វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4396 នាក់
ម្សិលមិញ 6001 នាក់
សរុប 13877226 នាក់
ហុងកុង៖ទីក្រុងហុងកុងចូលដល់ខែទី៦នៃការធ្វើបាតុកម្មតវ៉ា បានធ្វើឲ្យទីក្រុងនេះប្រែក្លាយ ពីទីក្រុងសេដ្ឋកិច្ចឈានមុខ មកជាទីក្រុងចលាចល ហើយការតវ៉ាកាន់តែតានតឹងក្នុងពេលសមត្តកិច្ចប៉ូលិស ឈានដល់ការប្រើគ្រាប់ពិតបង្ក្រាប។
សារព័ត៌មាន Reuters នៅថ្ងៃទី១១ ខែវិច្ឆិកាបានរាយការណ៍ឲ្យដឹងថា ក្នុងការបង្ក្រាបក្រុមបាតុកម្មនៅថ្ងៃចន្ទនេះ ប៉ូលិសហុងកុងបានបាញ់រះទៅលើក្រុមបាតុករ ហោចណាស់មានមនុស្សម្នាក់បានរងរបួស ដោយការបាញ់កាំភ្លើងដោយប្រើគ្រាប់ពិត។រូបភាពវីដេអូ បានបង្ហាញពីអ្នកតវ៉ាម្នាក់ដែលដេកនៅក្នុងថ្លុកឈាមដោយបើកភ្នែកធំ ៗ ហើយវីដេអូនេះ ត្រូវបានចែកចាយនៅលើបណ្តាញសង្គមបានបង្ហាញថាប៉ូលីសក៏បានបាញ់ថ្នាំ និងបង្ក្រាបស្ត្រីម្នាក់នៅក្បែរនោះផងដែរ ខណៈដែលក្រុមបាតុករបានគប់សំរាមលើសមត្ថកិច្ច។
នៅក្នុងថ្ងៃច័ន្ទ ទី១១វិច្ឆិកាដដែល គឺមានបាតុករមួយរូបទៀត ត្រូវគេដុតឆេះខ្លួន។ តាមវីដេអូដែលគេបង្ហោះផ្សាយ គឺឃើញសកម្មភាពថា បុរសម្នាក់បានចាក់សាំងទៅលើបុរសម្នាក់ទៀត ដែលមានម៉ាស់បិទមុខពណ៌ខ្មៅ ហើយក៏ដុតបណ្តាលឱ្យឆេះភ្លាមឡើង។ ភ្លាមៗ ប៉ូលិសបានចោទប្រកាន់មនុស្សប្រុសម្នាក់ដែលចាកប្រេងសាំងលើបាតុករ ថាជាអ្នកទទួលខុសត្រូវចំពោះហិង្សាដុតខ្លួនមនុស្សបែបនេះ និងចាត់ទុកអំពើនេះ ជាបទល្មើសកុប្បកម្ម។
អំពើហិង្សាទាំងនេះ គឺជាទម្ងន់បន្ថែមទៀត នាំឱ្យគេគិតដល់ការប៉ះទង្គិចគ្នារវាងប៉ូលិសនិងបាតុករ ធ្វើឱ្យបុរសវ័យ២២ឆ្នាំម្នាក់ ធ្លាក់ពីអាគារចំណតឡាន កម្ពស់៥ជាន់ និងដែលទើបតែស្លាប់កាលពីថ្ងៃសុក្រ សប្តាហ៍មុន ក្នុងសង្កាត់សឹងក្វាន់អូ។ គ្រោះថ្នាក់បាត់បង់ជីវិតនេះ កើតឡើងដោយសារតែរូបគេប្រឹងរត់គេចពីការបាញ់ឧស្ម័នបង្ហូរទឹកភ្នែករបស់ប៉ូលីស។
កាលពីយប់ថ្ងៃអាទិត្យទី១០វិច្ឆិកា ភាពវឹកវរបានកើតមាននៅទីទាំងទីក្រុងហុងកុង ដោយប៉ូលិសបានបាញ់គ្រាប់បែកផ្សែងហើយពួកអ្នកប្រឆាំងតវ៉ា បានបិទផ្លូវនិងវាយបំផ្លាញហាងទំនិញចំពេលពួកបាតុករបញ្ចេញកំហឹងចំពោះការស្លាប់របស់សកម្មជននិស្សិតម្នាក់និងការចាប់ខ្លួនពួកសមាជិកសភាគាំទ្រលទ្ធិប្រជាធិបតេយ្យ។
កាលពីថ្ងៃសៅរ៍ ប៉ូលិសបានប្រកាសអំពីការចាប់ខ្លួនសមាជិកសភា៦នាក់ចំពោះការរារាំងការជួបជុំមួយកាលពីខែឧសភា តែពួកគេបានបង់ប្រាក់ធានាខ្លួននៅក្រៅឃុំ។កាលពីថ្ងៃសុក្រ ពួកអ្នកតវ៉ាប្រឆាំងបាននាំគ្នាកាន់ទុក្ខសពនិស្សិតម្នាក់ដែលបានស្លាប់ដោយរបួសពីការធ្លាក់ពីយានដ្ឋានមួយក្នុងពេលរត់គេចពីការបង្ក្រាបរបស់ប៉ូលិស។
មនុស្សជាង៣.៣០០នាក់ត្រូវបានចាប់ខ្លួនចាប់តាំងពីការចាប់ផ្តើមចលនាប្រឆាំងតវ៉ានៅក្នុងមជ្ឈមណ្ឌលហិរញ្ញវត្ថុនេះមក។ក្រុមអ្នកតវ៉ាមានការខឹងសម្បារចំពោះអ្វីដែលពួកគេមើលឃើញថាជាភាពសាហាវឃោរឃៅរបស់ប៉ូលិស និងការជ្រៀតជ្រែកដោយទីក្រុងប៉េកាំងនៅក្នុងសេរីភាពរបស់អតីតអាណានិគមអង់គ្លេសដែលធានាដោយរូបមន្ត“ ប្រទេសមួយប្រព័ន្ធពីរ” ដែលត្រូវបានអនុវត្តនៅពេលដែលទឹកដីនេះបានវិលត្រឡប់ទៅរកការគ្រប់គ្រងរបស់ចិនក្នុងឆ្នាំ ១៩៩៧។
សូមបញ្ជាក់ថា ហុងកុងកំពុងស្ថិតក្នុងភាពវឹកវរបណ្តាលមកពីការតវ៉ាប្រឆាំងអស់ពេល៦ខែ ក្រោយពីវាបានចាប់ផ្តើមនៅខែមិថុនា ដោយដំបូងតវ៉ាអំពីច្បាប់បត្យាប័នតែពួកបាតុករបង្កើនការទាមទារនិងតវ៉ាតវ៉ាប្រឆាំងរបស់គេទោះជាច្បាប់ដ៏ចម្រូងចម្រាសនេះត្រូវបានលុបចោលហើយក្តី។