេង រូបនេះបានបញ្ជាឲ្យកូនចៅនិងបក្ខពួករបស់ខ្លួនជាពិសេសឱ្យឈ្មោះលោក ខាត់ ភាគ អតីតក្រុមប្រឹក្សាឃុំ កាងនិងធ្វើទុក្ខបុកម្នេញប្រជាពលរដ្ឋស្លូតត្រង់ អស់រយៈពេល ៨ ឆ្នាំកន្លងមកហើយ ក្រុមប្រជាពលរដ្ឋខាងលើបន្តថា ថៅកែអាងទឹករូបនេះ រកស៊ីផ្ដាច់មុខដោយមិនឲ្យគ្រឿងចក្រពីខាងក្រៅចូលមកភ្ជួរឬក៏ច្រូតកាត់នោះឡើយ។
កាលនៅក្នុងអំឡុងឆ្នាំ ២០១៥ លោកថៅកែរូបនេះធ្លាប់បានធានាជាមួយប្រជាពលរដ្ឋថាឱ្យមានទឹកដាក់ក្នុងប្រឡាយមេគ្រប់គាន់ សម្រាប់ឲ្យប្រជាពលរដ្ឋមានទឹកសម្រាប់បូមដាក់ស្រែ ប៉ុន្តែមិនបានធ្វើតាមការសន្យានោះទេ ថៅកែរូបនេះបានកំណត់យកកំរៃទាំងភ្ជួរនិងថ្លៃទឹកក្នុងមួយហិចតារហូតដល់ទៅ ៧៥ ម៉ឺនរៀល ហើយប្រសិនបើប្រជាពលរដ្ឋណាមួយមិនបានបង់លុយជាមុននោះទេ គឺគាត់តម្រូវឲ្យបង់លុយ១លានរៀល!.។ ដោយឡែកថ្លៃច្រូតកាត់នោះគាត់យកតម្លៃ ២២ម៉ឺនរៀលទៀត ហើយត្រូវបង់លុយមុននិងធ្វើកិច្ចសន្យាផ្តិតមេដៃទៀតផង។
ប្រជាបលរដ្ឋថាសព្វថ្ងៃនេះក្រុមនាយទុនខាងលើមិនឲ្យប្រជាពលរដ្ឋប្រមូលផលស្រូវនោះទេ មិនតែប៉ុណ្ណោះបានធ្វើការគំរាមកំហែង បើអ្នកណាហ៊ានតវ៉ា ពួកគេនឹងប្ដឹងទៅស្ថាប័នតុលាការដើម្បីរឹបអូសដកយកដីធ្លី ក្រោមកិច្ចសន្យាជំពាក់ប្រាក់ថៅកែរូបនេះរាប់រយលានរៀល តាមការពិតមិនមានប្រជាពលរដ្ឋណាមួយជំពាក់លុយក្រុមនាយទុនខាងលើនោះទេ។
ប្រជាចននៅក្នុងស្រុកស្ទោងនៃខេត្តកំពង់ធំ ដែលបានដឹងរឿងរ៉ាវមួយនេះ បានលើកឡើងជាសំណួរថា អាងទឹកខាងលើ ស្ថិតនៅក្នុងតំបន់ ២ និងតំបន់ ៣ ដែលគ្រប់គ្រងដោយរដ្ឋបាលជលផលនិងធនធានទឹកប្រមុខរដ្ឋាភិបាលបានដកហូតពីក្រុមឈ្មួញដោយទុកឲ្យប្រជាពលរដ្ឋប្រើប្រាស់និងអាស្រ័យផល កាលនោះក៏មានថ្នាក់មន្ត្រីរាជការមួយចំនួនក្នុងខេត្តក៏ត្រូវមានទោសទណ្ឌដោយសារតែមានការឃុបឃិតគ្នាបើកឲ្យក្រុមឈ្មួញជីកអាងទឹកនេះផងដែរ។ ក្រោយមកស្រាប់តែលេចចេញឈ្មោះ គាំ សារឿន ដែលគេអះអាងថាជាទីប្រឹក្សារបស់សម្ដេចក្រហោមមកអះអាងថារូបគាត់ជាម្ចាស់អាងទឹកនេះទៅវិញ ?។
មតិរបស់មហាជនបន្តរិះគន់ថា ដោយអំណាចទឹកប្រាក់និងអំពើពុករលួយមានលក្ខណៈជាប្រព័ន្ធ បានធ្វើឲ្យប្រជាពលរដ្ឋរងគ្រោះទឹកភ្នែក ហើយកាន់តែក្រទៅ ក្រទៅ អ្នកខ្លះត្រូវចំណាក់ស្រុកទៅរកការងារធ្វើដោយខុសច្បាប់នៅឯប្រទេសថៃទៀតផង។
តើត្រង់ណាទៅ ដែលថាមន្ត្រីជាអ្នកបម្រើរាស្ត្រ មិនមែនជាចៅហ្វាយរាស្ត្រនោះ?យោងតាមទង្វើសាហាវយុងឃ្នងដែលពួកគេបានប្រព្រឹតទៅលើប្រជាពលរដ្ឋបែបនេះ សញ្ជាក់អោយឃើញថា ពួកគេពិតជាមិនខ្លាចអភិក្រមទាំង ៥ ចំណុច របស់ប្រមុខរដ្ឋាភិបាល សម្ដេចតេជោ ហ៊ុន សែន ពិតមែនឬទេ? ។
មហាជនលើកឡើងបន្តថា ដោយសារតែហេតុផលជាច្រើនករណី និងភាពទន់ខ្សោយរបស់អាជ្ញាធរខេត្តផងនោះ និងដោយយល់ថាអាជ្ញាធរខេត្ត ដោះស្រាយមិនចេញផងនោះ ទើបប្រជាពលរដ្ឋអស់ជំនឿ ហើយស្នើសុំអង្វរយ៉ាងទទូចតាមរយៈសារព័ត៌មានអោយជួយផ្សព្វផ្សាយដើម្បី សូមសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មេត្តាជួយអន្តរាគមន៍អោយប្រជាពលរដ្ឋសុំសិទ្ធិច្រូតនិងប្រមូលផលស្រូវប្រាំងនៅលើផ្ទៃដីចំនួន ៥៧ ហិកតានិង ៣០អា! ។ ប្រជាពលរដ្ឋសង្ឃឹមថា ជានិច្ចជាកាលសម្ដេចទាំងទ្វេរតែងតែ គិតពីសុខទុក្ខរបស់ប្រជាពលរដ្ឋ ដែលសម្ដេចជាអ្នកដឹកនាំប្រកបដោយគតិបណ្ឌិត និងប្រកបដោយគុណធម៌ (ទុក្ខលំបាកប្រជារាស្ត្រគឺជាទុក្ខលំបាករបស់សម្ដេច) ។