កិត្តិនីតិកោសលបណ្ឌិត ឱម យ៉ិនទៀង អញ្ជើញចូលរួមកិច្ចប្រជុំណែនាំបច្ចេកទេសការប្រឡងបាក់ឌុបឆ្នាំ២០២៦

រាជធានីភ្នំពេញ ៖ ក្រសួងអប់រំ យុវជន និងកីឡា នៅព្រឹកថ្ងៃព្រហស្បតិ៍ ទី៦ ខែសីហា ឆ្នាំ២០២៦ បានដំណើរការកិច្ចប្រជុំណែនាំបច្ចេកទេសដល់គណៈមេប្រយោគទូទាំងប្រទេសសំណេរ ប្រធានគណៈកម្មការអប្បមាទ និងប្រធានមណ្ឌលសំណេរសម្រាប់ការប្រឡងមធ្យមសិក្សាទុតិយភូមិ (បាក់ឌុប) ឆ្នាំ២០២៦ ប្រព្រឹត្តទៅក្រោមអធិបតីដ៏ខ្ពង់ខ្ពស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា (អ.យ.ក) និង កិត្តិនីតិកោសល្យបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ (អ.ប.ព) ដោយមានការចូលរួមពីសំណាក់ថ្នាក់ដឹកនាំ និងមន្ត្រី នៃស្ថាប័នទាំងពីរ សរុបចំនួន ៨០៩រូប។ 

សម្រាប់ការប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡង១០ សីហា ២០២៦ ខាងមុខនេះ អ.ប.ព. បានរៀបចំដាក់ពង្រាយមន្រ្តីរបស់ខ្លួន រាប់ទាំងមន្រ្តីនគរបាលយុត្តិធម៌ សរុបប្រមាណ ៦០០រូប និងអ្នកសង្កេតការណ៍ស្ម័គ្រចិត្តនៅទូទាំងប្រទេសចំនួន ៤ ១៥០រូប ដើម្បីចូលរួមពួតដៃ ប្រកៀកស្មាគ្នាជាមួយក្រសួងអប់រំ យុវជន និងកីឡា និងរដ្ឋបាលថ្នាក់ក្រោមជាតិទាំង ២៥រាជធានីខេត្ត ក្នុងការទប់ស្កាត់ភាពមិនប្រក្រតីនានា ដែលអាចកើតមាន និងដើម្បីចូលរួមបន្តជ្រោងស្មារតី អ្នកចេះ គឺជាប់ ដោយឈរលើគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។

គួរបញ្ជាក់ផងដែរថាការប្រឡងបាក់ឌុបឆ្នាំ ២០២៦នឹងដំណើរការរយៈពេល២ថ្ងៃ គឺនៅថ្ងៃទី១០ និងទី១១ ខែសីហា ឆ្នាំ២០២៦នេះ។ ហើយអ.ប.ព. នឹងបន្តសង្កេតការណ៍ដំណើរការកំណែ ស្រង់បូកពិន្ទុ រហូតប្រកាសលទ្ធផលស្ថាពរ នៅថ្ងៃទី២ ខែកញ្ញា ឆ្នាំ២០២៦ តាមមណ្ឌលសំណេររាជធានីខេត្តទាំង២៥ ទូទាំងប្រទេស។