វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1243 នាក់
ម្សិលមិញ 5168 នាក់
សរុប 16013377 នាក់
ភ្នំពេញ៖ សម្ដេចតេជោ ហ៊ុន សែននាយករដ្ឋមន្ដ្រីនៃកម្ពុជា បានដឹកនាំប្រតិភូជាន់ខ្ពស់ នៃរាជរដ្ឋាភិបាលកម្ពុជា បានត្រឡប់មកដល់មាតុប្រទេស ប្រកបដោយសុវត្ថិភាពហើយ នៅវេលាម៉ោង៦ល្ងាចថ្ងៃទី០១ ខែធ្នូ ឆ្នាំ២០១៨នេះបន្ទាប់ពីបានបញ្ចប់ដំណើរទស្សនកិច្ចផ្លូវការ និងកិច្ចប្រជុំកំពូលអាស៊ី-ប៉ាស៊ីហ្វិក នៅប្រទេសនេប៉ាល់។
ក្នុងបេសកកម្មការងារ នៅប្រទេសនេប៉ាល់ សម្តេចតេជោ ហ៊ុន សែន បានជួបពិភាក្សាការងារជាមួយ នាយករដ្ឋមន្ត្រីនៃប្រទេសនេប៉ាល់ លោក ខាត់ ហ្គា ប្រាសាទ ស្សាម៉ា អូលី (Khadga Prasad Shama Oli) ។ នាយករដ្ឋមន្ដ្រីនៃប្រទេសទាំងពីរ ក៏បានធ្វើជាអធិបតីភាព ក្នុងការចុះហត្ថលេខាលើឯកសារសំខាន់ៗ ចំនួន៤ផងដែរ។ ឯកសារទាំង៤ ដែលបានចុះហេត្ថលេខានោះ រួមមាន៖ ការលើកលែងទិដ្ឋាការ (Visa) សម្រាប់លិខិតឆ្លងដែនការទូត និងផ្លូវការនិងបើកស្ថានទូតនៃប្រទេសទាំងពីរ ក្នុងពេលឆាប់ៗខាងមុខនេះ, កិច្ចព្រមព្រៀងពាក់ព័ន្ធវិស័យដឹកជញ្ជូន តាមផ្លូវអាកាស, អនុស្សារណៈយោគយល់គ្នារវាងក្រសួងការបរទេសទាំងពីរ និងកិច្ចសហប្រតិបត្តិការលើវិស័យនយោបាយ សេដ្ឋកិច្ច និងវប្បធម៌។
នៅព្រឹកថ្ងៃទី៣០ ខែវិច្ឆិកា ឆ្នាំ២០១៨ ដែលជាថ្ងៃទី២ នៃការស្នាក់អាស្រ័យបំពេញទស្សនកិច្ចផ្លូវការ និងអញ្ជើញចូលរួមកិច្ចប្រជុំកំពូល អាស៊ី-ប៉ាស៊ីហ្វិក នៅទីក្រុងកដ្ឋមន្ឌូ សាធារណរដ្ឋសហព័ន្ធប្រជាធិបតេយ្យនេប៉ាល់ សម្តេចតេជោ ហ៊ុន សែន និងគណៈប្រតិភូជាន់ខ្ពស់ រាជរដ្ឋាភិបាលកម្ពុជា បានអញ្ជើញទស្សនាប្រាសាទបុរាណចំនួន២កន្លែង ក្នុងទីក្រុងកដ្ឋមន្ឌូ ក្នុងនោះរួមមាន ប្រាសាទបុរាណ ក្នុងវិសានដ្ឋានប៉ាតាន់ឌួបា និងហ៊ីរ៉ាន់យ៉ា ម៉ាហាវិហារ ប្រាសាទមាស ព្រះវិហាព្រះពុទ្ធសាសនាមាយាន របស់ប្រទេសនេប៉ាល់។
សម្ដេចតេជោ ហ៊ុន សែន ក៏បានជួបជាមួយ លោកស្រី Bidhya Devi Bhandari (ប៊ីដយ៉ា ដេវី បាន់ដារី) ប្រធានាធិបតីនេប៉ាល់ផងដែរ។ ភាគីទាំងពីរ ក៏ចុះកិច្ចព្រមព្រៀងគ្នាលើកិច្ចសហប្រតិបត្តិការ ហោះហើរត្រង់លើវិស័យអាកាសចរស៊ីវិល ក្នុងពេលឆាប់ៗនេះ។សម្តេចតេជោ ហ៊ុន សែន បានបញ្ជាក់ថា ការព្រមព្រៀងនេះ គឺជាផ្នែកមួយដែលជំរុញ ទំនាក់ទំនងរវាងប្រជាជន និងប្រជាជន នៃប្រទេសទាំងពីរ ហើយសម្តេចតេជោ ពិតជាមានបំណងមកបំពេញទស្សនកិច្ចនៅក្នុងប្រទេសនេប៉ាល់យូរមកហើយ ហើយដំណើរទស្សនកិច្ច នៅប្រទេសនេប៉ាល់ នៅពេលនេះគឺជាការចាប់ផ្តើមទំនាក់ទំនងការទូតកម្រិតខ្ពស់រវាងប្រទេសទាំងពីរ។
ដោយឡែក ក្នុងឱកាសចូលរួមកិច្ចប្រជុំកំពូលអាស៊ី-ប៉ាស៊ីហ្វិកឆ្នាំ២០១៨ នៅនេប៉ាល់ សម្តេចតេជោ ហ៊ុន សែន ក៏បានអញ្ជើញថ្លែងសុន្ទរកថា ស្របតាមមូលបទ នៃកិច្ចប្រជុំកំពូលអាស៊ី-ប៉ាស៊ីហ្វិក២០១៨-នេប៉ាល់ «ការដោះស្រាយបញ្ហាប្រឈមសំខាន់ៗនៃយុគសម័យរបស់យើង៖ ការពឹងអាស្រ័យគ្នា វិបុលភាពទៅវិញទៅមក និងតម្លៃជាសាកល»។