ក្រសួងមហាផ្ទៃចេញមកការពារការ វិសោធនកម្មច្បាប់គ្រប់គ្រងរដ្ឋបាលឃុំ សង្កាត់ថា មិនមែនដើម្បីកែប្រព័ន្ធបោះឆ្នោត និងប្រមូលផ្តុំអំណាចផ្តាច់មុខឡើយ!

ភ្នំពេញ៖ក្រសួងមហាផ្ទៃ នាថ្ងៃទី២២ ខែសីហា នេះ បានចេញមកឆ្លើយតបដោយបញ្ជាក់ថាវិសោធនកម្មច្បាប់គ្រប់គ្រងរដ្ឋបាលឃុំ សង្កាត់ថា មិនមែនធ្វើឡើងដើម្បីកែប្រែប្រព័ន្ធបោះឆ្នោត មិនដកហូតអាសនៈ និងមិនដើម្បីប្រមូលផ្តុំអំណាចផ្តាច់មុខឡើយ។ 

ក្រសួងមហាផ្ទៃ បញ្ជាក់តាមសឹចក្តីប្រកាសពត៍មានថា វិសោធនកម្មច្បាប់នេះ មិនបានកែប្រែប្រព័ន្ធបោះឆ្នោត និងរូបមន្តបែងចែកអាសនៈ ក្នុងក្រុមប្រឹក្សាឃុំ សង្កាត់ ដែល មានចែងកំណត់នៅក្នុងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ជាធរមានឡើយ។ គណបក្សនយោបាយនីមួយៗនៅតែទទួលបានអាសនៈស្របតាមចំនួនសំឡេងឆ្នោតដែលខ្លួនទទួលបាន។ វិសោធនកម្មនេះក៏មិនដកហូតអាសនៈ ឬកម្រិតសិទ្ធិរបស់ប្រជាពលរដ្ឋ ឬកម្រិតសិទ្ធិរបស់គណបក្សនយោបាយ ដែលចូលរួមក្នុងដំណើរការប្រជាធិបតេយ្យនោះឡើយ។ សមាជិកក្រុមប្រឹក្សាឃុំ សង្កាត់ទាំងអស់ដែលជាប់ ឆ្នោតនៅតែមានសិទ្ធិពិភាក្សា អនុម័ត សម្រេច និងត្រួតពិនិត្យការងាររដ្ឋបាលតាមច្បាប់។

ក្រសួងមហាផ្ទៃគូសបញ្ជាក់ថា វិសោធនកម្មនៃ ធ្វើឡើង ដើម្បី កែលម្អរូបមន្តកំណត់មុខតំណែងថ្នាក់ដឹកនាំរដ្ឋបាលឃុំ សង្កាត់ ឱ្យសមស្របនឹងលទ្ធផល បោះឆ្នោត និងជាពិសេសស្របតាមឆន្ទៈរបស់ប្រជាពលរដ្ឋដែលជាម្ចាស់ឆ្នោត ហើយធ្វើឡើងដោយឈរលើគោលការណ៍នីតិរដ្ឋ ការគោរពរដ្ឋធម្មនុញ្ញ និងការពង្រឹងលទិប្រជាធិប តេយ្យសេរីពហុបក្ស។ វិសោធនកម្មនៃ ក៏ដើម្បីជាការកែលម្អ និងពង្រឹងការគ្រប់គ្រងរដ្ឋបាលឃុំ សង្កាត់ បន្ទាប់ពីការបោះឆ្នោត ដើម្បីធានា ប្រសិទ្ធភាពនៃការដឹកនាំ និងការអនុវត្តការងាររដ្ឋបាល។

ក្រសួងមហាផ្ទៃសង្កត់ធ្ងន់ថា ៖” (វិសោធនកម្មច្បាប់នេះធ្វើឡើងដើម្បី) ពង្រឹងការឯកភាពក្នុងការដឹកនាំមិនមែនជាការប្រមូលផ្តុំអំណាចផ្តាច់មុខឡើយ។ ថ្នាក់ដឹកនាំ ឃុំ សង្កាត់ នៅតែស្ថិតក្រោមច្បាប់ សេចក្តីសម្រេចរបស់ក្រុមប្រឹក្សា ផែនការ និងថវិកាដែលបានអនុម័ត ព្រមទាំងយន្តការត្រួតពិនិត្យ សវនកម្ម និងគណនេយ្យភាពចំពោះប្រជាពលរដ្ឋ។“។

ជារួមក្រសួងមហាផ្ទៃអះអាងថា ការធ្វើវិសោធនកម្មនេះមានគោលបំណងពង្រឹងប្រព័ន្ធអភិបាលកិច្ចមូលដ្ឋាន លើកកម្ពស់ គុណភាពសេវាសាធារណៈ និងធានាឱ្យរដ្ឋបាលឃុំ សង្កាត់ អាចឆ្លើយតបបានកាន់តែឆាប់រហ័ស និងមាន ប្រសិទ្ធភាពចំពោះតម្រូវការរបស់ប្រជាពលរដ្ឋ។ បទប្បញ្ញត្តិថ្មីនឹងអនុវត្តចាប់ពីការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៦តទៅ និងមិនប៉ះពាល់ដល់សមាសភាព ឬមុខតំណែងថ្នាក់ដឹកនាំរដ្ឋបាល ឃុំ សង្កាត់ ដែលស្ថិតក្នុងអាណត្តិបច្ចុប្បន្នឡើយ។

ក្រសួងមហាផ្ទៃអំពាវនាវដល់គ្រប់មជ្ឈដ្ឋាន មេត្តាសិក្សានិងវាយតម្លៃការធ្វើវិសោធនកម្មច្បាប់នេះ ដោយផ្អែកលើ ខ្លឹមសារច្បាប់ពេញលេញ និងព័ត៌មានផ្លូវការ ព្រមទាំងចូលរួមផ្តល់មតិយោបល់ដោយស្ថាបនា ដើម្បី រួមចំណែកពង្រឹងលទ្ធិប្រជាធិបតេយ្យ អភិបាលកិច្ចល្អ និងការអភិវឌ្ឍរដ្ឋបាលមូលដ្ឋានឱ្យកាន់តែមានប្រសិទ្ធភាព។

កគណបក្សកម្លាំងជាតិបានចេញសេចក្តីថ្លែងការណ៍ពាក់ព័ន្ធ នឹងការធ្វើវិសោធនកម្មមាត្រា៣៣ មាត្រា៣៤ មាត្រា៣៥ និងមាត្រា៣៨ នៃច្បាប់ស្តីពីការគ្រប់គ្រងរដ្ឋបាល ឃុំ សង្កាត់ ដោយលើកឡើងនូវការព្រួយបារម្ភមួយចំនួនអំពីប្រព័ន្ធបោះឆ្នោត ការបែងចែកមុខតំណែង ថ្នាក់ដឹកនាំរដ្ឋបាលឃុំ សង្កាត់ គោលការណ៍លទ្ធិប្រជាធិបតេយ្យសេរីពហុបក្ស និងការចូលរួមរបស់គណបក្ស នយោបាយនៅថ្នាក់មូលដ្ឋាន។

គួររម្លឹកថា កាលពីថ្ងៃទី២០ ខែសីហានេះ រដ្ឋសភានៃព្រះរាជាណាចក្រកម្ពុជា បានអនុម័តជាផ្លូវការដោយឯកច្ឆន្ទ ១១០ លើ ១១០ សំឡេង លើវិសោធនកម្មមាត្រា ៣៣, ៣៤, ៣៥ និង ៣៨ នៃច្បាប់ស្តីពីការគ្រប់គ្រងរដ្ឋបាលឃុំ សង្កាត់៕