រឿងអចលនៈទ្រព្យធនាគាជាតិកំពុងលេងល្បែងព្រួញមួយបាញ់សត្វពីរ?!
16-November-2025 / សេដ្ឋកិច្ច
ភ្នំពេញ៖ធនាគារជាតិនិងក្រួសួងដែនដីនគរូនបនីយ៍កម្មបានសម្រេចពីកិច្ចសហការគ្នាជួយសង្គ្រោះបញ្ហាជាប់គាំងនៃអចលនៈទ្រព្យនៅស្រុកខ្មែរ។លោកស្រី ជា សេរី អគ្គទេសាភិបាលធនាគារជាតិនៃកម្ពុជាបានអះអាងថា យន្តការនេះ គឺជួយសម្រួលដល់អតិថិជនជាអ្នកបង់រំលស់ផ្ទះផង និងជួយដល់ម្ចាស់បុរីផង។
លោកស្រី ជា សេរី ពន្យល់ពីវិធីថា ធនាគារនឹងសងលុយទៅម្ចាស់បុរីជំនួសអតិថិជន ដ្បិតថា អតិថិជននៅបន្តបង់សងបំណុលត្រឡប់ទៅធនាគារវិញ តែស្ថិតក្នុងលក្ខខណ្ឌធូរស្រាលជាង។ ចំណែក ម្ចាស់បុរីទទួលបានទុនសម្រាប់បន្តការអភិវឌ្ឍរបស់ខ្លួនទៅមុខ។គេមិនដឹងថាតើមានធនាគារប៉ុន្មាននឹងចេញមុខជួយផ្តល់កម្ចីជូនប្រជាពលរដ្ឋដែលកំពុងក្សយ័ធនរកលុយបង់ថ្លៃផ្ទះមិនបាននោះទេ?។ការរៀបចំយន្តការសម្របសម្រួលដល់អតិថិជនបង់រំលស់ជាមួយម្ចាស់បុរីនេះ ធ្វើឡើងក្រោយអាជ្ញាធរ និងអ្នកធ្វើការលើវិស័យអចលនទ្រព្យ មើលឃើញ ការរឹបអូសផ្ទះដោយម្ចាស់បុរី បាននិងកំពុងក្លាយជាបញ្ហាដែលតែងកើតមានឡើងជាញឹកញាប់ ខណៈពលរដ្ឋជាច្រើនបានស្នើសុំកិច្ចអន្តរាគមន៍ពីក្រសួងស្ថាប័នពាក់ព័ន្ធ ពិសេសពីលោកនាយករដ្ឋមន្ត្រី។
លោក សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់មិនបាននិយាយពីកិច្ចសហការបែបណានោះទេតែបាន អះអាងថា ក្នុងរយៈពេលមួយឆ្នាំកន្លះមកនេះ ក្រសួងបានអនុវត្តនូវការងារចំនួន៦ ហើយបានសម្រេចនូវលទ្ធផលមួយដែលលោកចាត់ទុកថា គ្មានវិវាទក្នុងប្រទេស?។គេនៅចាំបានថា កាលពីថ្ងៃទី០៩ ខែមិថុនា ឆ្នាំ២០២៣ សម្តេចហ៊ុន សែន កាលនៅកាន់តំណែងជានាយករដ្ឋមន្ត្រីបានស្នើដល់ម្ចាស់បុរីទាំងអស់ឱ្យបញ្ឈប់ជាបន្ទាន់នូវសកម្មភាពរឹបអូសផ្ទះពីអតិថិជនដែលគ្មានលទ្ធភាពបង់រំលស់បន្ត។ទោះបីយ៉ាងណាបទបញ្ជានេះមិនបានជួយសេដ្ឋកិច្ចដោះស្រាយបាននោះឡើយ។
លោក ប៉ូ អ៊ាវ គង់ អគ្គនាយកក្រុមហ៊ុន Advance Real estate បានប្រាប់វិទ្យុបារាំងអន្តរជាតិRFIថា ការរៀបចំយន្តការ និងនីតិវិធីជួយសម្រួលកម្ចីរបស់អតិថិជនដែលមានបំណងចង់ទិញលំនៅឋាន គឺជាពេលវេលាដែលល្អដើម្បីដោះស្រាយបញ្ចប់បញ្ហាវិវាទដែលធ្លាប់កើតមានកន្លងមករវាងអ្នកអភិវឌ្ឍន៍ និងអ្នកទិញ។ប្រភពពីធនាគាជាតិបានឲ្យដឹងថាគិតត្រឹមដំណាច់ខែវិច្ឆិកា ឆ្នាំ២០២៤នេះ ការរៀបចំឥណទានឡើងវិញ មានទំហំទឹកប្រាក់ប្រមាណជាង ៨៥០លានដុល្លារ ស្មើប្រមាណ ១.៥%នៃទំហំឥណទាននៅក្នុងប្រព័ន្ធធនាគារ ដែលបានជួយសម្រួលបន្ទុកចំណាយដល់អ្នកជាប់កម្ចី។
លោកស្រី ម៉ក់ រស្ម៊ី អគ្គនាយករងបទប្បញ្ញត្តិ និងបរិយាបន្នហិរញ្ញវត្ថុ និងជាប្រធាននាយកដ្ឋានបទប្បញ្ញត្តិ ធនាគារជាតិនៃកម្ពុជា បានឱ្យដឹងថា គិតត្រឹមដំណាច់ខែវិច្ឆិកា ឆ្នាំ២០២៤ អ្នកជាប់កម្ចីប្រមាណជាង ៥ម៉ឺន៣ពាន់នាក់ ដែលស្មើនឹងជាង ៥ម៉ឺន៧ពាន់គណនី ត្រូវបានរៀបចំឥណទានឡើងវិញ។ទន្ទឹមគ្នានេះ លោកស្រីវាយតម្លៃថា ស្ថានភាពនៃវិស័យធនាគារនៅកម្ពុជា នៅតែមានភាពរឹងមាំ បើទោះបីជាមានកំណើននៃការស្នើសុំរៀបចំឥណទានឡើងវិញ ការថយចុះនៃការផ្តល់ឥណទាន និងការកើនឡើងនៃឥណទានមិនដំណើរការក៏ដោយ ព្រោះតែធនាគារនៅតែរស់នៅបាន តាមរយៈការទទួលបានប្រាក់ចំណេញ។
ថ្លែងនៅក្នុងកិច្ចពិភាក្សាតុមូលស្តីពី «ស្ថានភាពបំណុលនៅកម្ពុជា» ដែលរៀបចំដោយរាជបណ្ឌិត្យសភាកម្ពុជា នៅថ្ងៃទី០៤ ខែធ្នូ ឆ្នាំ២០២៤ លោក តូច ចៅចេក សមាជិកក្រុមប្រឹក្សាភិបាលសមាគមធនាគារកម្ពុជា បានគូសបញ្ជាក់ថា សម្រាប់គ្រឹះស្ថានធនាគារ គិតត្រឹមខែតុលា ទំហំនៃការរៀបចំឥណទានឡើងវិញ មានទំហំជាង៥០០លានដុល្លារ។លោកកត់សម្គាល់ថា ការរៀបចំឡើងឥណទានឡើងវិញ បានជួយសម្រួលឱ្យស្ថានភាពរបស់អតិថិជនវិលត្រឡប់មកធម្មតាវិញ ក្នុងនោះអ្នកដែលទទួលបានការរៀបចំឥណទានឡើងវិញ ពីខាងធនាគារមានប្រមាណជាង ៧០% ទៅ ៨០% អាចសងមកធនាគារបានទៀងទាត់ឡើងវិញ។
ធនាគារជាតិនៃកម្ពុជា កាលថ្ងៃទី៣០ ខែសីហា ឆ្នាំ២០២៤ បានចេញសារាចរណែនាំ ឱ្យបណ្តាគ្រឹះស្ថានធនាគារ និងមីក្រូហិរញ្ញវត្ថុការរៀបចំឥណទានឡើងវិញ ដល់អតិថិជន ក្នុងគោលបំណងជួយសម្រាលបន្ទុកចំណាយ ប្រចាំគ្រារបស់អតិថិជន ក្នុងការបំពេញកាតព្វកិច្ចសងត្រឡប់ឥណទាន និងជំរុញកំណើនសេដ្ឋកិច្ច តាមរយៈការបង្កើនលំហូរសាច់ប្រាក់។ ចំណែកការអនុវត្តកិច្ចការងារនេះ នឹងចាប់ពីត្រីមាសទី៤ ឆ្នាំ២០២៤តទៅ រហូតដល់ដំណាច់ឆ្នាំ២០២៥។
លើវិស័យសំណង់ និងអចលនទ្រព្យនៅកម្ពុជាអាជ្ញាធរបានអះអាងថាបំណុលក្នុងវិស័យសំណង់ និងអចលនទ្រព្យនៅកម្ពុជាគិតមកដល់ពេលនេះគឺប្រមាណជាង ១៨ ពាន់លានដុល្លារ។លោក ជូ វណ្ណៈ អគ្គនាយកនិយ័តករអាជីវកម្មអចលនវត្ថុ និងបញ្ចាំ បានលើកឡើងថា នៅមុនការលេចឡើងវត្តមានជំងឺកូវីដ១៩ វិស័យសំណង់ និងអចលនទ្រព្យបានដើរតួនាទីយ៉ាងសំខាន់ក្នុងជួយគាំទ្រ និងជំរុញកំណើនសេដ្ឋកិច្ចកម្ពុជាជាមួយនឹងអត្រាកំណើនក្នុងរង្វង់ជាង ៧ ភាគរយក្នុង ១ឆ្នាំ។
លោកប្រាប់ទៀតថា នៅពេលមានកំណើនតម្រូវការ ក្រុមហ៊ុន/អ្នកវិនិយោគវិស័យសំណង់ ក៏កើនឡើងតាមស្ថានភាពទីផ្សារដែរ ខណៈគ្រឹះស្ថានហិរញ្ញវត្ថុក៏បានបង្កើនលទ្ធភាពផ្តល់ប្រាក់កម្ចីឱ្យម្ចាស់គម្រោងអភិវឌ្ឍន៍វិស័យសំណង់ អចលនទ្រព្យ ព្រមទាំងអ្នកដែលចង់មានលំនៅឋានជាកម្មសិទ្ធិក៏កើនឡើងព្រមគ្នា។លោកថ្លែងថា៖«តាមរយៈប្រភពរបស់ធនាគារជាតិនៃកម្ពុជា គិតត្រឹមខែកញ្ញា ឆ្នាំ ២០២៤ បំណុលនៅក្នុងវិស័យសំណង់ និងអចលនទ្រព្យមាន ១៨,៤ ពាន់លានដុល្លារ»។
សម្រាប់ផ្នែកលំនៅឋាន(បុរី) លោក វណ្ណៈ ឱ្យដឹងថា គិតមកដល់ពេលនេះ បំណុលដែលម្ចាស់បុរី បានទៅខ្ចីពីធនាគារដោយប្រើក្នុងនាមជានីតិបុគ្គល និងរូបវ័ន្តបុគ្គលមានប្រមាណ ២ ០០០ លានដុល្លារ ខណៈអ្នកដែលបានខ្ចីធនាគារបង់រំលោះជាមួយអ្នកអភិវឌ្ឍន៍លំនៅឋានមានប្រមាណ ១០០០ លានដុល្លារ។
