ចិនអួតថាសាកល្បងបានជោគជ័យការបាញ់តេស្តមីស៊ីលយុទ្ធសាស្រ្ត នៅមហាសមុទ្រប៉ាស៊ីហ្វិកតែប្រទេសផ្សេងប្រតិកម្ម

ចិន៖សារព័ត៌មាន AFP នាថ្ងៃចន្ទ ទី៦ ខែកក្កដា ឆ្នាំ២០២៦ កងទ័ពជើងទឹកចិន បានប្រកាសថា ខ្លួនបានទទួលជោគជ័យក្នុងការបាញ់តេស្តមីស៊ីលនៅមហាសមុទ្រប៉ាស៊ីហ្វិក នាថ្ងៃចន្ទនេះតែមានបណ្តាប្រទេសនៅក្នុងតំបន់ បាននាំគ្នាចេញមុខប្រតិកម្ម។ 

អ្នកនាំពាក្យកងទ័ពជើងទឹកចិន លោក Wang Xuemeng បាននិយាយថា នាវេលាម៉ោង១២ថ្ងៃត្រង់ ថ្ងៃចន្ទ ទី៦ ខែកក្កដានេះ នាវាមុជទឹកយុទ្ធសាស្រ្តមួយគ្រឿងរបស់កងទ័ពជើងទឹកចិន បានបាញ់ដោយជោគជ័យនូវមីស៊ីលយុទ្ធសាស្រ្ត១គ្រាប់ ដែលបំពាក់ក្បាលគ្រាប់សិប្បនិម្មិត ឆ្ពោះទៅកាន់តំបន់មហាសមុទ្រប៉ាស៉ីហ្វិក ហើយវាបានធ្លាក់ចំទីតាំងផ្ទៃសមុទ្រដែលត្រូវបានកំណត់ទុក។ Wang បានបន្ថែមថា ការធ្វើតេស្តនេះ គឺជាផ្នែកមួយនៃការហ្វឹកហាត់យោធាប្រចាំឆ្នាំរបស់ចិន ហើយបណ្តាប្រទេសពាក់ព័ន្ធ ត្រូវបានផ្តល់ដំណឹងជាមុន។

ការបាញ់តេស្តមីស៊ីលខាងលើ គឺចំថ្ងៃតែមួយដែលចិននិងរុស្ស៊ីត្រូវចាប់ផ្តើមការធ្វើសមយុទ្ធយោធាជើងទឹករួមគ្នា នៅក្បែរទីក្រុង Qingdao នៅភាគខាងកើតប្រទេសចិន។ ក្រុមប្រទេសក្នុងតំបន់ប៉ាស៊ីហ្វិក ដូចជាប៉ាពូអាស៊ីនូវែលហ្គីណេ និងនូវែលសេឡង់ បានឱ្យដឹងថា ពួកគេត្រូវបានចិនជូនដំណឹងជាមុន អំពីគម្រោងបាញ់តេស្តមីស៊ីលបាលិស្ទីគអន្តរទ្វីប ICBM ខណៈអូស្រ្តាលីនិងជប៉ុន បាននាំគ្នាបង្ហាញក្តីកង្វល់ ជុំវិញការធ្វើតេស្តមីស៉ីលរបស់ចិន។រដ្ឋមន្រ្តីក្រសួងការបរទេសអូស្រ្តាលី លោកស្រីPenny Wong ប្រតិកម្មដោយនិយាយថា ការបាញ់បង្ហោះនេះកំពុងបង្កឱ្យមានអស្ថិរភាពនៅក្នុងតំបន់ បើទោះជាចិនបានជូនដំណឹងដល់រដ្ឋាភិបាល ពីការធ្វើតេស្តដែលបានគ្រោងទុកនេះក៏ដោយ។ លោកស្រីWongបានប្រាប់អ្នកសារព័ត៌មាននៅក្នុងសន្និសីទសារព័ត៌មានមួយថា អូស្រ្តាលីបានបញ្ជាក់យ៉ាងច្បាស់ថា ការធ្វើតេស្តដែលបានស្នើឡើងនេះ គឺនៅក្នុងបរិបទនៃការកសាងយោធាយ៉ាងឆាប់រហ័សដោយប្រទេសចិន ដែលខ្វះតម្លាភាពនិងការធានាឡើងវិញ អំពី ចេតនាដែលតំបន់នេះរំពឹងទុក។

ជប៉ុនបាននិយាយថា ខ្លួនទទួលបានការជូនដំណឹងពីការធ្វើតេស្តមីស៊ីល និងបានជំរុញក្រុងប៉េកាំងឱ្យពិចារណាឡើងវិញ។ ជប៉ុនបានបង្ហាញការព្រួយបារម្ភយ៉ាងខ្លាំង ជុំវិញការកើនឡើងនៃសកម្មភាពយោធារបស់ចិន ដោយបន្ថែមថា ឆ្មាំសមុទ្រជប៉ុនទទួលបានការជូនដំណឹង ពីអាជ្ញាធរចិននៅថ្ងៃអាទិត្យម្សិលមិញ អំពី កម្ទេចកម្ទីដែលអាចធ្លាក់ចូលទៅក្នុងតំបន់សេដ្ឋកិច្ចផ្តាច់មុខរបស់ជប៉ុន(EEZ)។ យ៉ាងណាមិញ បើតាមទីភ្នាក់ងារសារព័ត៌មានជប៉ុនKyodoរាយការណ៍នៅថ្ងៃចន្ទនេះ ដោយដកស្រង់ប្រភពពីរដ្ឋាភិបាលជប៉ុនថា មីស៊ីលបានធ្លាក់នៅខាងក្រៅEEZរបស់ជប៉ុន។

រដ្ឋមន្រ្តីក្រសួងការបរទេសណូវែលសេឡង់ លោកWinston Petersបាននិយាយថា ប្រទេសរបស់លោក មានការព្រួយបារម្ភយ៉ាងខ្លាំង ចំពោះការធ្វើតេស្តនេះ ដោយបន្ថែមថា ចិនបានជូនដំណឹងមុនតែប៉ុន្មានម៉ោងប៉ុណ្ណោះ នៃការបាញ់មីស៊ីល។ លោកPetersបាននិយាយនៅក្នុងសេចក្តីថ្លែងការណ៍មួយថា «ប្រទេសណូវែលសេឡង់ចាត់ទុករឿងនេះ ថាជាការវិវឌ្ឍដែលមិនគួរឱ្យចង់បាន និងគួរឱ្យព្រួយបារម្ភ។ យើង ដូចជាប្រទេសជិតខាងរបស់យើងនៅក្នុង​តំបន់ប៉ាស៊ីហ្វិកដទៃទៀតដែរ មិនមានចំណាប់អារម្មណ៍ ចំពោះប្រទេសចិន ដែលប្រើប្រាស់ប៉ាស៊ីហ្វិកខាងត្បូង ជាកន្លែងសាកល្បងសមត្ថភាពមីស៊ីលនោះទេ»។

កាលពីខែកញ្ញា ឆ្នាំ២០២៤ កងកម្លាំងរ៉ុក្កែតចិន ធ្លាប់បានបាញ់តេស្តក្បាលគ្រាប់សិប្បនិម្មិត១គ្រាប់ ឆ្ពោះទៅកាន់ផ្ទៃសមុទ្រក្បែរដែនដី French Polynesia ដែលស្ថិតក្រោមអធិបតេយ្យរបស់ប្រទេសបារាំង។ វាគឺជាការបាញ់មីស៊ីលរយៈចម្ងាយឆ្ងាយលើកដំបូង នៅលើដែនទឹកអន្តរជាតិ គិតក្នុងរយៈពេលជាង៤០ឆ្នាំ។ នាពេលនោះ ក្រុមអ្នកវិភាគបានលើកឡើងថា វាទំនងជាមីស៊ីលទំនើប Dong Feng-31 របស់ចិន ដែលមានសមត្ថភាពបំពាក់ក្បាលគ្រាប់នុយក្លេអ៊ែរកម្លាំងខ្លាំង៕