វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1333 នាក់
ម្សិលមិញ 6501 នាក់
សរុប 13949888 នាក់
ភ្នំពេញ៖ លោកឧត្តមសេនីយ៍ឯក ជីវ ផល្លី ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន នៅថ្ងៃទី២៤ ខែមីនា ឆ្នាំ ២០២១ បានឲ្យដឹងថា កម្លាំងសមត្ថកិច្ចជំនាញ បានរំដោះក្មេងស្រីរងគ្រោះជនជាតិខ្មែរចំនួន ៣នាក់ ដែលត្រូវបានមេខ្យល់ឆបោកនាំយកទៅប្រទេសចិន បានត្រឡប់មកដល់ប្រទេសកម្ពុជាវិញ កាលពីថ្ងៃទី២៣ ខែមីនា ឆ្នាំ២០២១ វេលាម៉ោង ២៣ និង១៥នាទីយប់ តាមជើងយន្តហោះលេខ.MU759 តាមច្រកអាកាសយាន្តដ្ឋានអត្តរជាតិភ្នំពេញ។ នេះបើតាមហ្វេសប៊ុក ការពិតរបស់ GCNP ។
ក្មេងស្រីរងគ្រោះទាំង៣នាក់នេះ រួមមានឈ្មោះ៖ ទី១. យ៉េន សុជាតា ;ទី២.សុខ ណា ;និងទី៣. សៀន ស្រីណុច មានទីលំនៅ ស្រុកតំបែ ខេត្តត្បូងឃ្មុំ ។ បច្ចុប្បន្នក្មេងស្រីរងគ្រោះខាងលើ បាននិងកំពុងអនុវត្តវិធានចត្តាឡីស័ករយ:ពេល ១៤ថ្ងៃ នៅមណ្ឌលចត្តាឡីស័កវិទ្យាល័យពោចិនតុង រាជធានីភ្នំពេញ។កាលពីថ្ងៃទី២១ ខែធ្នូ ឆ្នាំ ២០២០ ម្ចាស់គណនីហ្វេសប៊ុកឈ្មោះ Ny Ka Met Ma បានផ្ញើសារចូលក្នុងប្រអប់សារគេហទំព័រ របស់ក្រុមប្រតិកម្មរហ័សនៃ អគ្គស្នងការដ្ឋាននគរបាលជាតិឈ្មោះ “ការពិតជា GCNP” ដោយសំណូមពរឲ្យអាជ្ញាធរ ជួយអន្តរាគមន៍សង្គ្រោះនាងមកកម្ពុជាវិញ ដោយពុំអាចស៊ូទ្រាំនឹងការធ្វើទារុណកម្ម អាហារហូបចុកមិនគ្រប់គ្រាន់ និងបង្ខាំងគ្មានសេរីភាព ព្រមទាំងគំរាមសម្លាប់” ។ បន្ទាប់មានការឯកភាពពី នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ករណីនេះត្រូវបានបញ្ជូនមក នាយកដ្ឋានប្រឆាំងការជួញដូរមនុស្ស និងការពារអនីតិជន ដើម្បីជាសមត្ថកិច្ចអន្តរាគមន៍ដោះស្រាយ។
ឧត្តមសេនីយ៍ឯក ជីវ ផល្លី បានបញ្ជាក់បន្ថែមទៀតថា បន្ទាប់ពីទទួលបានបទបញ្ជាពីថ្នាក់ដឹកនាំកម្លាំងជំនាញបានធ្វើការទំនាក់ទំនង ជាមួយជនរងគ្រោះនៅប្រទេសចិនតាមប្រព័ន្ធ Facebook Messenger ដើម្បីទទួលបានព័ត៌មានលម្អិត ក្នុងការកំណត់គោលដៅសង្គ្រោះ ។
លុះនៅថ្ងៃទី ២២ ខែធ្នូ ឆ្នាំ ២០២០កន្លងទៅ កម្លាំងនាយកដ្ឋានបានប្រមូលព័ត៌មានគ្រប់ជ្រុងជ្រោយពីជនរងគ្រោះ និងបានផ្ញើជូនទៅក្រសួងការបរទេស និងសហប្រតិបត្តិការអន្តរជាតិ និងធ្វើការបន្តជាមួយស្ថានទូត និងអគ្គកុងស៊ុលកម្ពុជាប្រចាំប្រទេសចិន ដើម្បីធ្វើកិច្ចសហប្រតិបត្តិការស្រាវជ្រាវ។
ក្រោមកិច្ចសហប្រតិបត្តិការល្អរវាងអាជ្ញាធរចិន និងសមត្ថកិច្ចពាក់ព័ន្ធរបស់កម្ពុជា បានស្រាវជ្រាវស្វែងរកឃើញកន្លែង ស្នាក់នៅរបស់ក្មេងស្រីរងគ្រោះខាងលើ គឺនៅខេត្តជាំងស៊ី ក្រុងណានឆាង ប្រទេសចិន និងបានសម្របសម្រួលអនុវត្តគោលការណ៍ជំនាញ និងនីតិវិធីនៃប្រទេសទាំងពីរ កម្ពុជា-ចិន ដើម្បីបញ្ជូនជនរងគ្រោះត្រឡប់មកប្រទេសកម្ពុជាវិញ។
តាមការស្រាវជ្រាវរបស់អាជ្ញាធរ និងសមត្ថកិច្ចជំនាញរកឃើញ ស្ត្រីរងគ្រោះជនជាតិខ្មែរសរុបចំនួន ៤នាក់ ត្រូវបានជួយសង្គ្រោះក្នុងប្រតិបត្តិការខាងលើ ប៉ុន្តែអាចបំពេញបែបបទបញ្ជូន ត្រឡប់មកប្រទេសកម្ពុជាវិញបានចំនួន ៣នាក់ ប៉ុណ្ណោះ ដោយសារតែ ជនរងគ្រោះឈ្មោះ យ៉េន តី អាយុ១៦ ឆ្នាំកំពុងមានផ្ទៃពោះប្រហែល ៨ ខែ មិនអាចជិះយន្តហោះត្រឡប់មកកម្ពុជាវិញបានទេ ដោយរង់ចាំនីតិវិធីបន្ត។
ពាក់ព័ន្ធករណីជួញដូរមនុស្សដោយខុសច្បាប់ ទៅកាន់ប្រទេសចិនពាក់ព័ន្ធ ជាមួយនារីរងគ្រោះខាងលើ សមត្ថកិច្ចបានឃាត់ខ្លួនមុខសញ្ញាជាមេខ្យល់ឈ្មោះ ស្រេង សិត ភេទស្រី អាយុ ៣៦ ឆ្នាំរស់នៅភូមិឈើទាលជ្រុំ ឃុំគោកស្រុក ស្រុកតំបែ ខេត្តត្បូងឃ្មុំ ដែលបាននាំជនរងគ្រោះឈ្មោះ យ៉េន សុជាតា ទៅប្រទេសចិន បង្ខំឲ្យរៀបអាពាហ៍ពិពាហ៍ផ្ទុយពីឆន្ទៈ។ ហើយជនត្រូវចោទខាងលើ ត្រូវបានសាលាដំបូងខេត្តត្បូងឃ្មុំ សម្រេចបង្គាប់ឲ្យឃុំខ្លួននៅពន្ធនាគារខេត្ត។