ទំនាក់ទំនងផ្នែកអាកាសចរណ៍ រវាងសហរដ្ឋអាមេរិក និងកម្ពុជា បន្តដំណើរទៅមុខយ៉ាងប្រសើរក្នុងពេលការនាំចេញរបស់កម្ពុជាកើនឡើង!

ភ្នំពេញ៖លោកស្រី Aleks Zittle ភារធារីស្ថានទូតអាមេរិកនៅភ្នំពេញ បានជួបពិភាក្សាការងារជាមួយ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល អំពីការបញ្ជាទិញយន្តហោះប៊ូអ៊ីង (Boeing) ជាប្រវត្តិសាស្ត្ររបស់ក្រុមហ៊ុនអាកាសចរណ៍ជាតិ Air Cambodia ក្នុងតម្លៃ ៣.២ ពាន់លានដុល្លារ និងការវិនិយោគចំនួន ១០០ លានដុល្លារអាមេរិក របស់សាជីវកម្មហិរញ្ញវត្ថុអភិវឌ្ឍន៍សហរដ្ឋអាមេរិក (DFC) នៅអាកាសយានដ្ឋានអន្តរជាតិតេជោ (KTI) ផែនការរបស់រដ្ឋលេខាធិការដ្ឋានអាកាសចរណ៍ស៊ីវិលក្នុងការអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស និងភស្តុភារនៅអាកាសយានដ្ឋានថ្មីនេះ ព្រមទាំងពិភាក្សាពីវឌ្ឍនភាពរបស់កម្ពុជាក្នុងការផ្តល់សច្ចាប័នលើអនុសញ្ញា Cape Town។ 

ស្ថានទូតអាមេរិកប្រចាំកម្ពុជាបានវាយតម្លៃថា ចាប់ពីយន្តហោះដែលផលិតនៅសហរដ្ឋអាមេរិក និងការវិនិយោគរបស់អាមេរិក រហូតដល់ការពង្រីកសមត្ថភាពកម្ពុជាក្នុងវិស័យអាកាសចរណ៍ និងភស្តុភារ កិច្ចសហប្រតិបត្តិការដែលកំពុងរីកចម្រើនរបស់យើងកំពុងបង្កើតឱកាសថ្មីៗ និងផ្តល់អត្ថប្រយោជន៍ជាក់ស្តែងដល់ប្រជាជនអាមេរិក និងប្រជាជនកម្ពុជាដូចគ្នា។

សូមបញ្ជាក់ថាសម្រាប់ការធ្វើពាណិជ្ជកម្មរវាងប្រទេសទាំងពីកម្ពុជាអាមេរិកគឺរយៈពេល៧ខែ ឆ្នាំ២០២៦ កម្ពុជាបានចេញទំនិញទៅកាន់សហរដ្ឋអាមេរិក មានទឹកប្រាក់ជាង ៩ពាន់លានដុល្លារ កើនឡើង ៣០.៦% បើធៀបនឹងរយៈពេលដូចគ្នា កាលពីឆ្នាំ២០២៥ ដែលមានទំហំទឹកប្រាក់ជាង ជិត៧ពាន់លានដុល្លារ។ នេះបើយោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា។

នៅរយៈពេល ៧ខែមកន្លងទៅនេះ កម្ពុជានាំចូលទំនិញពីសហរដ្ឋអាមេរិកមានតម្លៃជាង ៣៧៦លានដុល្លារ កើនឡើង៨៧%។មុខទំនិញដែលកម្ពុជា នាំចេញទៅអាមេរិកភាគច្រើនមានដូចជា មានសម្លៀកបំពាក់ សម្ភារសម្រាប់ការធ្វើដំណើរ (វ៉ាលី កាបូប) កង់ គ្រឿងបង្គុំ និងសម្ភារប្រើប្រាស់ មួយចំនួនទៀត។ ចំណែកកម្ពុជា នាំចូលពីអាមេរិកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។ខុសពីចិនដែលនាំចូលកម្ពុជាច្រើនតែកម្ពុជានាំចេញតិចប្រទេសអាមេរិកមានឱនភាពពាណិជ្ចកម្មច្រើនជាមួយកម្ពុជាចឹងហើយបានជារដ្ឋបាលលោកត្រាំតម្រូវឲ្យកម្ពុជាទិញទំនិញពីអាមេរិកថែមទៀត។