ធនាគារ៣ពាណិជ្ជ៣ថ្មីដែលធនាគារជាតិរឹបអូសអាជ្ញាបណ្ណ័គឺសុទ្ធតែមានឈ្មោះក្នុងបញ្ជីរទណ្ឌកម្មពីអាមេរិក
03-July-2026 / សេដ្ឋកិច្ច
ភ្នំពេញ៖ធនាគារជាតិនៃកម្ពុជា (NBC) បានដកហូតអាជ្ញាបណ្ណរបស់ធនាគារពាណិជ្ជចំនួន ៣ និងដាក់ឱ្យស្ថិតក្រោមនីតិវិធីជម្រះបញ្ជី ដោយបានតែងតាំងអ្នកជម្រះបញ្ជី ដើម្បីគ្រប់គ្រងការទូទាត់សងប្រាក់បញ្ញើជូនអតិថិជន ខណៈអះអាងថា ដំណើរការនេះនឹងអនុវត្តស្របតាមច្បាប់ និងបទប្បញ្ញត្តិជាធរមាន។
សេចក្តីជូនដំណឹងនៅថ្ងៃទី៣សីហារបស់ ធនាគារជាតិនៃកម្ពុជាបានសម្រេចដកហូតអាជ្ញាបណ្ណរបស់ CCU Commercial Bank Ltd, Heng Feng (Cambodia) Bank Plc និង HH Bank (Cambodia) Plc ហើយដាក់ធនាគារទាំងបីឱ្យស្ថិតក្រោមនីតិវិធីជម្រះបញ្ជី ស្របតាមច្បាប់ និងបទប្បញ្ញត្តិពាក់ព័ន្ធ។
ធនាគារជាតិបានតែងតាំងក្រុមហ៊ុន REACHS & Partners Co Ltd ជាអ្នកជម្រះបញ្ជីសម្រាប់ CCU Commercial Bank Ltd និងក្រុមហ៊ុន Baker Tilly Cambodia ជាអ្នកជម្រះបញ្ជីសម្រាប់ Heng Feng (Cambodia) Bank Plc និង HH Bank (Cambodia) Plc។ ក្រុមហ៊ុនទាំងពីរនឹងអនុវត្តនីតិវិធីជម្រះបញ្ជីស្របតាមច្បាប់ និងបទប្បញ្ញត្តិជាធរមាន ចាប់ពីថ្ងៃដែលត្រូវបានតែងតាំង។
ធនាគារជាតិនៃកម្ពុជាបានបញ្ជាក់ថា អតិថិជនដែលមានប្រាក់បញ្ញើនៅធនាគារទាំងបី ត្រូវត្រៀមឯកសារចាំបាច់ដើម្បីដាក់ស្នើសុំដកប្រាក់បញ្ញើរបស់ខ្លួន ដែលនឹងត្រូវបានចាត់ចែងទូទាត់ជូនតាមលំដាប់អាទិភាព ស្របតាមច្បាប់ស្តីពីធនាគារ និងគ្រឹះស្ថានហិរញ្ញវត្ថុ។ ចំណែកអ្នកខ្ចីប្រាក់ ត្រូវបន្តបំពេញកាតព្វកិច្ចសងប្រាក់កម្ចីរបស់ខ្លួនដូចជាប្រក្រតី។អតិថិជន និងអ្នកពាក់ព័ន្ធដែលចង់ទទួលបានព័ត៌មានបន្ថែមអំពីនីតិវិធីជម្រះបញ្ជី ត្រូវបានណែនាំឱ្យទាក់ទងដោយផ្ទាល់ទៅកាន់អ្នកជម្រះបញ្ជីដែលត្រូវបានតែងតាំង។
សម្រាប់ CCU Commercial Bank Ltd អតិថិជនអាចទាក់ទងក្រុមហ៊ុន REACHS & Partners Co Ltd ដែលមានអាសយដ្ឋានផ្ទះលេខ ២២៨៣ ផ្លូវលេខ ១៩៧០ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ តាមលេខទូរស័ព្ទ ១២៣ ២៣០ ៣៣៣ ឬ ០៩៥ ៣៥១ ០៨៦ ឬតាមអ៊ីមែល info@reachspro.com។
សម្រាប់ Heng Feng (Cambodia) Bank Plc និង HH Bank (Cambodia) Plc អតិថិជនអាចទាក់ទងក្រុមហ៊ុន Baker Tilly Cambodia ដែលមានអាសយដ្ឋានផ្ទះលេខ B3-០៧១ និង B3-០៧២ សង្កាត់ទន្លេបាសាក់ ខណ្ឌចំការមន រាជធានីភ្នំពេញ (បុរី Elysee កោះពេជ្រ) តាមលេខទូរស័ព្ទ ០២៣ ៩៨៧ ១០០ ឬតាមអ៊ីមែល info@bakertilly.com.kh។
NBC បានបន្ថែមថា ខ្លួននឹងបន្តសហការជាមួយក្រសួង និងស្ថាប័នពាក់ព័ន្ធ ដើម្បីតាមដានយ៉ាងជិតស្និទ្ធលើដំណើរការជម្រះបញ្ជី ក្នុងគោលបំណងការពារផលប្រយោជន៍របស់អ្នកដាក់ប្រាក់ និងអតិថិជន។មានការកត់សម្គាល់ថាធនាគារបីថ្មីដែលធនាគារជាតិរឹបអូសអាជ្ញាបណ្ណ័គឺជាធនាគារដែលរងការដាក់ទណ្ឌកម្មពីសហរដ្ឋអាមឹរិក។កន្លងមកមានធនាគា៤រួចហើយដែលរងការដាក់ទណ្ឌកម្មពីអាមេរិកត្រូវបានធនាគាជាតិបិទរួមមានធនាគារព្រិនស៍។ធនាគារផែនដា។ធនាគារអេចផេនិងធនាគាហ៊ុវន័។
យោងតាមទិន្នន័យរបស់ NBC ទ្រព្យសកម្មសរុបរបស់គ្រឹះស្ថានហិរញ្ញវត្ថុទាំងបីមានប្រមាណ ២៩៣ លានដុល្លារ ស្មើនឹងតិចជាង ០,៥ ភាគរយ នៃទ្រព្យសកម្មសរុបរបស់វិស័យធនាគារ ដែលមានទំហំ ៩៩,៨ ពាន់លានដុល្លារ គិតត្រឹមចុងខែមិថុនា ដែលបង្ហាញថា ធនាគារទាំងនេះមានចំណែកតូចប៉ុណ្ណោះនៅក្នុងប្រព័ន្ធហិរញ្ញវត្ថុ។
បើយោងតាមតួលេខរបស់ធនាគារជាតិនៃកម្ពុជា ប្រតិបត្តិការរបស់គ្រឹះស្ថានធនាគារទាំង៣បូកបញ្ចូលគ្នាមានចំណែកត្រឹមតែ០,៥%ប៉ុណ្ណោះបើធៀបនឹងទំហំសរុបក្នុងប្រព័ន្ធធនាគារ ក្នុងនោះទ្រព្យសកម្មមាន០,៥% ប្រាក់បញ្ញើ០,៥% និងឥណទាន០,៥%។ យ៉ាងណាមិញថ្មីៗនេះ ធនាគារពាណិជ្ជពីរផ្សេងទៀត ក៏ត្រូវបានដាក់ឱ្យជម្រះបញ្ជីរួចហើយដែរ គឺធនាគារ ព្រីនស៍ និងធនាគារឯកទេស ផេនដា។ឯធនាគារហ៊ុយវន័ដែលបិទទៅហើយនោះមិនទាន់ឃើញធនាគារប្រកាសបែបណានៅឡើយ។
ទោះជាមានធនាគារជាច្រើនត្រូវក្ស័យធនក៏ដោយ តែ ធនាគារជាតិនៃកម្ពុជានៅអះអះអាងថា បូកបន្ថែមទំហំប្រតិបត្តិការរបស់គ្រឹះស្ថានទាំង ៣ ដែលទើបដាក់ឱ្យជម្រះបញ្ជីជាមួយគ្រឹះស្ថានទាំង២ខាងលើ ក៏ចំណែកទីផ្សាររបស់គ្រឹះស្ថានទាំង៥ បូកបញ្ចូលគ្នាមានប្រមាណត្រឹមតែ១%ប៉ុណ្ណោះ នៃប្រព័ន្ធធនាគារទាំងមូល។សូមបញ្ជាក់ថាធនាគារ៣ខាងលើដែលធនាគារជាតិប្រកាសដកហូតអាជ្ញាបណ្ណ័គឺសុទ្ធតែត្រូវបានប្រទេសអាមេរិកដាក់ទណ្ឌកម្ម។
ដូចធនាគារជាតិដែរលោក ស៊ឺន សម អ្នកវិភាគគោលនយោបាយនៅរាជបណ្ឌិត្យសភាកម្ពុជា បានប្រាប់ខ្មែរថាមស៍ថា ការសម្រេចចិត្តរបស់ធនាគារជាតិក្នុងការដកហូតអាជ្ញាបណ្ណធនាគារមួយចំនួន ទំនងជាមិនប៉ះពាល់ដល់ស្ថិរភាពរួមនៃវិស័យធនាគារកម្ពុជានោះទេ ព្រោះគ្រឹះស្ថានដែលរងផលប៉ះពាល់មានចំណែកតិចតួចប៉ុណ្ណោះនៃទ្រព្យសកម្មសរុបរបស់វិស័យនេះ។
លោកបានមានប្រសាសន៍ថា «តាមទស្សនៈម៉ាក្រូសេដ្ឋកិច្ច គ្រឹះស្ថានទាំងនេះមានចំណែកតូចណាស់នៅក្នុងប្រព័ន្ធធនាគារ ដូច្នេះការបិទរបស់ពួកគេមិនបង្កហានិភ័យជាប្រព័ន្ធនោះទេ»។ ទោះជាយ៉ាងណា លោកបានបន្ថែមថា ការបិទធនាគារជាបន្តបន្ទាប់ អាចធ្វើឱ្យទំនុកចិត្តរបស់សាធារណជនថយចុះ ប្រសិនបើដំណើរការជម្រះបញ្ជី និងការទូទាត់សំណងមិនត្រូវបានអនុវត្តដោយតម្លាភាព និងប្រសិទ្ធភាព។
លោកបានបន្តថា «ទំនុកចិត្តគឺជាមូលដ្ឋានគ្រឹះនៃប្រព័ន្ធហិរញ្ញវត្ថុណាមួយ។ ទោះបីជាគ្រឹះស្ថានដែលរងផលប៉ះពាល់មានចំណែកតូចនៃទ្រព្យសកម្មវិស័យធនាគារក៏ដោយ បណ្តឹងដែលមិនទាន់ដោះស្រាយអាចរីករាលដាលយ៉ាងឆាប់រហ័សនៅលើបណ្តាញសង្គម និងមានឥទ្ធិពលលើការយល់ឃើញរបស់សាធារណជន»។
លោកបានបន្ថែមថា វិនិយោគិនមិនត្រឹមតែវាយតម្លៃលើលទ្ធផលសេដ្ឋកិច្ចប៉ុណ្ណោះទេ ប៉ុន្តែថែមទាំងពិនិត្យមើលប្រសិទ្ធភាពនៃការគ្រប់គ្រងផ្នែកហិរញ្ញវត្ថុ និងការការពារអ្នកប្រើប្រាស់ផងដែរ។ លោកបានអំពាវនាវឱ្យ NBC តាមដានដំណើរការជម្រះបញ្ជីយ៉ាងដិតដល់ ដើម្បីធានាថា អ្នកដាក់ប្រាក់ និងម្ចាស់បំណុលទាំងអស់ទទួលបានយុត្តិធម៌។
លោកបានបន្ថែមថា «NBC ក៏គួរផ្តល់ការពន្យល់ឱ្យបានច្បាស់លាស់ និងទាន់ពេលវេលាដល់សាធារណជនផងដែរ ដើម្បីកាត់បន្ថយភាពមិនច្បាស់លាស់ និងពង្រឹងទំនុកចិត្តលើវិស័យធនាគាររបស់កម្ពុជា»។
សូមបញ្ជាក់ថាបើគិតត្រឹមឆមាសទី១ ឆ្នាំ២០២៦ ប្រព័ន្ធធនាគារនៅកម្ពុជាមានគ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើចំនួន ៦១ ក្នុងនោះមានធនាគារពាណិជ្ជ ៥៨ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៣។
ប្រព័ន្ធធនាគារក៏មានគ្រឹះស្ថានធនាគារ និងហិរញ្ញវត្ថុមិនទទួលប្រាក់បញ្ញើចំនួន ១០៤ ក្នុងនោះមានធនាគារឯកទេស ៧ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨៥ និងគ្រឹះស្ថានភតិសន្យាហិរញ្ញវត្ថុ ១២ ព្រមទាំងគ្រឹះស្ថានឥណទានជនបទចំនួន ៨៨។
ទ្រព្យសកម្មរបស់ប្រព័ន្ធធនាគារមានកំណើន ២.៥ ភាគរយ ដល់ ៣៩៩.៣ ទ្រីលានរៀល ឬប្រមាណ ៩៩.៨ ពាន់លានដុល្លារអាមេរិក។ ក្នុងនោះ ឥណទានអតិថិជនកើនឡើង ៤.៦ ភាគរយ ដល់ ២៥៦.៧ ទ្រីលានរៀល ឬ ៦៤.២ ពាន់លានដុល្លារអាមេរិក។
ប្រាក់បញ្ញើអតិថិជនក៏មានកំណើន ៤.៤ ភាគរយ ដល់ ២៥៧.៤ ទ្រីលានរៀល ឬ ៦៤.៤ ពាន់លានដុល្លារអាមេរិក ខណៈដើមទុនមានកំណើន ៣ ភាគរយ ដល់ ៤២ ទ្រីលានរៀល ឬ ១០.៥ ពាន់លានដុល្លារអាមេរិក៕
