ក្រុមហ៊ុនKNN GROUP សម្រេចចិត្តវិនិយោគបង្កើតរោងចក្រតម្លើងរថយន្តចំនួនទឹកប្រាក់ ២៨លានដុល្លាសហរដ្ឋអាម៉េរិក!

 ក្រុមហ៊ុន KNN GROUP គឺជាក្រុមហ៊ុនដែលបង្កើតឡើង និងគ្រប់គ្រងភាគហ៊ុន ១០០% ដោយជនជាតិខ្មែរ ហើយការវិនិយោគរោងចក្រដំឡើងរថយន្តនេះ នឹងផ្តល់នូវអត្ថប្រយោជន៍ដល់ប្រទេសយើង រួមមានជួយកាត់បន្ថយការពឹងផ្អែកលើការនាំចូល ព្រមទាំងផ្តល់នូវការផ្ទេរបច្ចេកវិទ្យាទំនើប និងជំនាញបច្ចេកទេសដល់យុវជនខ្មែរជំនាន់ក្រោយ។ លើសពីនេះគឺចូលរួមអភិវឌ្ឍធនធានមនុស្ស បង្កើតបុគ្គលិកជំនាញ និងឱកាសការងាររាប់រយកន្លែងសម្រាប់សហគមន៍យើងផងដែរ»។ 

នេះជាការថ្លែងរបស់អ្នកឧកញ៉ា ជាម ឃុនណាត ប្រធានក្រុមប្រឹក្សាភិបាល ក្រុមហ៊ុន KNN GROUP ក្នុងពិធីបញ្ចុះបឋមសិលាបើកការដ្ឋានសាងសង់រោងចក្រដំឡើងរថយន្ត ដែលប្រារព្ធឡើងនាថ្ងៃទី២៦ ខែកក្កដា ឆ្នាំ២០២៦ ស្ថិតក្នុងស្រុកខ្សាច់កណ្តាល ខេត្តកណ្តាល។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានមានប្រសាសន៍វាយតម្លៃថា៖ «ខ្ញុំសូមអរគុណចំពោះក្រុមហ៊ុន KNN GROUP ដែលបានជឿជាក់លើរដ្ឋាភិបាលកម្ពុជា និងសូមអះអាងថា ក្រុមប្រឹក្សាអភិវឌ្ឍន៍កម្ពុជា នឹងបន្តធ្វើការយ៉ាងជិតស្និទ្ធជាមួយក្រុមហ៊ុន ដើម្បីធានាឲ្យគម្រោងនេះអនុវត្តបានដោយរលូន និងទទួលបានជោគជ័យស្របតាមប្រសាសន៍ដ៏ខ្ពង់ខ្ពស់របស់ សម្តេចធិបតី នាយករដ្ឋមន្ត្រី ដែលសម្តេចបានគូសបញ្ជាថា កម្ពុជាមិនមែនចង់បានតែការវិនិយោគនោះទេ តែក៏ចង់បានភាពរីកចម្រើននៃការវិនិយោគរបស់ក្រុមហ៊ុននៅកម្ពុជាផងដែរ។»
 
គម្រោងរោងចក្រដំឡើងរថយន្ត JETOUR មានទុនវិនិយោគសរុប ២៨លានដុល្លារអាម៉េរិក លើផ្ទៃដីសរុប ១០ហិកតា ដែលរំពឹងថានឹងចាប់ផ្តើមខ្សែសង្វាក់ផលិតកម្មនៅដើមឆ្នាំ ២០២៧។ រោងចក្រនេះត្រូវបានរចនាឡើងជាមួយនឹងបច្ចេកវិទ្យាជំនាន់ចុងក្រោយ ដែលមានសមត្ថភាពផលិត និងដំឡើងរថយន្តបានជាង ២០,០០០ គ្រឿងក្នុងមួយឆ្នាំ។ រោងចក្រនេះមានសមត្ថភាពអាចផ្គុំដំឡើងរថយន្តច្រើនប្រភេទ រួមមាន រថយន្តប្រភេទចំហេះក្នុង (សាំង) ប្រភេទអគ្គីសនីលាយសាំង (PHEV) និងប្រភេទអគ្គីសនីសុទ្ធ (EV) គ្រប់ប្រភេទ ដើម្បីបំពេញតម្រូវការទីផ្សារក្នុងស្រុក ក៏ដូចជាការត្រៀមខ្លួនសម្រាប់នាំចេញទៅកាន់ទីផ្សារតំបន់អាស៊ាននាពេលអនាគត។

ក្រៅពីខ្សែសង្វាក់ផលិតកម្មដ៏ទំនើប KNN Group ក៏បានវិនិយោគលើផ្លូវសាកល្បងរថយន្ត (Test Track) ប្រវែង ១,៣៣៥ម៉ែត្រ ដែលជាផ្លូវសាកល្បងវែងតាមស្តង់ដារអន្តរជាតិ ដើម្បីធ្វើតេស្តគុណភាពរថយន្តគ្រប់គ្រឿងមុនពេលបញ្ជូនទៅដល់ដៃអតិថិជន។

ឯកឧត្តម ជា វុទ្ធី បាន​លើក​ឡើងពី​លទ្ធផលវិនិយោគ​ដ៏​រឹងមាំ​របស់​កម្ពុជា​ក្នុងរយៈ​ពេល​មួយ​ឆ្នាំ​កន្លងឲ្យដឹងថា ក្នុង​ឆ្នាំ២០២៥ CDC បាន​ចុះ​បញ្ជី​គម្រោងវិនិយោគ​ចំនួន ៦៣០ គម្រោង ដែល​មានទុនវិនិយោគ​សរុប​ជិត ១០ពាន់លាន​ដុល្លារ​។ត្រឹមតែ​ឆមាសទី១ ឆ្នាំ២០២៦ មាន​គម្រោងវិនិយោគ​ចំនួន ២៧៦ គម្រោង ដែល​មានទុន​ប្រមាណ ៤,៧ពាន់លាន​ដុល្លារ ត្រូវ​បាន​អនុម័ត ដែល​បង្ហាញពីសន្ទុះ​បន្ត​នៃ​លំហូរ​វិនិយោគ​ក្នុង​វិស័យ​ជា​ច្រើន​។

ការ​ពង្រីក​តំបន់​សេដ្ឋកិច្ច​ពិសេស (SEZs) របស់​កម្ពុជា បាន​ដើរតួ​នាទី​សំខាន់​ក្នុង​ការ​ទាក់ទាញវិនិយោគ​ដែល​មាន​គុណ​ភាព​ខ្ពស់ ខណៈជួយ​គាំទ្រ​ដល់​ការ​ធ្វើ​ពិពិធ​កម្ម​មូលដ្ឋាន​ឧស្សាហកម្ម​របស់​ប្រទេស​។ តំបន់​ទាំង​នេះ​បាន​ក្លាយ​ជាទី​តាំង​យុទ្ធ​សាស្ត្រ​សម្រាប់​ក្រុម​ហ៊ុន​ផលិតកម្ម ដែល​ស្វែងរក​ទីតាំង​ផលិតកម្ម​មាន​ប្រសិទ្ធភាព ប្រព័ន្ធដឹក​ជញ្ជូន​ប្រសើរ​ឡើង និង​ការ​ចូល​ទៅ​កាន់ទី​ផ្សារ​តំបន់ និង​អន្តរជាតិ​។ឯកឧត្តមបាន​សង្កត់​ធ្ងន់​បន្ថែមថា កម្ពុជា​កំពុង​ក្លាយ​ជា​មូលដ្ឋាន​ផលិតកម្ម​ថ្មី​មួយ​សម្រាប់​ឧស្សាហ​កម្មយាន​យន្ត​ក្នុង​តំបន់​។