កម្ពុជាបន់ស្រន់ផងប្រជុំដាក់ផែនការកាពារផងសន្តិសុខផងនៅពេលកិច្ចប្រជុំមេដឹកនាំប្រទេសហ្វ្រង់កូនហ្វូនជិតចូលមកដល់!

‎ភ្នំពេញ៖សម្ដេចព្រះពោធិវ័ង្ស ណយ ច្រឹក សម្ដេចព្រះសង្ឃនាយករងទី១ គណៈមហានិកាយ នៃព្រះរាជាណាចក្រកម្ពុជាសម្តេចម៉ែនសំអននៅព្រឹកថ្ងៃទី២៥ ខែតុលា ឆ្នាំ២០២៦បាន យាងនិងអញ្ជើញជាព្រះរាជាធិបតីភាពបួងសួង​សុំ​សេចក្តីសុខ​ សេចក្តីចម្រើន ជូនជាតិ និងមាតុភូមិ នៅវត្តភ្នំដូនពេញ។ 

‎

‎ សម្ដេចព្រះពោធិវ័ង្ស ណយ ច្រឹក និងសម្តេច​កិត្តិ​សង្គហ​បណ្ឌិត ក៏បាន​បួងសួង​ដល់​វត្ថុ​ស័ក្តិសិទ្ធិ​ក្នុង​លោក​ គុណបុណ្យ​ព្រះ​រតនត្រ័យ មាន​ព្រះពុទ្ធ ព្រះធម៌ ព្រះសង្ឃ ទេវតា​ថែរក្សា​ព្រះ​ស្វេត​ឆ័​ត្រ ទេវតា​ថែរក្សា​ចក្រវាល​ តាម​ជួយ​អភិបាល​ប្រោះព្រំ​បីបាច់​ថែរក្សា និង​ប្រសិទ្ធ​ពរជ័យ​ដល់ ​សម្តេច ទ្រង់ ឯកឧត្តម អស់លោក លោកស្រី អ្នកនាង​កញ្ញា និង​ប្រជាពលរដ្ឋ​នៅ​ទូទាំងប្រទេស​ បាន​សមប្រកប​តែ​សេចក្តីសុខ សេចក្តី​ចម្រើន វិបុល​សុខ ជៀស​ផុត​ពី​ជំងឺ​ឧបទ្រពចង្រៃ ជៀស​ផុត​ពី​គ្រោះធម្មជាតិ​ផ្សេងៗ មាន​ទេសចរណ៍​ចូល​មក​ទស្សនា​កម្ពុជា​កាន់តែ​ច្រើន ។

សូម​ឲ្យ​កងកម្លាំងប្រដាប់អាវុធ​ឈរជើង​ជួរមុខ​តាម​បន្ទាត់​ព្រំដែន​កម្ពុជា​-​ថៃ​មាន​សុខភាព​ល្អ និង​ទទួល​បាន​ជោគជ័យ​ក្នុង​ការ​ការពារ​បូរណភាព​ទឹកដី សូម​ឲ្យ​សម្រេច​រាល់​បំណង​ប្រាថ្នា ទទួលជោគជ័យ​គ្រប់​ការងារ និង​សម្រេច​បាន​នូវ​វឌ្ឍនភាព​ថ្មីៗ​ បន្ត​ទៅ​ទៀត។ ពិសេស សូមឲ្យដំណើរការនៃកិច្ចប្រជុំលើកដំបូងក្នុងប្រវត្តិសាស្ត្រ ដែលព្រះរាជាណាចក្រកម្ពុជា មានកិត្តិយសបានធ្វើជាម្ចាស់ផ្ទះកិច្ចប្រជុំកំពូលហ្វ្រង់កូហ្វូនីលើកទី២០ និងសន្និសីទថ្នាក់រដ្ឋមន្ត្រីហ្វ្រង់កូហ្វូនីលើកទី៤៨ ដំណើរការទៅដោយរលូន ប្រកបដោយសុខសុវត្ថិភាព និងទទួលបានជោគជ័យ។

សូមបញ្ជាក់ថាទាក់ទងនិងសន្តិសុខនេះដែរលោឧត្ដម ឧត្តមសេនីយ៍ឯក យឹម លាង អគ្គស្នងការរងនគរបាលជាតិ ទទួលដឹកនាំនាយកដ្ឋានអង្គរក្ស អញ្ជើញជួបពិភាក្សាការងារសន្តិសុខត្រៀមក្នុងឱកាសរៀបចំកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦ ជាមួយប្រតិភូនាំមុខនៃប្រទេសកាណាដាដឹកនាំដោយ លោក Stephan Tuite មកពីកងប៉ូលិសសេះរាជវាំងកាណាដា (RCMP) ព្រមទាំងសហការី នៅសាលប្រជុំនាយកដ្ឋានអង្គរក្សនារសៀលថ្ងៃទី៣ ខែតុលា ឆ្នាំ២០២៦។

លោក ឧត្តមសេនីយ៍ឯក យឹម លាងបានប្រាប៎ថា កិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះនាពេលខាងមុខនេះ គឺអគ្គស្នងការនគរបាលជាតិបានរៀបចំកសាងផែនការការពាររួចរាល់អស់ហើយ។

សូមបញ្ជាក់ថាកិច្ចប្រជុំកំពូលហ្វ្រង់កូហ្វូនីលើកទី២០ គឺជាព្រឹត្តិការណ៍ដែលមានវិសាលភាពធំជាងកិច្ចប្រជុំមុនៗ ដោយមានប្រទេសចូលរួមជាសមាជិកចំនួន ៩០ប្រទេស និងប្រទេសសមាជិកពេញសិទ្ធិមានចំនួន ៥៣ប្រទេស ប្រទេសមិនពេញសិទ្ធិ ៥ប្រទេស និងសង្កេតការណ៍ ៣២ប្រទេស។អគ្គស្នងការនគរបាលជាតិបានកសាងផែនការការពារច្បាស់លាស់ដោយប្រើប្រាស់កម្លាំងជិត ២ម៉ឺននាក់ ដែលមាន ៣០ស្ថាប័នអង្គភាពចូលរួម។ ហើយកម្ពុជាមានសមត្ថភាពគ្រប់គ្រានក្នុងការការពារសន្តិសុខ សុវត្ថិភាពជូនប្រមុខរដ្ឋ ប្រមុខរាជរដ្ឋាភិបាល រដ្ឋាភិបាល និងថ្នាក់ដឹកនាំបរទេស ដែលនឹងអញ្ជើញមកពីបណ្តាប្រទេសនានាជុំវិញពិភពលោក ដើម្បីចូលរួមកិច្ចប្រជុំកំពូលហ្វ្រង់កូហ្វូនីលើកទី២០។

កម្ពុជាបានត្រៀមលក្ខណៈយ៉ាងគ្រប់ជ្រុងជ្រោយសម្រាប់ការងារសារព័ត៌មាន និងផ្សព្វផ្សាយ ដើម្បីសម្របសម្រួលដល់ប្រព័ន្ធផ្សព្វផ្សាយជាតិ និងអន្តរជាតិ ក្នុងការបំពេញបេសកកម្មយកព័ត៌មានពីកិច្ចប្រជុំកំពូលហ្វ្រង់កូហ្វូនីលើកទី២០។ កិច្ចប្រជុំកំពូលនេះនឹងប្រព្រឹត្តទៅនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៦.។