នាយករដ្ឋមន្ត្រីឥណ្ឌាដកថយការរឿងដាក់ទណ្ឌកម្មសិស្សដែលជេរប្រមាថលោកក្នុងការតវ៉ាប្រឆាំងនឹងការបែកធ្លាយវិញ្ញាសារប្រឡង

ប្រទេសឥណ្ឌា៖លោក Narendra Modi នាយករដ្ឋមន្ត្រីឥណ្ឌាចង់អភ័យទោសដល់និស្សិតដែលបានជេរប្រមាថលោកក្នុងអំឡុងពេលតវ៉ាកាលពីខែមុន។ លោកនិយាយថាការដាក់ទណ្ឌកម្មដល់ក្រុមនិស្សិតទាំងនោះ និងបង្ខំពួកគេឱ្យបង្ហាញខ្លួននៅតុលាការ នឹងមិនបានជួយដោះស្រាយស្ថានការណ៍ឱ្យប្រសើរនោះទេ។ លោក Narendra Modi បន្តថា កំហុសដែលធ្វើឡើងចំពោះយុវជន គួរតែត្រូវបានកែតម្រូវតាមរយៈការណែនាំជាជាងសកម្មភាពផ្លូវច្បាប់។ 

សូមបញ្ជាក់ថា៖វិបត្តិនយោបាយដ៏ធំបំផុតនៃអាណត្តិទីបីរបស់លោក Modi បានកើនឡើង ក្រោយផ្ទុះការតវ៉ាតាំងពីចុងខែមិថុនា បន្ទាប់ពីលេចធ្លាយសំណួរប្រឡងចូលរៀនផ្នែកវេជ្ជសាស្ត្រថ្នាក់ជាតិ ដែលបង្ខំឱ្យអាជ្ញាធររៀបចំការប្រឡងឡើងវិញ និងប៉ះពាល់ដល់សិស្សនិស្សិតប្រមាណ ២ លាននាក់។ ករណីនេះបានបង្កឱ្យមានការខឹងសម្បារយ៉ាងខ្លាំងពីយុវជន ដែលលើកឡើងពីបញ្ហាភាពមិនត្រឹមត្រូវក្នុងការប្រឡង កង្វះឱកាសការងារក្នុងចំណោមយុវជនឥណ្ឌា និងទាមទារឱ្យរដ្ឋាភិបាលទទួលខុសត្រូវ។

នៅក្នុងការតវ៉ានោះ អាជ្ញាធរឥណ្ឌាបានដាក់ពាក្យបណ្តឹងប្រឆាំងនឹងក្រុមបាតុកររាប់រយនាក់ បន្ទាប់ពីអ្នកតវ៉ាបានប៉ះទង្គិចជាមួយកងសន្តិសុខ និងស្រែកជេរប្រមាថដល់នាយករដ្ឋមន្ត្រី។

លោក Modi បាននិយាយនៅក្នុងវីដេអូមួយដែលបានបង្ហោះនៅលើប្រព័ន្ធផ្សព្វផ្សាយសង្គមនៅយប់ថ្ងៃទី៣១ កក្កដា ថា៖ «ពាក្យសម្ដីត្រូវបានប្រើប្រាស់មិនត្រឹមតែសំដៅទៅលើខ្ញុំប៉ុណ្ណោះទេ ប៉ុន្តែថែមទាំងសំដៅទៅលើម្តាយដែលបានស្លាប់របស់ខ្ញុំទៀតផង.. ខ្ញុំចង់អភ័យទោសឱ្យពួកគេ»។ «កំហុសដែលកើតឡើងក្នុងវ័យកុមារភាព គួរតែត្រូវបានកែតម្រូវតាមរយៈការណែនាំជាជាងសកម្មភាពផ្លូវច្បាប់។ ការបង្ហាញពួកគេនូវផ្លូវត្រូវ គឺជាកាតព្វកិច្ចរបស់យើង។ ការដាក់ទណ្ឌកម្មពួកគេ ឬធ្វើទារុណកម្មពួកគេនៅ នឹងមិនផ្លាស់ប្តូរស្ថានភាពនោះទេ»។

បន្ទាប់ពីរដ្ឋមន្ត្រីក្រសួងអប់រំឥណ្ឌាបានលាលែងពីតំណែង ហើយរដ្ឋាភិបាលបានទទួលយកការទាមទារទាំងអស់ ដែលរួមមានកំណែទម្រង់នៅក្នុងប្រព័ន្ធប្រឡង និងការលុបចោលបណ្តឹងរបស់ប៉ូលីស មេដឹកនាំចលនា Cockroach Janta Party (CJP) ក៏បានប្រកាសបញ្ចប់ការធ្វើបាតុកម្ម និងអំពាវនាវឱ្យអ្នកគាំទ្រវិលត្រឡប់ទៅផ្ទះដោយសន្តិវិធី។ ក្រុមបាតុករដែលដឹកនាំដោយចលនា Cockroach Janta Party (CJP) បាននិយាយថា និស្សិតរាប់រយនាក់ ត្រូវបានចាប់ខ្លួននៅក្នុងរដ្ឋផ្សេងៗគ្នា ក្នុងតវ៉ា។

ការតវ៉ាទាំងនេះក៏បានជំរុញឱ្យរដ្ឋាភិបាលលោក Modi ដាក់ចេញសេចក្តីព្រាងច្បាប់មួយនៅក្នុងសភា ដើម្បីធ្វើវិសោធនកម្មច្បាប់គ្រប់គ្រងការប្រឡងសាធារណៈ ដោយស្នើឱ្យអ្នកដែលពាក់ព័ន្ធនឹងការលេចធ្លាយឯកសារប្រឡង ជាប់ពន្ធនាគារយូរជាងនេះ និងពិន័យជាប្រាក់ខ្ពស់ជាងមុន៕