ក្រសួងការងារសម្របសម្រួលករណីបិទសហគ្រាស គ្រីអេត ប្រ៊ីដ បញ្ចប់ដោយធានាការទូទាត់ប្រាក់ឈ្នួលនិងអត្ថប្រយោជន៍ស្របច្បាប់ជូនកម្មករ

ខេត្តកណ្តាល៖ករណីសហគ្រាស គ្រីអេត ប្រ៊ីដ (SAHAKREAS CREATE BRIDGE) ស្ថិតនៅស្រុកកៀនស្វាយ ខេត្តកណ្តាល ដែលបានប្រកាសបិទលែងដំណើរការ ត្រូវបានក្រសួងការងារ និងបណ្តុះបណ្តាលវិជ្ជាជីវៈ ចុះអន្តរាគមន៍សម្របសម្រួលដោះស្រាយបញ្ចប់ដោយសន្តិវិធី ដោយភាគីសហគ្រាសបានឯកភាពទូទាត់ប្រាក់ឈ្នួល និងអត្ថប្រយោជន៍ស្របច្បាប់ជូនកម្មករនិយោជិតសរុបជាង២០០នាក់ រួមទាំងបងប្អូនស្ត្រីមានផ្ទៃពោះ។នេះបើតាមលោក ស៊ុន មេសា អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ ។ 

លោក ស៊ុន មេសា បញ្ជាក់ថា ករណីត្រូវបានដោះស្រាយបញ្ចប់ដោយកម្មករនិយោជិតទទួលបានអត្ថប្រយោជន៍ស្របច្បាប់ចំនួន៤ចំណុចរួមមាន៖ ប្រាក់ឈ្នួលដែលមិនទាន់បានបើក, ប្រាក់បំណាច់ជួសការឈប់សម្រាកប្រចាំឆ្នាំដែលនៅសល់, ប្រាក់បំណាច់បញ្ចប់កិច្ចសន្យាការងារ៥ភាគរយ និងប្រាក់ឈ្នួលដែលកម្មករនិយោជិតត្រូវទទួលរហូតដល់ពេលចប់កិច្ចសន្យាការងារ។ ទន្ទឹមនឹងនេះ ស្ត្រីមានផ្ទៃពោះចាប់ពី៩ខែក៏ទទួលបានប្រាក់លំហែមាតុភាពចំនួន៥០ភាគរយពីក្រុមហ៊ុនផងដែរ។

លោក ស៊ុន មេសា បញ្ជាក់ថា៖ “ក្រុមការងារក្រសួងបានដោះស្រាយយ៉ាងលឿន និងយកចិត្តទុកដាក់បំផុតជូនបងប្អូនកម្មករ ហើយមកទល់ពេលនេះកម្មករនិយោជិតប្រមាណជិត៦០ភាគរយបានទទួលប្រាក់ឈ្នួល និងអត្ថប្រយោជន៍របស់ខ្លួនតាមការសម្របសម្រួល ខណៈក្រុមហ៊ុននឹងបន្តអនុវត្តការទូទាត់ជូនកម្មករនិយោជិតដែលនៅសេសសល់ឱ្យបានគ្រប់ចំនួនតាមការឯកភាព”។

ទន្ទឹមនេះ ក្រសួងការងារក៏នឹងចាត់ក្រុមការងារនៃទីភ្នាក់ងារជាតិមុខរបរ និងការងារ (NEA) ចុះជួយសម្របសម្រួលស្វែងរកឱកាសការងារថ្មីជូនបងប្អូនកម្មករនិយោជិតដែលរងផលប៉ះពាល់ ដើម្បីឱ្យពួកគេអាចបន្តមានការងារ និងប្រាក់ចំណូលសម្រាប់ទ្រទ្រង់ជីវភាពគ្រួសារ៕