សម្ដេចតេជោ ហ៊ុន សែន៖កាសែតបុលហ្គារី និយាយខុសពីកម្ពុជា ក្នុងការជីកព្រែកហ្វូណនតាមពិតអត់មានលុយចិន១យាន់ទេ!?
21-September-2026 / សេដ្ឋកិច្ច
ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី៧ ខែសីហា ឆ្នាំ២០២៤នេះ បានប្រតិកម្មឆ្លើយតបតចំពោះអត្ថបទពីកាសែតជាភាសារុស្សីមួយមានឈ្មោះថា «សេហ្គា» ដែលផ្សាយថ្ងៃទី0៥ សីហា បានសរសេរដាក់ចំណងជើងថា «ចិនបំបែក កម្ពុជាពីវៀតណាម ដោយបង្វែរចរាចរណ៍តាមបណ្ដោយ មេគង្គ»។
នៅក្នុងបណ្តាញសង្គមហ្វេសប៊ុក សម្ដេចតេជោ ហ៊ុន សែនបានបង្ហោះដែលខ្លឹមសារថា ៖ ”ខ្ញុំសូមពន្យល់និងដើម្បីជួយបញ្ជាក់ឲ្យបានច្បាស់ថា ការសាងសង់ព្រែកជីកហ្វូណនតេជោ ពុំមែនពឹងផ្អែកលើលុយចិនទាំងស្រុងឡើយ !» ។កម្ពុជា ពុំបានបោះបង់មិត្តណាមួយចោលឡើយ ! ការទំនាក់ទំនងជាមួយប្រទេសជាមិត្ត គឺសម្បូរបែប ដូចជាផ្កាចម្រុះពណ៌។ យើងរកស៊ីជាមួយប្រទេសជាច្រើនលើសកលលោក ហើយក៏មានប្រទេសជាច្រើន បានជួយដល់កម្ពុជា តែមិត្តចិន បានជួយដល់កម្ពុជា ក្នុងការបំពេញបន្ថែមនូវអ្វីដែលកម្ពុជាត្រូវការ ដែលពុំមានអ្នកណាមកជួយ ។ការលើកឡើងថា ព្រែកជីកនេះ បានបម្រើអោយនាវាយោធារបស់ចិន វាគ្រាន់តែជាក្តីស្រមៃរបស់អ្នកដែលច្រណែននឹងកម្ពុជាតែប៉ុណ្ណោះ ។កុំបារម្ភនឹងកម្ពុជា ! កម្ពុជា ចេះគិតហើយ ! កម្ពុជាពេលនេះ ត្រូវកំណត់ជោគវាសនាដោយខ្លួនឯង !
-ការឡើងកាន់តំណែងជានាយករដ្ឋមន្ត្រីរបស់សម្តេចមហាបវរធិបតី ហ៊ុន ម៉ាណែត គឺជាការឡើងកាន់អំណាចដោយការបោះឆ្នោត តាមបែបប្រជាធិបតេយ្យ ដូច អាមេរិក ដែល George W. Bush កូនរបស់លោក George Bush ដែរ !-ប្រទេសកម្ពុជា ត្រូវបានបំផ្លិចបំផ្លាញដោយសង្គ្រាម ! របបប៉ុលពត ១៩៧៥ ដល់ឆ្នាំ១៩៧៩ បានសម្លាប់ប្រជាជនជិត៣លាននាក់ ក្នុងនោះមានបញ្ញាជនជាច្រើន ហេដ្ឋារចនាសម្ព័ន្ធប្រទេសត្រូវបានបំផ្លិចបំផ្លាញគ្មានសល់ និងមានប្រទេសប៊ុលហ្គារីជាសាក្សីស្រាប់ ដែលបានមកឃើញ និងជួយកម្ពុជា នាឆ្នាំ១៩៧៩ នា ទ.វ ៨០ និង ៩០។
-រីឯបំណុលដែលកម្ពុជាបានខ្ចីពីបរទេស រួមទាំងប្រទេសចិន គឺជាកម្ចីសម្រាប់យកមកកសាងប្រទេស ដូចជា ផ្លូវ ស្ពាន ជាច្រើន និយាយរួម គឺចំណាយលើការសាងសង់ហេដ្ឋារចនាសម្ព័ន្ធរឹង ពុំមែនយកមកសម្រាប់ចំណាយចរន្តឡើយ ។
ការសាងសង់ព្រែកជីកហ្វូណនតេជោPAS និង PPAP កាន់កាប់ភាគហ៊ុន ៥១% និង OCIC ៤៩% នៅក្នុងការសាងសង់ព្រែកជីកហ្វូណនតេជោ !ការវិនិយោគរបស់កំពង់ផែទាំងពីរ នឹងគ្របដណ្តប់លើ ២១Km ហើយវាជាលើកដំបូងនៃការសាងសង់ និងមានគោលដៅសម្រាប់ប្រតិបត្តិការផ្លូវទឹក ស្របពេលដែល ៤៩%ទៀត នឹងគ្រប់គ្រងដោយ OCIC ។កំពង់ផែស្វយ័តក្រុងព្រះសីហនុ (PAS) ដែលបានចុះបញ្ជីជាសាធារណៈ និងកំពង់ផែស្វយ័តភ្នំពេញ (PPAP) នឹងរួមគ្នាកាន់កាប់ភាគហ៊ុន ចំនួន ៥១% នៅក្នុង Funan Techo Inland Waterways and Logistics Co.Ltd មានភារកិច្ចអភិវឌ្ឍន៍ព្រែកជីកហ្វូណនតេជោ ដែលមានតម្លៃ ១,៧ពាន់លាន$ ។ ព្រែកជីកនេះមានប្រវែង ១៨០Km ចាប់ពីខេត្តកណ្តាល ដល់ខេត្តកែប ។
យោងតាមឯកសាររបស់ផ្សារមូលបត្រកម្ពុជា (CSX) នៅថ្ងៃនេះ ការវិនិយោគរបស់កំពង់ផែទាំងពីរ នឹងគ្របដណ្តប់លើព្រែកជីកក្នុងប្រវែង ២១Kmដំបូង ។ ពួកគេក៏នឹងរួមគ្នាធ្វើការតាមផ្លូវទឹកផងដែរ ។
PAS ដែលនឹងកាន់កាប់ ២៦% នៅក្នុងប្រតិបត្តិការនេះបាននិយាយថា ប្រតិបត្តិការនៃការដ្ឋានព្រែកជីកហ្វូណនតេជោ នឹងជួយពង្រីកសមត្ថភាពដឹកជញ្ជូនតាមផ្លូវទឹករបស់ប្រទេសកម្ពុជាទៅកាន់ដែនសមុទ្រ ។ដូចគ្នានេះដែរ PPAP ដែលមានភាគហ៊ុន ២៥% បាននិយាយថាប្រតិបត្តិការរបស់ពួកគេ នឹងពង្រីកផ្លូវដឹកជញ្ជូនពីទីតាំងរបស់ខ្លួនទៅ «កំពង់ផែសមុទ្រក្នុងស្រុក និងគោលដៅអន្តរជាតិ» ។
ការរួមភាគហ៊ុននេះ គឺធ្វើឡើងតាមអនុសាសន៍របស់លោកនាយករដ្ឋមន្ត្រី ហ៊ុន ម៉ាណែត ដល់ពួកគេក្នុងការវិនិយោគលើគម្រោងព្រែកជីកជាប្រវត្តិសាស្ត្រ ដែលបានបើកការដ្ឋានសាងសង់កាលពីថ្ងៃទី៥សីហា២០២៤ ។
« PAS មានសេចក្តីសោមនស្សរីករាយ និងមានកិត្តិយសជាខ្លាំង ដែលលោក ហ៊ុន ម៉ាណែត នាយករដ្ឋមន្ត្រីនៃកម្ពុជា ជឿជាក់លើពួកយើង ហើយពួកយើង ពិតជាមានមោទនភាពចំពោះឱកាសក្នុងការរួមចំណែកដល់ការអភិវឌ្ឍន៍ព្រឹត្តិការណ៍ប្រវត្តិសាស្ត្រនេះ ក្នុងវឌ្ឍនភាពរបស់កម្ពុជា » នេះជាការលើកឡើងរបស់ PAS ។ទន្ទឹមនេះ ភាគហ៊ុនដែលនៅសល់ស្មើនឹង ៤៩% នឹងត្រូវកាន់កាប់ដោយក្រុមហ៊ុន Overseas Cambodia Investment Corp (OCIC) របស់អ្នកឧកញ៉ា ពុង ឃាវសែ ។
ដំបូងឡើយ កម្ពុជារំពឹងថា ការវិនិយោគរបស់ចិននឹងជាផ្នែកមួយនៃការអភិវឌ្ឍន៍គម្រោងព្រែកជីកនេះ ដោយផ្អែកលើគម្រូសាងសង់-ប្រតិបត្តិការ-ផ្ទេរ ។យ៉ាងណាមិញ អវត្តមាននៃការវិនិយោគពីបរទេសមានន័យថា ការបណ្តាក់ទុនពីក្នុងស្រុកនឹងកើតមានឡើងតាមរយៈភាពជាដៃគូទាំងសាធារណៈ និងឯកជន ។ការកាន់កាប់ភាគហ៊ុនដោយកំពង់ផែកម្ពុជា និងក្រុមហ៊ុន OCIC នៅក្នុងកិច្ចប្រតិបត្តិការនេះ តំណាងឱ្យការអភិវឌ្ឍន៍ពេញលេញរបស់កម្ពុជា ៕
