កម្ពុជាបង្កកទ្រព្យជិត ១ពាន់លានដុល្លារក្នុងសំណុំរឿង Prince Group និងស្វែងរកជនត្រូវចោទ ២៩នាក់តាម INTERPOL

ភ្នំពេញ៖ អាជ្ញាធរកម្ពុជាបានបង្កកទ្រព្យសម្បត្តិដែលមានតម្លៃប៉ាន់ស្មានជិត ១ពាន់លានដុល្លារអាមេរិក ពាក់ព័ន្ធនឹងសំណុំរឿងក្រុមហ៊ុន Prince Group ខណៈកំពុងស្នើសុំជំនួយពីអង្គការនគរបាលព្រហ្មទណ្ឌអន្តរជាតិ (INTERPOL) ដើម្បីស្វែងរកជនត្រូវចោទ និងមេខ្លោងចំនួន ២៩នាក់ ដែលកំពុងរត់គេចខ្លួនទៅក្រៅប្រទេស ពាក់ព័ន្ធនឹងបទឆបោកតាមប្រព័ន្ធបច្ចេកវិទ្យា និងសម្អាតប្រាក់។ 

លោក ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានប្រចាំការ និងប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានឲ្យដឹង នៅថ្ងៃទី២១ ខែតុលាថា ការស៊ើបអង្កេតបានរកឃើញបណ្តាញក្រុមហ៊ុនពាក់ព័ន្ធនឹង Prince Group សរុបចំនួន ១៩៨ក្រុមហ៊ុន ក្នុងនោះ ៩៨ក្រុមហ៊ុនស្ថិតនៅកម្ពុជា និង ១០០ក្រុមហ៊ុនទៀតនៅក្រៅប្រទេស។

ដោយសារសំណុំរឿងនេះមានទំហំធំ និងភាពស្មុគស្មាញ ព្រមទាំងពាក់ព័ន្ធនឹងបណ្តាញក្រុមហ៊ុនដែលមានរចនាសម្ព័ន្ធចាត់តាំងទាំងក្នុង និងក្រៅប្រទេសការស្រាវជ្រាវត្រូវបានអូសបន្លាយអស់រយៈពេលជាច្រើនខែ។

តាមលោក ស៊ីណារិទ្ធ តុលាការកម្ពុជាកំពុងបន្តនីតិវិធីស៊ើបសួរលើសំណុំរឿង Prince Group ពាក់ព័ន្ធនឹងបទឆបោកមានស្ថានទម្ងន់ទោស ដែលប្រព្រឹត្តដោយក្រុមមានការចាត់តាំង និងបទសម្អាតប្រាក់មានស្ថានទម្ងន់ទោស ដោយកំណត់ឈ្មោះ ចេន ហ្ស៊ី (Chen Zhi) និងបក្ខពួកថាជាមុខសញ្ញាសំខាន់ក្នុងសំណុំរឿងនេះ។

ចាប់ពីខែកក្កដា ឆ្នាំ២០២៥ ដល់ដំណាច់ខែកញ្ញា ឆ្នាំ២០២៦ អាជ្ញាធរកម្ពុជាបានចាត់វិធានការលើទីតាំងពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យាចំនួន ៩១០កន្លែង រួមទាំងមជ្ឈមណ្ឌលឆបោកធំៗ ៨៦កន្លែង ដោយបានបញ្ជូនសំណុំរឿង ៥២៩ករណីទៅតុលាការ និងចោទប្រកាន់ព្រមទាំងឃុំខ្លួនជនត្រូវចោទចំនួន ៥,៧៧៨នាក់។

លោកបានបញ្ជាក់ថា ក្រុមជនត្រូវចោទបានប្រើប្រាស់អគារ និងទីតាំងកាស៊ីណូមួយចំនួន ដែលស្ថិតក្រោមស្លាកក្រុមហ៊ុនសម្ព័ន្ធ Prince Group ដើម្បីលួចលាក់ប្រព្រឹត្តសកម្មភាពឆបោកតាមប្រព័ន្ធបច្ចេកវិទ្យានាពេលកន្លងមក។

រហូតមកដល់ពេលនេះ តុលាការបានចេញដីកាបង្គាប់ឱ្យចាប់ខ្លួនជនត្រូវចោទចំនួន ៣២នាក់ និងបានដាក់ជនត្រូវចោទ ៤នាក់ផ្សេងទៀតឱ្យស្ថិតក្រោមការត្រួតពិនិត្យតាមផ្លូវតុលាការ ខណៈសមត្ថកិច្ចកំពុងបន្តស្រាវជ្រាវកំណត់អត្តសញ្ញាណជនសង្ស័យ ៥នាក់បន្ថែមទៀត ព្រមទាំងស្វែងរកទ្រព្យសម្បត្តិដែលមានការពាក់ព័ន្ធ។

ក្នុងចំណោមមុខសញ្ញាសំខាន់ៗ លោកបានបញ្ជាក់ថា សមត្ថកិច្ចបានឃាត់ខ្លួនបុគ្គលចំនួន ៦នាក់ រួមមាន ចេន ហ្ស៊ី, លី សុង, លីវ យិន, អ៊ឹង ដារ៉ា, អៀង សុខលីម និង Huang Ron ហើយបានបញ្ជូនទៅតុលាការដើម្បីបន្តនីតិវិធីតាមផ្លូវច្បាប់។

ចំពោះជនត្រូវចោទ និងមេខ្លោង ២៩នាក់ផ្សេងទៀត ដែលកំពុងរត់គេចខ្លួនទៅក្រៅប្រទេស សមត្ថកិច្ចកម្ពុជាបានចាប់ផ្តើមនីតិវិធីស្នើសុំដាក់បញ្ចូលឈ្មោះក្នុងនិវេទន៍ក្រហមរបស់ INTERPOL ព្រមទាំងស្នើសុំជំនួយទៅវិញទៅមកផ្នែកច្បាប់ក្នុងវិស័យព្រហ្មទណ្ឌ ដើម្បីជំរុញការស៊ើបអង្កេត និងការអនុវត្តច្បាប់។

លោក ស៊ីណារិទ្ធ បានបញ្ជាក់ថា កម្ពុជាក៏កំពុងសហការជាមួយភ្នាក់ងារស៊ើបអង្កេតសហព័ន្ធអាមេរិក (FBI) ក្រសួងសន្តិសុខសាធារណៈចិន និងដៃគូអន្តរជាតិនានា ដើម្បីផ្លាស់ប្តូរព័ត៌មាន និងប្រមូលភស្តុតាងបន្ថែមសម្រាប់ដំណើរការនីតិវិធីរបស់តុលាការ។

លោក ឆៃ ស៊ីណារិទ្ធ បានបញ្ជាក់ថា បច្ចុប្បន្ន តុលាការបានចេញដីកាបង្គាប់ឱ្យចាប់ខ្លួនជនត្រូវចោទនៅក្នុងសំណុំរឿងនេះសរុបចំនួន ៣២ នាក់, បានបង្កាប់ដាក់ឱ្យស្ថិតក្រោមការត្រួតពិនិត្យតាមផ្លូវតុលាការលើជនត្រូវចោទចំនួន ៤ នាក់ និងបានឱ្យសមត្ថកិច្ចបន្តស្រាវជ្រាវកំណត់អត្តសញ្ញាណជនសង្ស័យចំនួន ៥ នាក់ ផ្សេងទៀត ព្រមទាំងទ្រព្យសម្បត្តិដែលមានការពាក់ព័ន្ធនឹងសំណុំរឿងនេះ។

ចំពោះទ្រព្យសម្បត្តិដូចជាអគារ កាស៊ីណូ អចលទ្រព្យជាច្រើនពាន់កន្លែង និងចលនទ្រព្យជាច្រើនពាក់ព័ន្ធនឹងសំណុំរឿងក្រុមហ៊ុនព្រីនស៍គ្រុប ត្រូវបានប៉ាន់ស្មានថា មានទឹកប្រាក់ស្មើក្នុងរង្វង់ជិតមួយពាន់លានដុល្លា និងត្រូវបានតុលាការសម្រេចបង្កក ខណៈពេលកំពុងពិនិត្យមូលដ្ឋានច្បាប់ និងភស្តុតាង ដើម្បីធ្វើការចាត់ចែងជាបណ្តោះអាសន្ននូវទ្រព្យដែលជាមធ្យោបាយប្រព្រឹត្តបទល្មើស ឬជាផលនៃបទល្មើស ឱ្យមកស្ថិតក្រោមការគ្រប់គ្រងឬជាសម្បត្តិរបស់រដ្ឋ ឬឈានទៅសម្រេចការរឹបអូសជាស្ថាពរស្របតាមច្បាប់ និងនីតិវិធីជាធរមាននាពេលខាងមុខ។

លោក ឆៃ ស៊ីណារិទ្ធ បានសង្កត់ធ្ងន់ថា បច្ចុប្បន្ន សមត្ថកិច្ចកម្ពុជាកំពុងសហការជាមួយភ្នាក់ងារ FBI របស់អាម៉េរិក, ក្រសួងសន្តិសុខសាធារណៈចិន និងដៃគូអន្តរជាតិនានា ក្នុងការបន្តស្រាវជ្រាវស៊ើបអង្កេត ស្នើសុំផ្លាស់ប្តូរព័ត៌មាន ដើម្បីប្រមូលភស្តុតាងជូនតុលាការធ្វើការសម្រេចផ្តន្ទាទោសជនល្មើស និងបណ្តាញក្រុមឧក្រិដ្ឋជន។