ខណៈសំណង់អនាធិបតេយ្យជាច្រើនកន្លែងកំពុងត្រូវបានរុះរើរដ្ឋមន្ត្រីបរិស្ថានប្រកាសថែមថា មិនអនុញ្ញាតឱ្យកើតមានសំណង់ថ្មីលើឧទ្យានជាតិគិរីរម្យទេរួមទាំងកែសម្រួលនៅសាលាដូងដែរ

កំពង់ស្ពឺ៖ លោក អ៊ាង សុផល្លែត រដ្ឋមន្ត្រីក្រសួងបរិស្ថាននៅព្រឹកថ្ងៃទី១៩ ខែសីហា ឆ្នាំ២០២៦  បានដាក់វិធានការយ៉ាងតឹងរឹងទៅដល់មន្ត្រីជំនាញ និងអាជ្ញាធរពាក់ព័ន្ធ ឱ្យពិនិត្យ និងចាត់វិធានការផ្លូវច្បាប់ចំពោះសំណង់ទាំងឡាយណាដែលព្យាយាមបង្កើតថ្មី និងអ្នកដែលទន្រ្ទានឈូសឆាយដីធ្លីអនាធិបតេយ្យនៅក្នុងតំបន់ឧទ្យានជាតិព្រះសុរាម្រិតកុសមៈ(គិរីរម្យ) ។ 

ក្នុងឱកាសដឹកនាំក្រុមការងារ អាជ្ញាធរខេត្ត និងមន្ទីរជំនាញចុះពិនិត្យសំណង់ ផ្ទះលំហែដែលបាននិងកំពុងសង់ដោយខុសច្បាប់នៅក្នុងតំបន់ឧទ្យានជាតិព្រះសុរាម្រិតកុសមៈ(គិរីរម្យ) ស្ថិតក្នុងស្រុកភ្នំស្រួច ខេត្តកំពង់ស្ពឺ លោក អ៊ាង សុផល្លែត បានលើកឡើងថា នៅប៉ុន្មានថ្ងៃចុងក្រោយនេះ មន្ត្រីបរិស្ថានបានពិនិត្យឃើញសំណង់ និងផ្ទះលំហែជាច្រើន បាននិងកំពុងសង់ដោយខុសច្បាប់ ដែលធ្វើឱ្យប៉ះពាល់ដល់យ៉ាងធ្ងន់ធ្ងរសណ្តាប់ធ្នាប់ របៀបរៀបរយ សោភ័ណភាព និងបរិស្ថាននៅក្នុងតំបន់ឧទ្យានជាតិ ពិសេសទេសចរណ៍ដែលមកលេងកម្សាន្តនៅក្នុងតំបន់នេះ។ មួយវិញទៀតសំណង់មិនរៀបរយទាំងនោះក៏បាននិងកំពុងសង់រំលោភចូលទៅក្នុងតំបន់ប្រវត្តិសាស្ត្រយោធាតេជោគីរីរម្យផងដែរ ដែលតម្រូវឱ្យមានការរុះរើចេញជាបន្ទាន់។

លោក អ៊ាង សុផល្លែត ក៏បានលើកឡើងជុំវិញការរុះរើសំណង់អនាធិបតេយ្យនៅក្នុងតំបន់ឧទ្យានជាតិសុរាម្រិតកុសមៈ(គីរីរម្យ) ក៏មានការភ្ញាក់ផ្អើលផងដែរថាមានការរុះរើសាលាដូង ដោយសារតែបានសង់ចូលទៅក្នុងតំបន់ប្រវត្តិសាស្ត្រយោធាតេជោគីរីរម្យ។ ប៉ុន្តែក្រោយការពិនិត្យរបស់មន្ត្រីជំនាញបរិស្ថាន បានបញ្ជាក់ថា សាលាដូងមិនមានការជាប់ពាក់ព័ន្ធនិងតំបន់ប្រវត្តិសាស្ត្រយោធាតេជោគីរីរម្យដែលតម្រូវឱ្យមានការរុះរើទេ។ ប៉ុន្តែមានចំណុចមួយចំនួនតម្រូវឱ្យសាលាដូងត្រូវកែសម្រួលឡើងវិញ ដើម្បីបញ្ជៀសផលប៉ះពាល់ដល់បរិស្ថាន ដូចជារុះរើបណ្តាញខ្សែភ្លើង ហើយជំនួសមកវិញនូវសោឡាដែលអាចប្រើប្រាស់បានទូទៅក្រោមការឧបត្ថម្ភពីលោករដ្ឋមន្ត្រីផ្ទាល់ ។

សូមរំលឹកផងដែរថា នៅព្រឹកថ្ងៃទី១៩សីហាដែរសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានៅក្នុងពិធីសំណេះសំណាលជាមួយអាចារ្យយាយជី បានធ្វើកោតសរសើរទៅដល់ទឹកចិត្ត ឆន្ទៈមោះមុត និងសកម្មភាពជាក់ស្ដែងរបស់ លោក អ៊ុក វណ្ណដេ ស្ថាបនិកសាលាដូង ក្នុងការបង្កើតសមិទ្ធផលដ៏ មានប្រយោជន៍មួយនេះ ទោះជាមិនមានធនធានផ្ទាល់ខ្លួនច្រើនក៏ដោយ។ ផ្តើមចេញពីការខ្ចីដីក្នុងដែនឧទ្យានជាតិគីរីរម្យ ដើម្បីបង្កើតសាលាដូង ការខិតខំខ្នះខ្នែងកៀរគរធនធានពីសប្បុរសជននានា រួមទាំងការព្យាយាមសុំប្រជាពលរដ្ឋក្នុងភូមិអនុញាតិឱ្យកូនៗពួកគាត់បានមកទទួលការបណ្តុះបណ្តាលបំណិននៅសាលាដូង ក្រោមការបង្រៀនដោយស្ម័គ្រចិត្តពី លោក អ៊ុក វណ្ណដេ និងលោកគ្រូ អ្នកគ្រូ ដើម្បីជួយលើកកម្ពស់ចំណេះដឹងនិង បំណិនដល់ក្មួយៗជាង ១៥០នាក់នៅក្នុងភូមិ ដែលនេះគឺជា សកម្មភាពផ្ដល់ផលប្រយោជន៍វិជ្ជមានពិតៗដល់សង្គមនិងប្រជាជន។

សម្តេចធិបតី ហ៊ុន ម៉ាណែត ក៏បានប្រគល់ភារកិច្ចជូន លោក អ៊ាង សុផល្លែត រដ្ឋមន្រ្តី ក្រសួងបរិស្ថាន និងលោក ជាម ច័ន្ទសោភ័ណ្ឌ អភិបាលនៃ គណៈអភិបាលខេត្តកំពង់ស្ពឺ ចាត់តាំងមន្រ្តីជំនាញចុះពិនិត្យនិង ផ្ទៀងផ្ទាត់ជាបន្ទាន់នៅលើទីតាំងជាក់ស្តែង ដើម្បីរៀបចំនូវ ដំណោះស្រាយមួយឱ្យបានសមស្រប និងមានចីរភាព ដែលអាចធានាថាសាលាដូងអាចនៅបន្តដំណើរការបណ្ដុះបណ្តាលដល់ក្មួយៗនៅទីនោះ ៕