អានុទីន នឹងទៅហ្សាការតា សុំឲ្យឥណ្ឌូណេស៊ី បើកទីផ្សារ ទទួលទំនិញថៃ ច្រើនជាងមុន

ប្រទេសថៃ៖នាយករដ្ឋមន្ត្រីថៃ អានុទីន នឹងធ្វើដំណើរទៅកាន់ប្រទេសឥណ្ឌូណេស៊ី ដើម្បីពិភាក្សាលើបញ្ហាមួយចំនួន ក្នុងនោះ អានុទីន ក៏នឹងស្នើសុំឲ្យលោកប្រធានាធិបតី Prabowo Subianto បើកទីផ្សារ ទទួលទំនិញថៃ កាន់តែច្រើនផងដែរ ស្របពេលសេដ្ឋកិច្ចថៃ កំពុងដុនដាបខ្លាំង។ 

តាមការបញ្ជាក់ពីអ្នកនាំពាក្យរដ្ឋាភិបាលទីក្រុងបាងកក ផ្សាយដោយ The Nation នៅថ្ងៃអាទិត្យ ទី២ ខែសីហា ឆ្នាំ២០២៦ អានុទីន នឹងបំពេញទស្សនកិច្ចផ្លូវការនៅឥណ្ឌូណេស៊ី ចាប់ពីថ្ងៃ៣-៤ នេះទៅ។

អ្នកនាំពាក្យបានឲ្យដឹងថា ក្នុងអំឡុងពេលនោះ មានរបៀបវារៈសំខាន់ៗដូចជា ពាណិជ្ជកម្ម ការវិនិយោគ ទេសចរណ៍ សន្តិសុខ សន្តិសុខស្បៀង ថាមពល អប់រំ និងកិច្ចសហប្រតិបត្តិការធុរកិច្ច ដែលនឹងត្រូវលើកឡើង។

អានុទីន នឹងស្នើសុំឲ្យរដ្ឋាភិបាលទីក្រុងហ្សាការតា បើកផ្លូវកាន់តែធំសម្រាប់ទំនិញ និងសេវាកម្មរបស់ថៃ ចូលទៅកាន់ទីផ្សារឥណ្ឌូណេស៊ី ពង្រឹងចំណងខ្សែច្រវាក់ផ្គត់ផ្គង់ និងជំរុញការវិនិយោគទៅវិញទៅមក។

សូមជម្រាបថា នេះនឹងក្លាយជាដំណើរទស្សនកិច្ចផ្លូវការលើកដំបូង របស់នាយករដ្ឋមន្ត្រីថៃមួយរូប ទៅកាន់ប្រទេសឥណ្ឌូណេស៊ីុ ក្នុងរយៈពេល ១៥ឆ្នាំ ហើយវាកើតឡើង ចំពេលសេដ្ឋកិច្ចថៃ កំពុងយ៉ាប់យ៉ឺន។

ក្រុមអ្នកជំនាញអន្តរជាតិ អះអាងថា សេដ្ឋកិច្ចថៃ កំពុងស្ថិតក្នុងដំណាក់កាល ដ៏ទន់ខ្សោយបំផុតមួយ មិនធ្លាប់ជួបប្រទះសោះ ក្នុងរយៈពេលជាច្រើនទសវត្សរ៍មកនេះ ខណៈសម្រាប់ឆ្នាំ២០២៦ ធនាគារពិភពលោក ព្យាករណ៍ថា កំណើនផលិតផលក្នុងស្រុកសរុប (GDP) មានកម្រិតទាបត្រឹមតែ ១,៦% ទៅ ២% ប៉ុណ្ណោះ៕