ម្តាយនិងទារកក្នុងផ្ទៃបានស្លាប់បាត់បង់ជីវិតគួរឲ្យអាណោចអាធ័មនៅក្នុងមណ្ឌលសុខភាពព្រៃខ្មែរដោយសារឆ្មបអន់គ្មានសមត្តភាព!!!
21-September-2026 / សុខភាពនិងកីឡា
កំពង់ឆ្នាំង៖÷ស្ត្រីជាកម្មការិនីម្នាក់ធ្វេីកានៅរោងចក្រ ត្រីប៉ូស ខូអិលធីឌី បានស្លាប់បាត់បង់ជីវិតទាំងម្តាយនិងកូនបន្ទាប់ពីក្រុមគ្រួសារបញ្ជូនមកសម្រាលកូន(កូនដំបូង)នៅមណ្ឌលសុខភាព ព្រៃខ្មែរ ឋិតនៅក្នុងស្រុករលាប្អៀរ ខេត្តកំពង់ឆ្នាំង កាលពីវេលាម៉ោង2យប់ថ្ងៃទី 17 ខែកុម្ភៈឆ្នាំ 2019 កន្លងទៅ។
ស្ត្រីរងគ្រោះម្នាក់នោះឈ្មោះ ភិន សុផេន អាយុ24ឆ្នាំប្តីឈ្មោះនីម គឹមឡុង អាយុជាង30ឆ្នាំ រស់នៅភូមិអូរសណ្ដាន់ចាស់ ឃុំទឹកហូត ស្រុករលាប្អៀរ ខេត្តកំពង់ឆ្នាំង បានស្លាប់ទាំងម្ដាយនិងកូនបន្ទាប់ពីស្ត្រីនោះគ្រប់ខែត្រូវបានគ្រួសារដឹកយកទៅសម្រាលនៅមណ្ឌលសុខភាពព្រៃខ្មែរទាំងកណ្ដាលអធ្រាត្រ។
បើយោងទៅលើការលើកឡើងរបស់ក្រុមគ្រួសារស្ត្រីរងគ្រោះបានឱ្យដឹងថានៅយប់ថ្ងៃទី 16 ខែកុម្ភៈឆ្នាំ 2019 ប្អូនស្រីរបស់គាត់ឈ្មោះ ភិន សុផេង មានអាការៈឈឺពោះគ្រប់ខែពួកគាត់ក៏បានជួលម៉ូតូកង់បីដឹកប្អូនស្រីយកទៅកាន់មណ្ឌលសុខភាព(ផ្សារព្រៃខ្មែរ )។ពេលបញ្ជូនទៅដល់អ្នកគ្រូពេទ្យចំនួន 4 នាក់បានបញ្ជូនប្អូនស្រីរបស់គាត់ចូលទៅក្នុងបន្ទប់សម្រាលតែមិនទាន់បានប៉ុន្មាននាទីផងស្រាប់តែលឺសំលេងប្អូនស្រីស្រែកយ៉ាងខ្លាំង បន្ទាប់មកអ្នកគ្រូពេទ្យបានបើកទ្វារឲ្យសាច់ញាតិចូលទៅពិនិត្យមើលពេលនោះក្រុមគ្រួសារបានឃើញ សភាព ប្អូនស្រីរបស់គាត់ បែកពពុះមាត់និងស្លេកស្លាំងបាត់ស្មាតី បាត់ទៅហើយ។
បន្តិចក្រោយមកស្រាប់តែឃើញរថយន្ដសង្គ្រោះបន្ទាន់របស់មន្ទីរពេទ្យបង្អែកខេត្តកំពង់ឆ្នាំង ទៅដល់ ក៍បានលើកស្ត្រីឆ្លងទន្លេនោះដឹក យកមកកាន់មន្ទីពេទ្យបង្អែកខេត្តដើម្បីសង្គ្រោះបន្ត។ តែដល់ពាក់កណ្តាលផ្លូវអ្នកគ្រូពេទ្យបានស្ទាប ជីបចរ មើលហើយឆ្លើយប្រាប់គ្រួសារគាត់ថាស្ត្រីឆ្លងទន្លេនោះបានដាច់ខ្យល់ស្លាប់បាត់ទៅហើយ។ ( ធាតុពិតស្ត្រីនោះបានដាច់ខ្យល់ស្លាប់តាំង ពីនៅក្នុងមណ្ឌលសុខភាពព្រៃខ្មែរមកម្ល៉េះ) ។ពេលមកដល់មន្ទីរពេទ្យបង្អែកមានគ្រូពេទ្យម្នាក់ទៀតបាននិយាយថាដឹកសពយកមកធ្វើអ្វី។ បន្ទាប់ពីដឹងថាប្អូនស្រីគាត់បានស្លាប់បាត់បង់ជីវិតទៅហើយឡានសាមុយរបស់មន្ទីរពេទ្យបង្អែកខេត្តកំពង់ឆ្នាំងក៏បានដឹកសាកសពយកទៅគេហដ្ឋាននៅឯភូមិអូរសណ្ដាន់ចាស់ឃុំទឹកហូត ស្រុករលាប្អៀរធ្វើបុណ្យតាមប្រពៃណី។
ជួបអ្នកសារព័ត៌មានយើងនៅព្រឹកថ្ងៃទី19/02/2019គ្រួសារស្ត្រីរងគ្រោះបានបញ្ជាក់ថាគាត់មិនធ្វើការប្ដឹងផ្ដល់នោះទេតែពួកគាត់សូមផ្ដាំផ្ញើទៅដល់ក្រុមគ្រូពេទ្យទាំងអស់ទូទាំងប្រទេសពិសេសពេទ្យក្នុងខេត្តកំពង់ឆ្នាំងសូមមេត្តាយកចិត្តទុកដាក់ឲ្យបានខ្ពស់ចំពោះអ្នកជំងឺនិងស្ត្រីដែលឆ្លងទន្លេដើម្បីជួយសង្គ្រោះធ្វើយ៉ាងណាកុំឲ្យមានអ្នកស្លាប់ដូចជាក្រុមគ្រួសារគាត់បន្ថែមទៀតពួកគាត់ឈឺចាប់ខ្លាំងណាស់ ។
គ្រួសារគាត់ក៏បានសំណូមពរបន្ថែមទៅភិបាល សូមមេត្តាជួយពិនិត្យ ពង្រឹង សមត្ថភាពក្រុមគ្រូពេទ្យទូទាំងប្រទេសឲ្យគោរពក្រមសីលធម៌យកចិត្តទុកដាក់ជាមួយអ្នកជំងឺនិង សូមផ្ដល់ភាពយុត្តិធម៌ជូនគ្រួសារគាត់ផង។ម្យ៉ាងទៀតសូមឲ្យក្រុមគ្រូពេទ្យដែលធ្វើខុសចេះទទួលកំហុសផងកុំពូកែដោះសាកាន់ជើងគ្នាហួសហេតុពេក។
ពាក់ព័ន្ធនឹងករណីខាងលើនេះនៅព្រឹកថ្ងៃទី19/02/2019 លោក ប្រាក់ វ៉ុន ប្រធានមន្ទីសុខាភិបាល ខេត្តកំពង់ឆ្នាំង បានប្រាប់អ្នកសារព័ត៌មានថា៖គាត់បានទទួលព័ត៌មានហ្នឹងហើយតែមិនបានដឹងថាមូលហេតុអ្វីអោយពិតប្រាកដែលបណ្ដាលឲ្យស្ត្រីនិងកូនស្លាប់នោះទេ។ តែមួយសន្ទុះក្រោយមកលោក ប្រាក់ វ៉ុន បានប្រាប់បន្ថែមទៀតថាអ្នកជំងឺរូបនោះស្ទះសសៃឈាមទឹកភ្លោះគ្រូពេទ្យមានជំនាញបែបណាក៏មិនអាចជួយសង្គ្រោះបានដែរ។
ជុំវិញការលើកឡើងបែបនេះត្រូវបានមតិមហាជនពិសេសអ្នកជំនាញបានលើកឡើងថាបណ្ដាលមកពីការធ្វេសប្រហែសរបស់ក្រុមពេទ្យនោះតែប៉ុណ្ណោះដោះសារហូត។
ប្រជាពលរដ្ឋលើកឡើងថា៖លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តែងតែយកចិត្តទុកដាក់ខ្ពស់បំផុត ចំពោះស្ត្រី សំរាលកូនតាមមន្ទីរពេទ្យនានា ចុះហេតុអ្វីបាន ជាមណ្ឌលសុខភាពព្រៃខ្មែរ ក្រុមគ្រូពេទ្យធ្វេសប្រហែសបណ្តាល អោយស្ត្រីឆ្លងទន្លេរម្នាក់ស្លាប់បាត់បង់ជីវិតទាំងម្តាយទាំងកូន តើខាងណាជាអ្នក ទទួលខុសត្រូវ ?។
ប្រភព ពី ស្ថានីយ៍វិទ្យុរិទ្ធិសែន
