អាមេរិក កូរ៉េខាងត្បូងមិនគាំទ្រការបាញ់បង្ហោះផ្កាយរណបរបស់កូរ៉េខាងជើង!
21-September-2026 / ព័ត៌មានអន្តរជាតិ
កូរ៉េខាងជើង៖ក្រោយការបាញ់បង្ហោះផ្កាយរណបស៊ើបការណ៍កន្លងមក កូរ៉េខាងជើងទទួលបានរូបភាពនៃទីតាំងយោធារបស់អាមេរិកក៏ដូចជាសម្ព័ន្ធមិត្តនៅក្នុងតំបន់ ក៏ដូជជា ទទួលបានរូបភាពសេតវិមាន មន្ទីរបញ្ចកោណ …។ប្រព័ន្ធផ្សព្វផ្សាយរដ្ឋកូរ៉េខាងជើង បានរាយការណ៍នៅថ្ងៃអង្គារនេះថា មេដឹកនាំលោក Kim Jong Un បានទទួលនូវរូបភាពនៃសេតវិមាន មន្ទីរបញ្ចកោណនិងនាវាផ្ទុកយន្តហោះអាមេរិកនៅមូលដ្ឋានទ័ពជើងទឹក Norfolk ដែលថតដោយផ្កាយរណបស៉ើបការណ៍របស់ខ្លួន។
KCNA បានសរសេរថា នេះជារូបភាពថ្មីចុងក្រោយបង្អស់នៃអ្វីដែលកូរ៉េខាងជើងហៅថាជា «តំបន់គោលដៅសំខាន់» ដែលបញ្ជូនមកដោយផ្កាយរណប ក្នុងនោះរួមមានទាំងរដ្ឋធានីសេអ៊ូលរបស់កូរ៉េខាងត្បូង និងមូលដ្ឋានយោធាសហរដ្ឋអាមេរិក។ KCNA បានបន្ថែមថា លោក Kim ក៏បានពិនិត្យមើលរូបភាពនៃមូលដ្ឋានទ័ពអាកាស Andersen ក្នុងតំបន់ប៉ាស៊ីហ្វិកខាងលិចរបស់សហរដ្ឋអាមេរិក ស្ថិតនៅកោះ Guam ផងដែរ ក៏ដូចជាកន្លែងផលិតនាវា និងមូលដ្ឋានទ័ពអាកាសរបស់សហរដ្ឋអាមេរិកនៅ Norfolk និង Newport ជាកន្លែងដែលមាននាវាផ្ទុកយន្តហោះដើរដោយថាមពលនុយក្លេអ៊ែរសរុបចំនួន៤ និងនាវាផ្ទុកយន្តហោះអង់គ្លេសមួយគ្រឿងត្រូវបានគេប្រទះឃើញនៅទីនោះ។តែមន្ត្រីក្រុងសេអ៊ូលបាននិយាយថា សមត្ថភាពផ្កាយរណបស៉ើបការណ៍នេះ មិនអាចអាចផ្ទៀងផ្ទាត់បានទេ ដោយសារតែកូរ៉េខាងជើងមិនបានបញ្ចេញនូវរូបភាពដែលខ្លួនអះអាងថាទទួលបាននោះ.។
នៅថ្ងៃចន្ទ ទី២៧ ខែវិច្ឆិកាបានប្ដេជ្ញាជាថ្មីថានឹងបន្តអនុវត្តសិទ្ធិអធិបតេយ្យរបស់ខ្លួន ក្នុងនោះរួមមានទាំងការបាញ់ បង្ហោះផ្កាយរណបបន្ថែមទៀត។ ប្រព័ន្ធផ្សព្វផ្សាយរដ្ឋ KCNA តាមរយៈការដកស្រង់សម្ដីពីក្រសួងការបរទេសកូរ៉េខាងជើង បានបញ្ជាក់ទៀតថាការបាញ់បង្ហោះផ្កាយរណបស៊ើប ការណ៍ដំបូងបំផុតកាលពីសប្ដាហ៍មុន ត្រូវបានជំរុញដោយភាពចាំបាច់ ដើម្បីតាមដានសកម្មភាពយោធារបស់សហរដ្ឋអាមេរិក និងសម្ព័ន្ធមិត្ត របស់ទីក្រុងវ៉ាស៊ីនតោន។ KCNA បានគូសបញ្ជាក់ដូច្នេះថា «វាជាសិទ្ធិស្របច្បាប់ និងគ្រាន់តែជាមធ្យោបាយក្នុងការអនុវត្តសិទ្ធិអធិបតេយ្យរបស់ ខ្លួនតែប៉ុណ្ណោះ ព្រមទាំងជាការឆ្លើយតប ក៏ដូចជាតាមដានសកម្មភាពយោធារបស់សហរដ្ឋអាមេរិក និងអ្នកហែរហមរបស់ពួកគេ»។
គួរបញ្ជាក់ថា ទីភ្នាក់ងារសារព័ត៌មានកូរ៉េខាងត្បូង Yonhap នៅថ្ងៃចន្ទនេះក៏បានរាយការណ៍ដែរថា កូរ៉េខាងជើង បានដាក់ពង្រាយទាហាន និងអាវុធធុនធ្ងន់ឡើងវិញនៅតាមប៉ុស្តិ៍យាមស្ថិតនៅក្បែរព្រំដែនជាមួយកូរ៉េខាងត្បូង បន្ទាប់ពីបានប្រកាសរៀងៗខ្លួនពីការព្យួរកិច្ចព្រមព្រៀង យោធាអន្តរកូរ៉េ។នៅក្រោមកិច្ចព្រមព្រៀងយោធាអន្តរកូរ៉េឆ្នាំ២០១៨ កូរ៉េទាំង២ បានបំផ្លាញប៉ុស្តិ៍យាមចំនួន១០ ក្នុងចំណោមប៉ុស្តិ៍យាមទាំង ១១ទីតាំង នៅឯតំបន់ព្រំដែនគ្មានយោធា ដើម្បីបន្ធូរបន្ថយភាពតានតឹង និងបង្ការកុំឱ្យជម្លោះប្រដាប់អាវុធផ្ទុះឡើងជាយថាហេតុណាមួយ។ស្ថិតនៅឯក្រុមប្រឹក្សាសន្តិសុខ ឯកអគ្គរដ្ឋទូតអង្គការសហប្រជាជាតិមកពីសហរដ្ឋអាម៉េរិក និងកូរ៉េខាងជើង បានធ្វើការជជែកពិភាក្សាគ្នា ជុំវិញការបាញ់បង្ហោះផ្កាយរណបចារកម្មលើកដំបូងរបស់ទីក្រុងព្យងយ៉ាង។ និងហេតុផលដែលបង្កឱ្យមានកំណើនភាពតានតឹង ហើយនេះគឺជាកិច្ចពិភាក្សា និងជាការផ្លាស់ប្តូរមតិគ្នាជាសាអង្គការសហប្រជាជាតិវិញធារណៈដ៏កម្រ និងដោយផ្ទាល់រវាងប្រទេសដែលជាគូសត្រូវនឹងគ្នា។
បន្ទាប់ពីអវត្តមានជិតប្រាំមួយឆ្នាំរួចមក ប្រទេសកូរ៉េខាងជើងបានចាប់ផ្តើមបញ្ជូនបេសកជនរបស់ខ្លួន ទៅកាន់អង្គការសហប្រជាជាតិម្តងទៀត ដើម្បីចូលរួមនៅក្នុងកិច្ចប្រជុំក្រុមប្រឹក្សាសន្តិសុខស្តីពីកម្មវិធីនុយក្លេអ៊ែរ និងមីស៊ីលផ្លោងរបស់ខ្លួនក្នុងអំឡុងខែកក្កដា។ ស្ថាប័នដែលមានសមាជិក ១៥ ប្រទេស បានមកជួបប្រជុំគ្នា កាលពីថ្ងៃចន្ទ ពាក់ព័ន្ធនឹងកិច្ចពិភាក្សាគ្នាអំពីសកម្មភាពបាញ់បង្ហោះផ្កាយរណបចារកម្មរបស់កូរ៉េខាងជើង កាលពីថ្ងៃទី ២១ ខែវិច្ឆិកា។
នៅចុងបញ្ចប់នៃកិច្ចប្រជុំនេះ ឯកអគ្គរដ្ឋទូតសហរដ្ឋអាម៉េរិក លោកស្រី លីនដា ថូម៉ាស-ហ្គ្រីនហ្វីល (Linda Thomas-Greenfield) និងឯកអគ្គរដ្ឋទូតកូរ៉េខាងជើង លោក គីម សុង (Kim Song) បានធ្វើកំណត់សម្គាល់ដោយមិនបានគ្រោងទុក ដោយអ្នកទាំងពីរបានចូលរួមនៅក្នុងការជជែកដេញដោលគ្នា អំពីសិទ្ធិនៃការឆ្លើយតប ហើយម្នាក់ៗបានប្រកែកគ្នាថា ប្រទេសរបស់ពួកគេ សុទ្ធតែកំពុងធ្វើសកម្មភាពការពាររៀងៗខ្លួន ។
សូមជម្រាបថា សាធារណរដ្ឋប្រជាមានិតប្រជាធិបតេយ្យកូរ៉េ ឬ (កូរ៉េខាងជើង) បានបន្តស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិ ពាក់ព័ន្ធនឹងកម្មវិធីមីស៊ីលផ្លោង និងនុយក្លេអ៊ែររបស់ខ្លួនចាប់តាំងពីឆ្នាំ ២០០៦ ដោយនៅក្នុងទណ្ឌកម្មនេះ រួមបញ្ចូលទាំងការហាមប្រាមចំពោះការអភិវឌ្ឍន៍មីស៊ីលផ្លោងផងដែរ។ ទន្ទឹមនឹងនេះ ប្រទេសចិន និងរុស្ស៊ី បាននិយាយថា សមយុទ្ធយោធារួមគ្នា ដោយសហរដ្ឋអាម៉េរិក និងកូរ៉េខាងត្បូង បានធ្វើឱ្យរដ្ឋធានីព្យុងយ៉ាងមានការព្រួយបារម្ភ ខណៈទីក្រុងវ៉ាស៊ីនតោន បានចោទប្រកាន់ទីក្រុងប៉េកាំង និងទីក្រុងមូស្គូ ចំពោះការការពារប្រទេសកូរ៉េខាងជើង ដោយការពារខ្លួនចេញពីការដាក់ទណ្ឌកម្មបន្ថែមទៀត៕
