ប៉ូលិសថៃបង្រ្កាបបណ្តាញ Online Scam ធ្វើប្រតិបត្តិការចេញពីភូមិគ្រឹះមួយកន្លែង ក្នុងទីក្រុងបាងកក 

ប្រទេសថៃ៖ កាលពីយប់ថ្ងៃពុធ ទី១៦ ខែកញ្ញា ឆ្នាំ២០២៦ ប៉ូលិសអន្តោប្រវេសន៍ថៃ បានចុះឆែកឆេរភូមិគ្រឹះប្រណីតមួយកន្លែង នៅសង្កាត់ Bang Bon នៃទីក្រុងបាងកក ហើយឃាត់ខ្លួនមនុស្ស ១៥នាក់ ដែលពួនសំងំធ្វើប្រតិបត្តិការឆបោកតាមប្រព័ន្ធបច្ចេកវិទ្យា ឬ online scam ចេញពីទីនោះ ដោយផ្តោតគោលដៅលើជនរងគ្រោះជាជនជាតិជប៉ុន។ នេះបើតាមការចេញផ្សាយដោយ សារព័ត៌មានថៃ Khaosod។ 

ប៉ូលិសអន្តោប្រវេសន៍នៃប្រទេសថៃ បានប្រាប់ថា ប្រតិបត្តិការចុះបង្ក្រាបខាងលើធ្វើឡើង ក្រោយមានការផ្តល់ដំណឹងពីសំណាក់ប្រជាជន ដែលមានការព្រួយបារម្ភ ហើយបានរាយការណ៍ពីការប្រទះឃើញ ចំនួនជនបរទេសច្រើនចេញចូលភូមិគ្រឹះខាងលើ ក្រោមកាលៈទេសៈ​ដែលគួរឱ្យសង្ស័យ។ ក្រោយទទួលបានដីកាឆែកឆែរ ក្រុមប៉ូលិសថៃក៏បានចុះទៅឆែកឆេរភូមិគ្រឹះនោះ ហើយរកឃើញថា វាជាកន្លែងធ្វើប្រតិបត្តិការ​ online scam។

ប៉ូលិសថៃ បាននិយាយថា ភូមិគ្រឹះខាងលើត្រូវបានជួលតាមរយៈជនជាតិថៃម្នាក់ ដែលដើរតួតំណាងឱ្យមេជនជាតិចិនម្នាក់ សម្រាប់រយៈពេលជាង ​១ឆ្នាំមកនេះ ហើយតម្លៃនៃការជួល គឺថ្លៃរហូតដល់៩០០ ០០០បាត ឬ២៧ ០០០ដុល្លារអាមេរិក ក្នុងមួយខែ។ ជនសង្ស័យសរុប១៥នាក់ ត្រូវបានចាប់ខ្លួន ក្នុងនោះមានម្នាក់ជាជនជាតិថៃ និង១៤នាក់ផ្សេងទៀតជាជនបរទេស មកពីជប៉ុន ចិន កោះតៃវ៉ាន់ និងមីយ៉ាន់ម៉ា។

គួរបញ្ជាក់ថា បើតាមក្រុមអ្នកស៊ើបអង្កេត មនុស្សទាំង១៥នាក់នោះ ទំនងត្រឹមជាបុគ្គលិកប៉ុណ្ណោះ ខណៈជនសង្ស័យដែលជាមេធំជនជាតិចិន ត្រូវបានជឿថា កំពុងបន្តស្ថិតក្នុងប្រទេសថៃនៅឡើយ ហើយអាជ្ញាធរកំពុងតាមឃ្លាំមើលច្រកផ្លូវនានា ដែលអាចប្រើប្រាស់ដើម្បីចាកចេញពីប្រទេសនេះ ដោយខុសច្បាប់៕