លោកបណ្ឌិត ថោង ខុន៖ ម្ចាស់ផ្ទះបារាំង បានធ្វើរឿង ២ធំៗ ផ្ដល់កិត្តិយសដ៏ធំធេងសម្រាប់កម្ពុជា
21-September-2026 / សុខភាពនិងកីឡា
ភ្នំពេញ៖ លោកបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការអូឡាំពិកកម្ពុជា (NOCC) បានថ្លែងរំលឹកពីព្រឹត្តិការណ៍កីឡាអូឡាំពិករដូវក្ដៅ លើកទី៣៣ ឆ្នាំ២០២៤ នៅទីក្រុងប៉ារីស ដែលទើបប្រារព្ធពិធីបិទការប្រកួត កាលពីរាត្រីថ្ងៃទី១១ ខែសីហាកន្លងទៅថា ម្ចាស់ផ្ទះបារាំងបានធ្វើរឿង ២ធំៗ ដែលជាការផ្ដល់នូវមហាកិត្តិយសសម្រាប់កម្ពុជា ។
លោកទេសរដ្ឋមន្ដ្រីដែល បានដឹកនាំប្រតិភូអូឡាំពិក អមដំណើរដោយលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការ NOCC បានទទួលស្វាគមន៍ដំណើរមកដល់កម្ពុជាវិញ របស់កំពូលតារារ៉េបកម្ពុជា លោក វណ្ណដា បន្ទាប់ពីការបង្ហាញវត្តមានក្នុងពិធីបិទកីឡាអូឡាំពិកប៉ារីស ឆ្នាំ២០២៤ បង្កការភ្ញាក់ផ្អើលដល់ប្រទេសកម្ពុជា ដោយសារត្រូវបានប្រជាជនក្នុងតំបន់ និងលើពិភពលោកចាប់អារម្មណ៍ជាខ្លាំង ។
លោកទេសរដ្ឋមន្ដ្រី ថោង ខុនឱយដឹងាថា រឿងធំៗពីរ ដែលម្ចាស់ផ្ទះបារាំង បានផ្ដល់កិត្តិយសដល់កម្ពុជា ទី១-ទោះបីអត្តពលិកកម្ពុជា មានចំនួនតិច តែត្រូវបានម្ចាស់ផ្ទះផ្តល់អាទិភាព ជូនទូកមួយដាច់ដោយឡែក ក្នុងពិធីដង្ហែរពិធីបើកព្រឹត្តិការណ៍ ទី២-វត្តមានរបស់តារារ៉េបកម្ពុជា វណ្ណដា ជាមហាកិត្តិយស ដែលបារាំង ផ្តល់ជូនកម្ពុជា ក្នុងនាមជាប្រទេសកំពុងអភិវឌ្ឍ ដែលឧស្សាហកម្មតន្ត្រីនៅមានកម្រិតនៅឡើយ ។លោកបណ្ឌិត ថោង ខុន បានបន្ថែមថា «ពិតណាស់! វត្តមាន ក្មួយ វណ្ណដា ក្នុងពិធីបិទកីឡាអូឡាំពិកនេះ បានធ្វើឲ្យគេចាប់អារម្មណ៍ខ្លាំងដល់ចលនាអូឡាំពិកពិភពលោក ពិសេសចលនាអូឡាំពិកកម្ពុជាយើង។
ខ្ញុំគិតថា នេះជាចលករមួយដ៏ធំ សម្រាប់ឲ្យយុវជនយើង ពិសេសតារាចម្រៀងរ៉េប ព្រោះតន្ដ្រីរ៉េបនេះ គឺជាចំណង់ចំណូលចិត្តរបស់យុវជនយើងបច្ចុប្បន្ន ស្របពេលព្រឹត្តិការណ៍អូឡាំពិក លើកទី៣៣ ឆ្នាំនេះ ម្ចាស់ផ្ទះបានរៀបចំបន្ថែមឲ្យមានប្រភេទកីឡា ដែលមាននិន្នាការយុវជនជាច្រើន ដូចជា Break Dance ដែលជាកីឡាកំពុងពេញនិយមសម្រាប់យុវវ័យ ក៏ដូចជាសិល្បៈចម្រៀងរ៉េបនេះ ដែលជាចំណង់ចំណូលចិត្តដ៏ធំរបស់យុវជនផងដែរ»។
ក្នុងដំណើរមកដល់មាតុភូមិ ដោយមានការសាទរពីមហាជនអ្នកគាំទ្រ តារារ៉េប វណ្ណដា បានបង្ហាញមោទនភាពជាខ្លាំង។ វណ្ណដា ថា «ខ្ញុំអត់អាចនិយាយពីចំណុចនេះបាន តែខ្ញុំអាចនិយាយពីការនាំយកទង់ជាតិខ្មែរ ក៏ដូចជានាំយកភាសាខ្មែរ ហើយយើងពិតជាមានមោទនភាពមែនទែន ក្នុងការបានទៅសម្ដែងក្នុងព្រឹត្តិការណ៍កីឡាអូឡាំពិករដូវក្ដៅ នៅប្រទេសបារាំង។ ខ្ញុំអត់ដឹងថា តើប៉ុន្មានឆ្នាំមានម្ដងទេ ពីព្រោះនេះគឺជាឱកាសអាចថាមួយជីវិតមានតែម្ដងទេ។ ដូច្នេះគឺមោទនភាពមែនទែនសម្រាប់ខ្ញុំផ្ទាល់ សម្រាប់ប្រជាជន និងប្រទេសរបស់យើង គឺខ្ញុំគិតថានេះគឺភាពឈ្នះដ៏ធំមួយ។ ខ្ញុំសង្ឃឹមថានឹងមានអ្វីភ្ញាក់ផ្អើល (Surprise) បន្ដទៀត»។
តារាចម្រៀង វណ្ណដា ក៏បានសម្ដែងនូវការអរគុណចំពោះប្រមុខរាជរដ្ឋាភិបាល ក៏ដូចជា លោកបណ្ឌិត ថោង ខុន, លោក វ៉ាត់ ចំរើន និងពុកម៉ែបងប្អូនអ្នកគាំទ្រ ដែលបានអបអរសាទរ និងទទួលស្វាគមន៍រូបលោក ជាមួយនឹងសមិទ្ធផល ដែល វណ្ណដា បានចាត់ទុកជាជ័យជម្នះថ្មីមួយទៀត សម្រាប់ប្រទេសកម្ពុជា។ តាមរយៈ សមិទ្ធផលនេះដែរ វណ្ណដា បានបញ្ជាក់ថា មិនត្រឹមតែជាមោទនភាពផ្ទាល់ខ្លួននោះទេ គឺជាមោទនភាពជាតិទាំងមូល ហើយក៏សង្ឃឹមថា សិល្បករខ្មែរផ្សេងៗ ទាំងអ្នកបានសម្ដែង ឬមិនទាន់បានសម្ដែង នឹងអាចមានវត្តមានដូចខ្លួនដែរនៅថ្ងៃអនាគត។
សម្តេចតេជោ និងសម្តេចធិបតី លោកបានសម្តែងនូវអបអរសាទរ កោតសរសើរ និងអរគុណដល់ វណ្ណដា ក្នុងនាមជាកូនខ្មែរ និងជាសិល្បកររ៉េបដ៏ល្បីល្បាញមួយរូប ដែលបាននាំមកនូវកិត្តិយសដ៏ធំធេងជូនជាតិ តាមរយៈការចូលរួមសម្តែងបទចម្រៀងរ៉េបកម្ពុជានៅក្នុងព្រឹត្តិការណ៍កីឡាអូឡាំពិកអន្តរជាតិ ដែលទីក្រុងប៉ារីសធ្វើជាម្ចាស់ផ្ទះ លើកទី៣៣ នេះ។
