គ្រោះរញ្ជួយដី ៧.១រិចទ័រនៅប្រទេសជប៉ុនមនុស្ស១៣នាក់ស្លាប់ ខណៈមនុស្សជាង២០ម៉ឺននាក់ត្រូវជម្លៀសខ្លួន

ជប៉ុន៖ គ្រោះរញ្ជួយដីដ៏ខ្លាំងក្លាកម្រិត ៧.១ រិចទ័រ បានវាយប្រហារភាគខាងត្បូងប្រទេសជប៉ុន ដោយមានចំណុចកណ្តាលស្ថិតនៅក្បែរទីក្រុងគូម៉ាម៉ូតូ (Kumamoto)។ គិតត្រឹមថ្ងៃពុធ ទី២៩ ខែកក្កដា ចំនួនអ្នកស្លាប់បានកើនឡើងដល់ ១៣ នាក់ ខណៈមនុស្សប្រហែល ២៦០,០០០ នាក់ ត្រូវអាជ្ញាធរណែនាំឱ្យជម្លៀសខ្លួនទៅកាន់មជ្ឈមណ្ឌលសុវត្ថិភាព ចំពេលមានការរញ្ជួយដីជាបន្តបន្ទាប់ជាង ១០០ ដង និងបណ្តាលឱ្យផ្ទះជាង ៣៦,០០០ ខ្នង ដាច់ចរន្តអគ្គិសនី ស្របពេលសីតុណ្ហភាពឡើងកម្តៅដល់ ៣៤ អង្សា។ 

ការយកចិត្តទុកដាក់ជាអាទិភាព ផ្តោតលើការបាក់រលំមួយផ្នែក និងការផ្ទុះហ្គាសនៅផ្សារទំនើបអ៊ីអនម៉លគូម៉ាម៉ូតុ ដែលជាផ្សារទំនើបដ៏ធំបំផុតក្នុងខេត្ត ដោយក្រុមសង្គ្រោះបានទាញមនុស្ស ៨ នាក់ចេញពីគំនរបាក់បែក ប៉ុន្តែ ៣ នាក់បានស្លាប់ និង ៤ នាក់ទៀតកំពុងបាត់ខ្លួន។ ក្រៅពីនេះ គ្រោះមហន្តរាយនេះបានធ្វើឱ្យបំពង់ផ្សែងរោងចក្រ នីបផុន ផេភឺ អ៊ីនដាសស្ទ្រី (Nippon Paper Industries) បាក់រលំ បណ្តាលឱ្យមនុស្ស ៧ នាក់បាត់ខ្លួន ព្រមទាំងបង្ខំឱ្យក្រុមហ៊ុនឧស្សាហកម្មយក្សៗ រួមមាន Renesas Electronics, Sony, Honda និង Toyota Motor ប្រកាសផ្អាកប្រតិបត្តិការរោងចក្ររបស់ខ្លួនជាបណ្តោះអាសន្ន។

នាយករដ្ឋមន្ត្រីជប៉ុន លោកស្រី សាណាអិ តាកាអ៊ីឈិ (Sanae Takaichi) បានប្រកាសដាក់ពង្រាយកងទ័ពជាង ៤,៥០០ នាក់ ដើម្បីជួយដល់កិច្ចប្រតិបត្តិការសង្គ្រោះ។ អ្នកនាំពាក្យរដ្ឋភិបាល លោក មីណូរុ គីហារ៉ា (Minoru Kihara) បានអំពាវនាវឱ្យប្រជាពលរដ្ឋបន្តប្រុងប្រយ័ត្នខ្ពស់ចំពោះការរញ្ជួយដីខ្លាំងៗដែលអាចកើតមានបន្ថែមទៀត និងហានិភ័យនៃគ្រោះរអិលបាក់ដីក្នុងរយៈពេលមួយសប្តាហ៍ខាងមុខ ខណៈដែលសំណង់ប្រវត្តិសាស្ត្រសំខាន់ៗដូចជា ប្រាសាទគូម៉ាម៉ូតូ ក៏រងនូវការខូចខាតផងដែរ៕