រដ្ឋមន្ត្រីក្រសួងមហាផ្ទៃនិរាករណ៍លិខិតខ្លួនឯងក្នុងរឿងប្រធានគណបក្សឆន្ទៈខ្មែរ!

ភ្នំពេញ៖ក្នុងលិខិតផ្សព្វផ្សាយជាសាធារណៈនៅថ្ងៃទី២៥ ខែតុលា  លោក ស សុខារដ្ឋមន្ត្រីក្រសួងមហាផ្ទៃ ប្រកាសមិនទទួលស្គាល់លោក សេង ម៉ារឌី ជាប្រធានគណបក្សឆន្ទៈខ្មែរឡើយ និងថែមទាំងបានសម្រេចនិរាករណ៍លិខិតដែលក្រសួងធ្លាប់ទទួលស្គាល់លោក សេង ម៉ារឌី។ បើតាមក្រសួងមហាផ្ទៃ ប្រធានគណបក្សឆន្ទៈខ្មែរដែលក្រសួងនៅបន្តទទួលស្គាល់រហូតដល់ចប់អាណត្តិ គឺលោក សុក​ ហាច។ 

ក្រសួងមហាផ្ទៃបានឲ្យដឹងពីហេតុផលដែលក្រសួងមហាផ្ទៃមិនទទួលស្គាល់លោក សេង ម៉ារឌី ជាប្រធានគណបក្សឆន្ទៈខ្មែរជំនួសលោក សុក ហាច  ​ក៏ព្រោះតែ ក្រុមការងារជំនាញក្រសួងមហាផ្ទៃ បានចុះធ្វើអធិការកិច្ច ដោយរកឃើញថា ការជ្រើសតាំងលោក សេង ម៉ារឌី ពុំបានអនុវត្តត្រឹមត្រូវស្របតាមនីតិវិធីនៃច្បាប់ស្តីពីគណបក្សនយោបាយ និងបទបញ្ជាផ្ទៃក្នុងរបស់គណបក្សដែលតម្កល់ទុកនៅក្រសួងមហាផ្ទៃ។  ទោះយ៉ាងណា ក្រសួងមហាផ្ទៃបានរំលឹកឱ្យគណបក្សឆន្ទៈខ្មែរ ត្រូវរៀបចំមហាសន្និបាត ឬសមាជគណបក្សឱ្យបានត្រឹមត្រូវស្របតាមគោលការណ៍ច្បាប់ ក្នុងករណីត្រូវផ្លាស់ប្តូរប្រធានគណបក្ស។

ក្នុងលិខិតក្រសួងមហាផ្ទៃបានជម្រាបជូនឯកឧត្តម សុក ហាច ប្រធានគណបក្សឆន្ទៈខ្មែរចុះថ្ងៃទី២៣តុលាឆ្នាំ២០២៦បានឲ្យដឹងថា​ ផ្អែកតាមលទ្ធផលនៃការចុះធ្វើអធិការកិច្ចរបស់ក្រុមការងារជំនាញក្រសួងមហាផ្ទៃ បានរកឃើញថា កិច្ចប្រជុំ គណៈកម្មាធិការនាយកគណបក្សឆន្ទៈខ្មែរ កាលពីថ្ងៃទី១៥ ខែមីនា ឆ្នាំ២០២៦ ដែលបានលើកយកញត្តិដកសេចក្តីទុកចិត្ត ឯកឧត្តម សុក ហាច ពីប្រធានគណបក្ស និងការជ្រើសតាំងឯកឧត្តម សេង ម៉ារឌី ជាប្រធាន គណបក្សថ្មីនោះ គឺពុំបានអនុវត្តត្រឹមត្រូវស្របតាមនីតិវីធី នៃច្បាប់ស្តីពីគណបក្សនយោបាយ លក្ខន្តិកៈ និង បទបញ្ជាផ្ទៃក្នុងរបស់គណបក្សដែលបានតម្កល់ទុកនៅក្រសួងមហាផ្ទៃឡើយ។​

ហេតុដូច្នេះ ក្រសួងមហាផ្ទៃបានសម្រេចនិរាករណ៍លិខិតលេខ ២២០៤ សជណ ចុះថ្ងៃទី៤ ខែមិថុនា ឆ្នាំ២០២៦ របស់ក្រសួងមហាផ្ទៃ ដែលទទួលស្គាល់ឯកឧត្តម សេង ម៉ារឌី ជាប្រធានគណបក្សឆន្ទៈ ខ្មែរ តាមរយៈសេចក្តីសម្រេចលេខ១៣៨៩៣ ស.ស.រ. ចុះថ្ងៃទី២៣ ខែតុលា ឆ្នាំ២០២៦ របស់ក្រសួងមហាផ្ទៃ។ ទន្ទឹមនឹងនេះ ក្រសួងមហាផ្ទៃបន្តទទួលស្គាល់ ឯកឧត្តម សុក ហាច ជាប្រធានគណបក្សឆន្ទៈខ្មែរ ស្របតាម ស្មារតីនៃលិខិតលេខ ៧៩៦ សជណ ចុះថ្ងៃទី៤ ខែមីនា ឆ្នាំ២០២៤ របស់ក្រសួងមហាផ្ទៃ រហូតដល់ចប់ អាណត្តិ។ ក្នុងករណីចាំបាច់ដែលត្រូវផ្លាស់ប្តូរប្រធានគណបក្ស គណបក្សឆន្ទៈខ្មែរត្រូវរៀបចំមហាសន្និបាត ឬ សមាជគណបក្សឱ្យបានត្រឹមត្រូវស្របតាមគោលការណ៍ច្បាប់និងលក្ខន្តិកៈរបស់ខ្លួន ដែលបានតម្កល់ទុកនៅ ក្រសួងមហាផ្ទៃ។

លោក សេង ម៉ារឌី សមាជិកព្រឹទ្ធសភាកម្ពុជា មកពីគណបក្សឆន្ទៈខ្មែរដូចលោកសុខហាចដែរ មិនបានធ្វើអត្ថាធិប្បាយអ្វីឡើយជុំវិញករណីនេះ ដោយលោកប្រគល់សិទ្ធិឱ្យលោក គង់ មុនីកា អគ្គលេខាធិការគណបក្សឆន្ទៈខ្មែរឆ្លើយតបជំនួសវិញឯ លោក គង់ មុនីកាក៏នៅស្ងៀមនៅឡើយដែរ។

កន្លងមក គណបក្សឆន្ទៈខ្មែរបានអះអាងថា ការផ្លាស់ប្តូរតំណែងប្រធានបក្សថ្មី គឺជាផ្នែកមួយនៃការរៀបចំរចនាសម្ព័ន្ធផ្ទៃក្នុង ដោយផ្អែកលើបញ្ហាសុខភាពរបស់លោក សុក ហាច កាន់តែចាស់ និងមានបញ្ហាសុខភាពដែលមិនអាចបន្តបំពេញភារកិច្ចចុះមូលដ្ឋានបានពេញលេញដូចមុន។ មួយវិញទៀត ការផ្លាស់ប្តូរប្រធានគណបក្សជំទាស់នេះ ក៏ជាយុទ្ធសាស្ត្រ ផ្ទេរតំណែងទៅកាន់យុវជនបន្តវេន។ទោះបីយ៉ាងណាបញ្ហាមួយនេះបានបង្ហាញឲ្យឃើញពីការបែកបាក់ផ្ទៃក្នុងឬក៏មានអ្នកលូកដៃក្នុងរឿងនេះក៏ថាបាន៕