រុស្ស៊ីធ្វើសមយុទ្ធក្នុងសមុទ្រក្បែរកោះជប៉ុននិងបានព្រមានជប៉ុនរឿងលក់អាវុធចេញ!
21-May-2026 / ព័ត៌មានអន្តរជាតិ
ប្រទេសជប៉ុន៖រដ្ឋាភិបាលជប៉ុនប្រកាសបន្ធូរបន្ថយច្បាប់នាំចេញគ្រឿងបរិក្ខាយោធា ដើម្បីបើកផ្លូវឲ្យមានការលក់នាំចេញយន្តហោះចម្បាំងទំនើបថ្មី ដែលជប៉ុនកំពុងចាប់ដៃសហការផលិតជាមួយអ៊ីតាលី និងអង់គ្លេសកាលពីចុងឆ្នាំ២០២២ ។ជប៉ុន អង់គ្លេស និងអ៊ីតាលីបាន រួមគ្នាផលិតយន្តហោះចម្បាំងជំនាន់ចុងក្រោយបំផុត ឈ្មោះ Tempest ដែលប្រើកម្មវិធីបញ្ញាសិប្បនិម្មិត និងSensors ទំនើបសម្រាប់ជួយអ្នកបើកយន្តហោះ។
រដ្ឋាភិបាលជប៉ុនសង្ឃឹមថា ការបន្ធូរបន្ថយច្បាប់ស្តីពីការលក់សព្វាវុធ ដើម្បីអនុញ្ញាតឲ្យលក់នាំចេញយន្តហោះចម្បាំងទៅប្រទេសដទៃ ក្រៅពីអង់គ្លេស និងអ៊ីតាលី ដែលជាដៃគូរបស់ជប៉ុន នឹងធ្វើឲ្យជប៉ុនទទួលបានចំណូលដើម្បីយកទៅទូទាត់ជាមួយការចំណាយដ៏សន្ធឹកសន្ធាប់ដើម្បីផលិតយន្តហោះដ៏ទំនើបTempest។លោកនាយករដ្ឋមន្ត្រីជប៉ុន ហ្វូមីអូ គីស៊ីដា ការអនុញ្ញាតលក់យន្តហោះទៅឲ្យប្រទេសទី៣ សំខាន់ ដើម្បីឲ្យជប៉ុនទទួលបានការជឿទុកចិត្ត ពីសំណាក់ប្រទេសដៃគូ នៅក្នុងគម្រោងការអភិវឌ្ឍសព្វាវុធ ទៅថ្ងៃអនាគត។ ការបន្ធូរបន្ថយច្បាប់ដើម្បីជំរុញការលក់នាំចេញសព្វាវុធ ផលិតនៅជប៉ុន ធ្វើឡើងនៅតែប៉ុន្មានសប្តាហ៍មុនដែលលោកនាយករដ្ឋមន្ត្រីជប៉ុនត្រូវធ្វើទស្សនកិច្ចនៅទីក្រុងវ៉ាស៊ីនតោន ជាទីដែលប្រមុខរដ្ឋាភិបាលជប៉ុនចង់ទៅបញ្ជាក់ប្រាប់សម្ព័ន្ធមិត្តអាមេរិកថា ជប៉ុនត្រៀមខ្លួន ធ្វើជាដៃគូរបស់អាមេរិកនៅក្នុងគម្រោងការអភិវឌ្ឍយោធា។
ប្រភពរដ្ឋាភិបាលជប៉ុន មានតែប្រទេសចំនួន ១៥ ដែលបានចុះកិច្ចព្រមព្រៀងយោធាជាមួយជប៉ុនតែប៉ុណ្ណោះ ដែលមានសិទ្ធិទិញយន្តហោះទំនើបថ្មីផលិតនៅជប៉ុន។ នៅក្នុងចំណោមប្រទេសទាំង១៥ មានអាមេរិក បារាំង ឥណ្ឌា ហ្វីលីពីន អូស្ត្រាលី ឬអេមីរ៉ាតអារ៉ាប់រួមជាដើម។ បើតាមរដ្ឋាភិបាលជប៉ុន ជប៉ុននឹងមិនលក់យន្តហោះចម្បាំងទៅប្រទេសណាដែលកំពុងជាប់ដៃប្រលូកផ្ទាល់នៅក្នុងសង្គ្រាមដាច់ខាត។ នៅក្នុងសន្និសីទកាសែត នៅថ្ងៃអង្គារ អ្នកនាំពាក្យរដ្ឋាភិបាលជប៉ុន លោកយ៉ូស្ហ៊ីម៉ាសាហាយ៉ាស៊ី( Yoshimasa Hayashi )បានបញ្ជាក់ថា ការសម្រេចបន្ធូរបន្ថយច្បាប់លើកនេះផ្តោតតែទៅលើការលក់នាំចេញយន្តហោះចម្បាំងដែលជប៉ុនរួមគ្នាអភិវឌ្ឍ និងផលិតជាមួយអង់គ្លេស និងអ៊ីតាលីតែប៉ុណ្ណោះ។ នេះជាលើកទី២ ក្នុងរយៈពេល៤ខែ ដែលរដ្ឋាភិបាលជប៉ុនបានកែប្រែច្បាប់របស់ខ្លួន។ នៅខែធ្នូចុងឆ្នាំមុន ជប៉ុនទើបបានបន្ធូរបន្ថយច្បាប់ស្តីពីការនាំចេញគ្រឿងបរិក្ខាយោធាម្តងហើយ ដើម្បីបានសិទ្ធិលក់ប្រព័ន្ធខែលមីស៊ីល Patriot ដែលជប៉ុនបានទទួលអាជ្ញាប័ណ្ណពីអាមេរិកដើម្បីផលិត នៅក្នុងទឹកដីរបស់ខ្លួន។ ជប៉ុនត្រូវការលក់ប្រព័ន្ធខែលមីស៊ីលPatriot ដែលអាមេរិកត្រូវការសម្រាប់បញ្ជូនទៅអ៊ុយក្រែន។
ក្រោយចាញ់សង្គ្រាមលោកលើកទី២ ជប៉ុន ត្រូវអនុវត្តតាមរដ្ឋធម្មនុញ្ញដែលអាមេរិកជាអ្នកតាក់តែងហាមមិនឲ្យជប៉ុនត្រលប់ទៅធ្វើសង្គ្រាម ឬលូកដៃ ចូលក្នុងជម្លោះអន្តរជាតិ។ រដ្ឋធម្មនុញ្ញសន្តិនិយមរបស់ជប៉ុននៅបានហាមជប៉ុនមិនឲ្យលក់នាំចេញអាវុធទៅបរទេស ចំណែកកងទ័ពជប៉ុនមានសិទ្ធិត្រឹមតែស្វ័យការពារតែប៉ុណ្ណោះ។រដ្ឋាភិបាលជប៉ុននៅឆ្នាំ ២០១៤ សម័យដឹកនាំរបស់លោកស្ហ៊ីនហ្សូ អាបេ បានលុបចោលជាលើកទី១ បំរាមការលក់អាវុធទៅបរទេស។ នៅចុងឆ្នាំ ២០២២ ជប៉ុនបានបង្កើតទ្រឹស្តីថ្មីស្តីពីសន្តិសុខជាតិ ដែលនៅក្នុងនោះ ជប៉ុនត្រូវបង្កើនថវិកាកងទ័ពឲ្យបានទ្វេដង ដើម្បីពង្រឹងសមត្ថភាពកងទ័ពជប៉ុន និងដើម្បី សម្របខ្លួនទៅតាមស្ថានការណ៍ប្រែប្រួលនៅក្នុងតំបន់ និងពិភពលោកទាំងមូល។
ទាក់ទងការលក់អាវុធចេញក្រៅនេះដែរនៅថ្ងៃពុធទី២០ខែមីនាតាមសេចក្តីរាយការណ៍របស់ Sputnik , លោក Sergey Zhestkii ប្រធានស្តីទីនៃនាយកដ្ឋានអាស៊ីទីបីរបស់ក្រសួងការបរទេសរុស្ស៊ីបានព្រមានប្រទេសជប៉ុនជាថ្មីម្តងទៀត អំពីផលវិបាក ប្រសិនបើប្រព័ន្ធការពារមីស៊ីល Patriot ពិតជាត្រូវបញ្ជូនទៅសហរដ្ឋអាមេរិក ហើយធ្លាយដល់ដីអ៊ុយក្រែនមែន។បន្ទាប់ពីមានជំនួបរវាងឯកអគ្គរាជទូតជប៉ុនប្រចាំនៅរុស្ស៊ី លោក Akira Muto និងអនុរដ្ឋមន្ត្រីការបរទេសរុស្ស៊ី Andrey Rudenko, ស្ថានទូតជប៉ុនប្រចាំទីក្រុងមូស្គូ បានបង្ហាញជំហរថា មីស៊ីល Patriot ដែលផ្ទេរពីជប៉ុនទៅអាមេរិក នឹងមិនយកទៅប្រើប្រាស់នៅអ៊ុយក្រែនឡើយ។លោក Sergey Zhestkii បានក្រើនរម្លឹកថា “បើមីស៊ីល Patriot ពិតជាទៅជួយជំរុញកម្លាំងប្រដាប់អាវុធអ៊ុយក្រែនបន្ថែមទៀតមែន វានឹងត្រូវបានចាត់ទុកថាជាការចូលរួមរបស់ទីក្រុងតូក្យូ ក្នុងសកម្មភាពឧក្រិដ្ឋកម្មរបស់ទីក្រុងកៀវ ដែលបណ្តាលឲ្យមានជនរងគ្រោះកាន់តែច្រើន”។
សូមបញ្ជាក់ជាថ្មី នៅថ្ងៃទី២៤ខែកុម្ភៈឆ្នាំ២០២២ រុស្ស៊ី បានបើកប្រតិបត្តិការយោធាពិសេសក្នុងប្រទេសអ៊ុយក្រែន ក្នុងគោលបំណងរំដោះតំបន់ Donbass ព្រោះថាបើយោងតាមភាគីរុស្ស៊ី, នៅទីនោះប្រជាជននៃសាធារណរដ្ឋ Donetsk និង Lugansk បានរស់នៅក្រោមគ្រាប់ផ្លោងរបស់កងកម្លាំងទីក្រុងកៀវ សឹងរាល់ថ្ងៃ។ចាប់តាំងពីជម្លោះផ្ទុះឡើង ជប៉ុនតែងតែគាំទ្រទីក្រុងកៀវជានិច្ច ហើយបានដាក់ទណ្ឌកម្មជាច្រើនប្រឆាំងទីក្រុងមូស្គូ។ ដោយឡែក បញ្ហាជម្លោះមួយទៀតរវាងទីក្រុងមូស្គូនិងតូក្យូ គឺពាក់ព័ន្ធកោះ Kuril ដែលភាគីទាំងពីរ អះអាងភាពជាម្ចាស់រៀងៗខ្លួន។
កាលពីដើមខែកុម្ភៈ លោក Dmitry Medvedev អនុប្រធានក្រុមប្រឹក្សាសន្តិសុខជាតិរុស្ស៊ី និងជាអតីតប្រធានាធិបតីនៃប្រទេសនេះ បានប្រាប់រដ្ឋាភិបាលជប៉ុនថា ប្រសិនបើពួកគេចង់បញ្ចប់សន្ធិសញ្ញាសន្តិភាពជាមួយរុស្ស៊ី ដើម្បីបញ្ចប់សង្គ្រាមលោកលើកទីពីរជាផ្លូវការមែននោះ ទីក្រុងតូក្យូ គួរតែបោះបង់ការទាមទារទឹកដីរបស់ពួកគេនៅទីនោះទៅ។ប្រព័ន្ធផ្សព្វផ្សាយក្នុងស្រុក បានរាយការណ៍ថា ក្រុមនាវាមកពីកងនាវាប្រចាំតំបន់ប៉ាស៉ីហ្វិករបស់យោធារុស្ស៉ី បានធ្វើសមយុទ្ធជើងទឹកដ៏ធំមួយ ដែលរួមមានទាំងការបាញ់គ្រាប់ពិត នៅឯតំបន់ឈូងសមុទ្រ Peter the Great និងសមុទ្រជប៉ុន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២០ ខែមីនា ឆ្នាំ ២០២៤។
ក្រុមនាវាខាងលើ ដែលរួមមាននាវា the Hero of the Russian Federation Aldar Tsydenzhapov, Gromky និង Sovershenny បានហាត់សមទប់ទល់នឹងការវាយលុកពីដ្រូនរត់លើផ្ទៃទឹក និងយន្តហោះដ្រូន។ សេចក្តីថ្លែងការណ៍របស់កងនាវារុស្ស៉ី បានឱ្យដឹងថា «តាមផែនការនៃការធ្វើសមយុទ្ធ ក្រុមនាវិកនៃនាវាចម្បាំងទាំងនោះ បានហាត់សមអនុវត្តបច្ចេកទេសយុទ្ធសាស្ត្រ សម្រាប់ការប្រយុទ្ធតាមផ្លូវទឹក ជាមួយនាវាចម្បាំងដទៃទៀត ដែលដើរតួជាសត្រូវ»។គួរបញ្ជាក់ថា The Peter the Great Gulf គឺជាឈូងសមុទ្រធំជាងគេនៅសមុទ្រជប៉ុន ដែលស្ថិតនៅចន្លោះប្រទេសរុស្ស៉ី និងជប៉ុន។
