ចិន អង្វរករមីយ៉ាន់ម៉ា សូមឈប់បាញ់លើក្បួនដឹកជំនួយ យកទៅជួយជនរងគ្រោះរញ្ជួយដី
11-March-2026 / ព័ត៌មានអន្តរជាតិ
ប្រទេសមីយ៉ានម៉ា៖ប្រទេសចិនបានអង្វរករដល់ភាគីទាំងអស់នៅក្នុងប្រទេសមីយ៉ាន់ម៉ា សូមឈប់បាញ់ប្រហារលើក្បួនដែលដឹកជំនួយសង្គ្រោះបន្ទាន់យកទៅជួយជនរងគ្រោះដោយរញ្ជួយដី តទៅទៀត។ តាមការចុះផ្សាយរបស់ទីភ្នាក់ងារស៊ិនហួ( Xinhua)បានឲ្យដឹងថា៖ថ្លែងក្នុងសន្និសីទកាសែតកាលពីថ្ងៃពុធទី២ខែមេសាឆ្នាំ២០២៥ អ្នកនាំពាក្យក្រសួងការពារជាតិចិនលោក Guo Jiakun និយាយថា រដ្ឋាភិបាលទីក្រុងប៉េកាំង សូមអំពាវនាវដល់ភាគីទាំងអស់នៅក្នុងប្រទេសមីយ៉ាន់ម៉ា ត្រូវធានាសុវត្ថិភាពដល់កម្មករសង្គ្រោះរញ្ជួយដី និងក្បួនដឹកគ្រឿងជំនួយពីរដ្ឋចិន និងប្រទេសផ្សេងទៀត ខណៈជំនួយដែលផ្តល់ដោយកាកបាទក្រហមចិន បានទៅដល់ប្រទេសមីយ៉ាន់ម៉ាហើយ និងកំពុងធ្វើដំណើរទៅកាន់តំបន់រងគ្រោះដោយគ្រោះមហន្តរាយនៅទីក្រុង Mandalay។
ការអង្វរកររបស់ចិន កើតឡើងមួយថ្ងៃបន្ទាប់ពីមានសេចក្តីរាយការណ៍ថា កងកម្លាំងរបបយោធាភូមានៅភាគខាងជើងរដ្ឋ Shan បានវាយប្រហារលើក្បួនរថយន្តជំនួយសង្គ្រោះរបស់ចិន។ប្រភពពីកងទ័ពរំដោះជាតិតាអាំង (TNLA), ក្បួនរថយន្តជំនួយមនុស្សធម៌ដែលមានរថយន្តចំនួន៩គ្រឿងរៀបចំដោយកាកបាទក្រហមចិន ត្រូវបានវាយប្រហារដោយកងកម្លាំងរបបយោធាកាលពីយប់ថ្ងៃអង្គារនៅក្នុងភូមិ Ommathi សង្កាត់ Nawnghkio ភាគខាងជើងរដ្ឋ Shan។ក្រោយរងការវាយប្រហារ ក្បួនរថយន្តត្រូវបង្ខំចិត្តវិលត្រឡប់ទៅក្រុង Nawnghkio ដែលគ្រប់គ្រងដោយ TNLA វិញ។
កាលពីដើមសប្តាហ៍នេះដែរ លោក មីន អ៊ុងឡាំង បានបញ្ជាឲ្យកងទ័ពមីយ៉ាន់ម៉ា បើកការវាយប្រហារអាកាសនៅក្រុង Salin នៃតំបន់ Magway និងក្រុង Singu នៃតំបន់ Mandalay បណ្តាលឲ្យជនស៊ីវិលជាង៤០នាក់ស្លាប់ រួមមានទាំងកុមារផងដែរ។ លើសពីនេះក៏មានការវាយប្រហារលើភូមិចំនួន២នៅក្រុង Nawnghkio ភាគខាងជើងរដ្ឋ Shan បណ្តាលឲ្យជនស៊ីវិល៥នាក់រងរបួស និងខ្ទេចអស់ផ្ទះ២ខ្នងទៀតផង។រដ្ឋាភិបាលយោធាមីយ៉ាន់ម៉ា កាលពីថ្ងៃពុធ ទី២ ខែមេសា ទើបបានប្រកាសពីបទឈប់បាញ់បណ្ដោះអាសន្នមួយរហូតដល់ថ្ងៃទី២២មេសា ខណៈចំនួនអ្នកស្លាប់ដោយសារគ្រោះរញ្ជួយដីកើនឡើង ហើយ អ្នកនៅរស់រានមានជីវិតកំពុងដង្ហោយរកជំនួយបន្ថែម។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។
សូមបញ្ជាក់ថាកាលពីរសៀលថ្ងៃអង្គារទី១មេសា យ៉ាងហោចណាស់ មានក្រុមឧទ្ទាមប្រដាប់អាវុធ ជនជាតិដើមភាគតិចចំនួន៣ក្រុម បានប្រកាសផ្អាកការប្រយុទ្ធតទល់នឹងរបបសឹកភូមា រយៈពេល១ខែ ដើម្បីជួយសម្រួលដល់ប្រតិបត្តិការមនុស្សធម៌បន្ទាប់ពីភូមាបានរងគ្រោះមហន្តរាយរញ្ជួយដីដ៏ធ្ងន់ធ្ងរបំផុត។ ការប្រកាសរបស់ក្រុមឧទ្ទាមទាំងនេះ គឺបានធ្វើឡើងបន្ទាប់ពីក្រុមកម្លាំងប្រជាការពារ FDP ដែលក្រុមសកម្មជនស៊ីវីលប្រឆាំងរបបសឹក បានប្រកាសឈប់ប្រយុទ្ធពាក់កណ្តាល។
ដោយឡែកអង្គការសហប្រជាជាតិឯណោះវិញ បានលើកឡើងថា ជំនួយផ្នែកសប្បុរសធម៌ទើបតែបានទទួលប្រមាណជា ១.១លានដុល្លារអាម៉េរិកប៉ុណ្ណោះ មកដល់ប្រទេសមីយ៉ាន់ម៉ា រីឯក្រុមសង្គ្រោះ និងក្រុមរុករកជនបាត់ខ្លួនបានមកដល់ទីតាំងកន្លែងកើតហេតុមានប្រមាណជា២៥ក្រុម ដែលមកពីប្រទេសចំនួន១៣ ក្នុងនោះរួមមានចិន ឥណ្ឌា សមាគមប្រជាជាតិអាស៊ីអាគ្នេយ៍ និងមកពីក្រៅតំបន់អាស៊ានផ្សេងទៀត។ដោយយោងតាមទីភ្នាក់ងារជំនួយមនុស្សធម៌ បានលើកឡើងនៅថ្ងៃព្រហស្បតិ៍នេះដែរថា បញ្ហាអនាម័យ និងទឹកប្រើប្រាស់បានក្លាយទៅជាកិច្ចការប្រឈមខ្លាំង។
របបសឹកមីយ៉ាន់ម៉ាបានថ្លែងសារតាមរយៈរបាយការណ៍ដែលគេរៀបចំទុកដាក់រួចហើយនោះថា “គោលបំណងនៃបទឈប់បាញ់គ្នាជាបណ្តោះអាសន្ននេះ គឺក្នុងគោលបំណងដើម្បីជួយពន្លឿនកិច្ចការជំនួយ និងការសាងសង់ឡើងវិញនូវប្រព័ន្ធហេដ្ឋារចនាសម្ព័ន្ធ រួមទាំងបន្តរក្សាសន្តិសុខ និងសន្តិភាព ស្ថេរភាព សាន្តត្រាណរបស់ប្រជាពលរដ្ឋ”។គួរបញ្ជាក់ថា មេដឹកនាំរដ្ឋាភិបាលយោធាមីយ៉ាន់ម៉ា លោក Min Aung Hlaing គ្រោងនឹងធ្វើដំណើរទៅកាន់ទីក្រុងបាងកក នៅថ្ងៃព្រហស្បតិ៍សប្ដាហ៍នេះ ដើម្បីចូលរួមក្នុងកិច្ចប្រជុំកំពូល នៃក្រុមបណ្ដាប្រទេសក្នុងតំបន់អាស៊ីអាគ្នេយ៍ បូកមីយ៉ាន់ម៉ា និងថៃ ជាទីដែលលោកនឹងត្រូវពិភាក្សាពីការឆ្លើយតបទៅនឹងមហន្តរាយបង្កឡើងដោយគ្រោះរញ្ជួយដី៕
សូមជម្រាបថា យោងតាមសមាគមសំឡេងប្រជាធិបតេយ្យភូមា (DVB) គិតត្រឹមព្រឹកថ្ងៃព្រហស្បតិ៍ទី៣ខែមេសាឆ្នាំ២០២៥ តួលេខមនុស្សស្លាប់ដោយសារគ្រោះរញ្ជួយដីកម្រិតធ្ងន់៧.៧រ៉ិចទ័រដ៏សាហាវ បានកើនឡើងដល់ ៣ ៨៦៦នាក់ហើយ ខណៈ ៥ ៤៥៥នាក់របួសនិង៧១៩នាក់បាត់ខ្លួន។គ្រោះរញ្ជួយដីនេះក៏បានអង្រួនដល់ប្រទេសជិតខាង តួយ៉ាងដូចជាថៃផងដែរជាទីដែលមនុស្ស ២២នាក់បានស្លាប់ ខណៈ៧០នាក់ត្រូវបានជឿជាក់ថា ជាប់នៅក្រោមគំនរអគារបាក់បែកដែលបានដួលរលំ។
