តើការលើកលែងទោសអតីតប្រធានគណបក្សកម្លាំងជាតិលោកស៊ុនចន្ធីមានវាសនាដូចលោកកឹមសុខា!?
21-September-2026 / ផ្សេងៗ
ភ្នំពេញ៖លោក ស៊ុន ចន្ធី អាយុ៤៦ឆ្នាំ អតីតប្រធានគណបក្ស កម្លាំងជាតិ (NPP) ដែលត្រូវបានតុលាការសម្រេចផ្ដន្ទាទោសដាក់ពន្ធនាគារ កំណត់២ឆ្នាំ តាមអំណាចសាលក្រមព្រហ្មទណ្ឌស្ថាពរលេខ ៥៣០៩ «រ» ចុះថ្ងៃទី២៦ ខែធ្នូ ឆ្នាំ២០២៤ របស់សាលាដំបូងរាជធានីភ្នំពេញ និងបានក្លាយជាទណ្ឌិត ទទួលបានការត្រាស់បង្គាប់លើកលែងទោស (ចំពោះទោសដាក់ពន្ធនាគារ ដែលជាមូលទោស) ដោយព្រះរាជក្រឹត្យលេខ នស/រកត/០២២៦/២៦៩ ចុះថ្ងៃទី១៧ ខែកុម្ភៈ ឆ្នាំ២០២៦ តាមសេចក្ដីក្រាបបង្គំទូលថ្វាយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រិ នៃព្រះរាជាណាចក្រកម្ពុជា។
មេបក្សកម្លាំងជាតិលោក ស៊ុន ចន្ធី ត្រូវបានតុលាការចោទប្រកាន់ពីពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមកាលពីចុងឆ្នាំ២០២៤។ លោក ចន្ធី ត្រូវបានចាប់ខ្លួនកាលពីខែឧសភា ឆ្នាំ២០២៤ នៅអាកាសយានដ្ឋានអន្តរជាតិ ពេលលោកត្រឡប់ពីជួបជាមួយពលករខ្មែរនៅប្រទេសជប៉ុនវិញ។ កាលនោះអ្នកនាំពាក្យអគ្គនាយកពន្ធនាគារលោក ឃៀង សុណាឌីន បានប្រាប់កាសែតថា លោក ស៊ុន ចន្ធី ត្រូវបានដោះលែងពីមណ្ឌលកែប្រែនៅខេត្តពោធិ៍សាត់ហើយ។ អ្នកនាំពាក្យរូបនេះមិនបានបញ្ជាក់ពីមូលហេតុដែល លោក ចន្ធី បានទទួលព្រះរាជទានលើកលែងទោសនោះទេ។ ដើម្បីទទួលបានព្រះរាជទានលើកលែងទោស ត្រូវមានសំណើពីនាយករដ្ឋមន្ត្រីដាក់ថ្វាយទៅកាន់ព្រះមហាក្សត្រ។លោកស៊ុនចន្ធីបានធ្វើលិខិតសុំទោសសម្តេចធិបតីហ៊ុនម៉ាណែតនាយករដ្ឋមន្ត្រី។
ការលើកលែងទោសនេះទំនងជាអាចលើកលែងការហាមឃាត់លោក ស៊ុន ចន្ធី ពីការធ្វើនយោបាយមួយជីវិត និងទទួលបានសិទ្ធិបោះឆ្នោតវិញផងដែរ។តែមកដល់ពេលនេះលោកស៊ុនចន្ធីមានដែលបង្ហាញសញ្ញាណាថាលោកបានចូលឆាកនោយបាយវិញទេក្នុងពេលដែលលោកជាមុន្នីនៅតែជាប្រធានគណបក្សកម្លាំងជាតិតាមការទទួលស្គាល់ដោយក្រសួងមហាផ្ទៃ។ ពេលលោកស៊ុនចន្ធីត្រូវកាត់ទោស តុលាការបានដកហូតសិទ្ធិធ្វើនយោបាយអស់មួយជីវិត និងសិទ្ធិបោះឆ្នោតរបស់លោកផងដែរ។លោក រ៉ុង ឈុនទីប្រឹក្សាគណបក្សកម្លាំងជាតិបាន ប្រាប់អ្នកសារព័ត៌មាននៅក្រៅរបងតុលាការកាលនោះថាថា៖ «មិនត្រឹមតែដាក់ទោស ២ ឆ្នាំ ថែមទាំងដកសិទ្ធិ ដកសិទ្ធិរបស់គាត់ មិនឲ្យបោះឆ្នោត មិនឲ្យឈរឈ្មោះបោះឆ្នោត និងពិន័យ ៤លាន រៀល។
ទីប្រឹក្សាគណបក្សកម្លាំងជាតិ លោក រ៉ុង ឈុន ស្វាគមន៍ចំពោះការដោះលែងលោក ចន្ធី និងបានអំពាវនាវឲ្យមានការដោះលែងសកម្មជន និងមន្ត្រីបក្សប្រឆាំងផ្សេងទៀត រួមទាំងអតីតមេដឹកនាំគណបក្សប្រឆាំងលោក កឹម សុខា ដែលត្រូវបានតុលាការកាត់ទោសឲ្យជាប់ឃុំក្នុងផ្ទះអស់មួយជីវិត កញ្ញា សេង ធារី សកម្មជនតស៊ូមតិផ្នែកសិទ្ធិមនុស្ស និងសកម្មជនបរិស្ថានទាំងប្រាំនាក់របស់អង្គការមាតាធម្មជាតិ។លោកមានប្រសាសន៍ថា៖ «ការដោះលែងអ្នកជាប់ឃុំទាំងនោះ នឹងធ្វើឲ្យរដ្ឋាភិបាលទទួលបានការគាំទ្រផ្នែកការទូតពីអន្តរជាតិ ជាពិសេសលើបញ្ហាជម្លោះព្រំដែនជាមួយប្រទេសថៃ»។
លោក អំ សំអាត នាយកទទួលបន្ទុកកិច្ចការទូទៅរបស់អង្គការលីកាដូ បានហៅការដោះលែងលោក ស៊ុន ចន្ធី នេះថាជា «សញ្ញាវិជ្ជមាន» សម្រាប់អ្នកនយោបាយបក្សប្រឆាំង។លោកមានប្រសាសន៍ថា៖ «ស្ថានភាពបច្ចុប្បន្ននេះ កម្ពុជាត្រូវការសាមគ្គីភាព ផ្សះផ្សា និងរួបរួមក្នុងចំណោមប្រជាជនខ្មែរ ហេតុនេះគ្រប់អ្នកនយោបាយត្រូវប្រកាន់ខ្ជាប់នូវប្រយោជន៍ជាតិ និងវិលទៅរកការចរចារវិញ»។
បើតាមអង្គការ លីកាដូ មាន «អ្នកទោសមនសិការ» ចំនួន៩៧នាក់កំពុងជាប់ឃុំនៅកម្ពុជា ដោយអ្នកទាំងនោះជាអ្នកនយោបាយ សកម្មជនបរិស្ថាន សកម្មជនសហជីព និងជាអ្នកសារព័ត៌មាន។ អង្គការសិទ្ធិមនុស្សចាត់ទុកថា អ្នកទាំងនោះជាប់ឃុំដោយគ្មានមូលដ្ឋានច្បាស់លាស់ក្នុងការចោទប្រកាន់ និងត្រូវជាប់ទោសដោយសារតែការបញ្ចេញមតិ ឬភាពជាសកម្មជនរបស់ពួកគេ។
សូមបញ្ជាក់ថាមុនមានការលើកលែងទោសនេះដែរខណៈនៅសល់ពេលតែជាង ២ខែទៀតសម្រាប់ការបញ្ចប់ការអនុវត្តន៍ទោសទ ប្ដី តុលាការក្រុងភ្នំពេញ បានបន្ថែម បទចោទប្រកាន់មួយថ្មីទៀត លើលោកស៊ុនចន្ធីពីបទ«រួមគំនិតក្បត់»ថែមទៀត។កាលពីថ្ងៃទី១៩ ខែមករា តំណាងអយ្យការអមសាលាដំបូងរាជធានីភ្នំពេញ លោក សេង ហៀង បានចេញដីកាបង្គាប់ឲ្យប្រធានមណ្ឌលអប់រំកែប្រែទី៤ ខេត្តពោធិ៍សាត់នាំខ្លួនលោក ស៊ុន ចន្ធី ទៅចូលរួមសវនាការនៅថ្ងៃទី១២ ខែកុម្ភៈ ក្រោមបទចោទប្រកាន់«រួមគំនិតក្បត់» ក្នុងសំណុំរឿងព្រហ្មទណ្ឌចុះថ្ងៃទី១០ ខែធ្នូ ឆ្នាំ ២០២៤។
ប្រពន្ធលោក ស៊ុន ចន្ធី គឺលោកស្រី យាន ស្រីយ៉ាន ប្រាប់កាសែតថា លោកស្រីចាត់ទុកការបន្ថែមបទ«រួមគំនិតក្បត់» ដែលតុលាការក្រុងភ្នំពេញ ទើបចោទប្រកាន់ថ្មីលើលោក ស៊ុន ចន្ធី នេះ ថា ជារឿងអយុត្តិធម៌ និងបន្ថែមទម្ងន់នយោបាយ។ លោកស្រី ហៅការបន្ថែមបទចោទថ្មីរបស់តុលាការ ថា ជាវិធានការការបញ្ចប់ជីវិត នយោបាយ ប្ដីរបស់លោកស្រី។ លោកស្រីទទូចឲ្យរដ្ឋាភិបាល លោក ហ៊ុន ម៉ាណែត អនុវត្តច្បាប់ឲ្យបានត្រឹមត្រូវ ដោយគោរពសិទ្ធិប្រកួតប្រជែងនយោបាយ។
តុលាការក្រុងភ្នំពេញ កាលពីថ្ងៃទី២៦ ខែធ្នូ ឆ្នាំ២០២៤ បានផ្ដន្ទាទោសអតីតប្រធានគណបក្សកម្លាំងជាតិរូបនេះ ឲ្យជាប់ពន្ធនាគារ២ឆ្នាំ និងដកហូតសិទ្ធិបោះឆ្នោត និងឈរឈ្មោះឱ្យគេបោះឆ្នោត ពីបទ«ញុះញង់» ពាក់ព័ន្ធនឹងការរិះគន់ លើការចែកប័ណ្ណក្រីក្រជូនពលរដ្ឋ ដែលលោកថា មានលក្ខណៈលម្អៀង និងរើសអើងនិន្នាការនយោបាយ។គេមិនដឹងថាតើព្រះរាជក្រឹត្យលើកលែងមូលទោសខាងលើមានបូកបញ្ចូលសិទ្ធធ្វើនយោបាយរបស់លោកស៊ុនចន្ធីឬក៏ដូចលោកកឹមសុខាដែរនោះទេព្រោះមិនមានឯកសាផ្ទៀង។
