ប៉ូលិសស្រុកកៀនស្វាយ បញ្ជូនវេជ្ជបណ្ឌិត និងម្ចាស់គ្លីនិកទៅតុលាការ ករណីវាយដំស្ត្រីស្នេហ៍ ដោយសារស្រលាញ់ពេក

កណ្តាល៖ សមត្ថកិច្ចនៃអធិការដ្ឋាននគរបាលស្រុកកៀនស្វាយនៅរសៀលថ្ងៃទី៥ ខែតុលា ឆ្នាំ២០២៦  បានបញ្ជូនវេជ្ជបណ្ឌិតម្នាក់ ដែលជាម្ចាស់គ្លីនិកឯកជន ទៅសាលាដំបូងខេត្តកណ្តាល ដើម្បីចាត់ការតាមនីតិវិធីច្បាប់ ពាក់ព័ន្ធករណីប្រើអំពើហិង្សាដោយចេតនា វាយដំលើស្ត្រីជាគូស្នេហ៍ បណ្តាលឱ្យរងរបួសនៅលើផ្ទៃមុខ ដោយសារភ្លើងប្រចណ្ឌហើយត្រូវឃាត់ខ្លួន ក្រោយទទួលបានពាក្យបណ្តឹងពីស្ត្រីរងគ្រោះ។ 

តាមប្រភពពីសមត្ថកិច្ច ហេតុការណ៍ហឹង្សានេះបានកើតឡើងនៅវេលាម៉ោងប្រមាណ ៣:៣០នាទីរសៀល ថ្ងៃទី៣ ខែតុលា ឆ្នាំ២០២៦ ស្ថិតនៅភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល។

ប្រភពដដែលបានឱ្យដឹងថា មូលហេតុផ្តើមចេញពីទំនាស់ពាក្យសម្តី និងការប្រចណ្ឌ រហូតធ្វើឱ្យជនសង្ស័យខឹងសម្បារ និងប្រើកណ្តាប់ដៃវាយទៅលើផ្ទៃមុខស្ត្រីរងគ្រោះ បណ្តាលឱ្យរងរបួស និងហើមប៉ោង។បច្ចុប្បន្ន ជនសង្ស័យត្រូវបានបញ្ជូនទៅសាលាដំបូងខេត្តកណ្តាល ដើម្បីបន្តនីតិវិធី និងចាត់ការតាមច្បាប់ពាក់ព័ន្ធនឹងករណីខាងលើ៕