លោកស្រី ជា សេរី ថា សេដ្ឋកិច្ចកម្ពុជាបន្តរក្សាភាពធន់ដោយសារកម្ពុជាមានទុនបម្រុងអន្តរជាតិខ្ពស់គ្រប់គ្រាន់

ភ្នំពេញ៖លោកស្រី ជា សេរី ទេសាភិបាលធនាគារនៃជាតិកម្ពុជា បានអះអាងថា សេដ្ឋកិច្ចកម្ពុជានៅបន្តរក្សាភាពធន់ ខណៈទុនបម្រុងអន្តរជាតិមានកម្រិតខ្ពស់គ្រប់គ្រាន់សម្រាប់គាំទ្រស្ថិរភាពម៉ាក្រូសេដ្ឋកិច្ចជាតិ។ ការអះអាងដូច្នេះរបស់លោកស្រី ជា សេរី​ ធ្វើឡើងក្នុងជំនួបជាមួយឧបការីរងទទួលបន្ទុកតំបន់អាស៊ី និងប៉ាស៊ីហ្វិកនៃក្រសួងរតនាគារសហរដ្ឋអាមេរិក លោក Robert Kaproth នាថ្ងៃទី៩ ខែតុលា ឆ្នាំ២០២៦។ 

លោកស្រី ជា សេរី បន្តថា ទុនបម្រុងអន្តរជាតិរបស់កម្ពុជាក៏មានកម្រិតខ្ពស់គ្រប់គ្រាន់សម្រាប់គាំទ្រដល់ស្ថិរភាពម៉ាក្រូសេដ្ឋកិច្ចជាតិ។ ទេសាភិបាលធនាគារជាតិកម្ពុជារូបនេះ​​ក៏មិនបញ្ជាក់ពីការបន្តតាមដានការវិវត្តក្នុងវិស័យហិរញ្ញវត្ថុ និងកិច្ចសហការជាមួយស្ថាប័នពាក់ព័ន្ធដើម្បីពង្រឹងក្របខ័ណ្ឌគ្រប់គ្រងវិស័យហិរញ្ញវត្ថុ ពិសេសការគ្រប់គ្រងទ្រព្យសកម្មនិម្មិត។  

លោក Robert Kaproth  បង្ហាញការគាំទ្រចំពោះការយកចិត្តទុកដាក់របស់ធនាគារជាតិនៃកម្ពុជាលើការគ្រប់គ្រងទ្រព្យសកម្មនិមិ្មត ក៏ដូចជាបញ្ជាក់ពីលទ្ធភាពបន្តពិភាក្សាអំពីកិច្ចសហប្រតិបត្តិការបច្ចេកទេសក្នុងវិស័យហិរញ្ញវត្ថុនេះ។

កាលពីថ្ងៃទី៨ ខែតុលា ប្រធានព្រឹទ្ធសភាកម្ពុជាសម្តេចតេជោ ហ៊ុន សែន​ បានបង្ហាញទិន្នន័យជាសាធារណៈថា បច្ចុប្បន្នកម្ពុជាមានទុនបម្រុងមិនក្រោម​ ២ពាន់៥រយ​លានដុល្លារដាក់ក្នុងរតនាជាតិ។ សម្តេចតេជោឲ្យដឹងថា​ ​​​ការចំណាយ​លើប្រាក់​​បៀវត្សរ៍មន្ត្រីរាជការមានប្រមាណ ២៣០លានដុល្លារក្នុងមួយខែ ខណៈចំណូលរដ្ឋក្នុងរយៈពេល ៩ខែកន្លងទៅមានជាង ៥ពាន់លានដុល្លារ ឬជាមធ្យមប្រមាណពី ៥០០ ទៅ ៦០០លានដុល្លារក្នុងមួយខែ។

សូមបញ្ជាក់ថាមូលនិធិរូបិយវត្ថុអន្តរជាតិ (IMF) បានទម្លាក់ការព្យាករកំណើនសេដ្ឋកិច្ចកម្ពុជាមកនៅត្រឹម ៣% ខណៈការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ រំពឹងថា សេដ្ឋកិច្ចនឹងថយចុះមកត្រឹម ៤,៣% សម្រាប់ឆ្នាំ២០២៦នេះ។ ស្ថានភាពនៃអតិផរណាក៏ត្រូវបានវាយតម្លៃថា​​កំពុងបន្តហក់ឡើងយ៉ាងគំហុក ក្រោយតម្លៃប្រេងឥន្ធ​នៈ និងម្ហូបអាហារនាំចូលពីក្រៅប្រទេសកើនឡើង​​ខ្ពស់​។ កាលពីដើមឆ្នាំ២០២៦ ធនាគារជាតិនៃកម្ពុជា ដាក់ក្តីរំពឹងថា​ អតិផរណាកម្ពុជា​​នឹងស្ថិតក្នុងកម្រិតទាបត្រឹម ២,៣% ប៉ុណ្ណោះ តែក្រោយមកនៅដើមខែតុលា ឆ្នាំ២០២៦នេះ ធនាគារជាតិប៉ាន់ស្មានថា កម្រិតអតិផរណានឹងកើនឡើង ៥,៨%នាចុងឆ្នាំនេះ៕