សាច់បង្កកខុសច្បាប់ ៥២៨គីឡូក្រាម ចំណេញមួយក្តាប់ ឬគ្រោះថ្នាក់មួយប្រទេស?

បន្ទាយមានជ័យ៖ កាលពីយប់ថ្ងៃទី២៤ ខែមេសា ឆ្នាំ២០២៦ កម្លាំងនគរបាលប្រឆាំងបទល្មើសសេដ្ឋកិច្ច ខេត្តបន្ទាយមានជ័យ បានសហការជាមួយមន្ត្រីបសុព្យាបាល ប្រតិបត្តិការដេញស្ទាក់ឃាត់រថយន្តសង្ស័យមួយគ្រឿងម៉ាក Toyota Camry នៅលើផ្លូវជាតិលេខ៥៩ ក្នុងភូមិថ្មី ឃុំអូរស្រឡៅ។ 

ក្រោយពីការត្រួតពិនិត្យបានបង្ហាញថា ក្នុងរថយន្តមានស្លាបមាន់បង្កកចំនួន ៥២៨ គីឡូក្រាម ដែលត្រូវបានលួចលាក់នាំចូលពីប្រទេសថៃ តាមច្រករបៀងខុសច្បាប់ និងដឹកជញ្ជូនដោយមិនគោរពតាមលក្ខណៈបច្ចេកទេសសុវត្ថិភាពអាហារ។ តែ អ្នកបើកបរបានរត់គេចខ្លួន បង្ហាញពីលក្ខណៈសង្ស័យ និងការប្រុងប្រយ័ត្នជាមុនក្នុងការជៀសវាងច្បាប់។

នៅព្រឹកថ្ងៃទី២៥ ខែមេសា ឆ្នាំ២០២៦ សមត្ថកិច្ចចម្រុះក្រោមការសម្របសម្រួលពីតំណាងអយ្យការ បានសម្រេចយកសាច់បង្កកទាំងអស់ទៅដុតកម្ទេចចោល ដើម្បីបញ្ឈប់ហានិភ័យសុខភាពសាធារណៈ មុនពេលវាអាចចូលទៅដល់តុបរិភោគរបស់ប្រជាពលរដ្ឋ។

ករណីនេះមិនមែនជាលើកដំបូងឡើយ។ តំបន់ព្រំដែនស្រុកម៉ាឡៃ តែងត្រូវបានរាយការណ៍ថាជាចំណុចក្តៅនៃបទល្មើសឆ្លងដែន ពាក់ព័ន្ធទាំងការនាំចូលទំនិញខុសច្បាប់ និងចលនាពលករខុសប្រក្រតី។ នេះបង្ហាញថា បញ្ហាមិនស្ថិតនៅត្រឹមការបង្ក្រាបជារើយៗនោះ ប៉ុន្តែស្ថិតនៅលើប្រព័ន្ធគ្រប់គ្រង និងការអនុវត្តច្បាប់ដែលត្រូវការ ការកែលម្អជាបន្តបន្ទាប់។

សាធារណជនបានលើកឡើងថា ការបង្ក្រាបគឺជាជំហានវិជ្ជមាន ប៉ុន្តែមិនគ្រប់គ្រាន់ទេ ប្រសិនបើមិនមានវិធានការបង្ការដែលមានប្រសិទ្ធភាព។ អាជ្ញាធរគួរតែពង្រឹងការត្រួតពិនិត្យតាមច្រកព្រំដែន បង្កើនការតាមដានបណ្តាញជួញដូរ និងអនុវត្តច្បាប់ឲ្យបានតឹងរឹងលើអ្នកពាក់ព័ន្ធទាំងអស់ មិនថាជាអ្នកដឹកជញ្ជូន ឬអ្នកនៅពីក្រោយខ្សែសង្វាក់នោះទេ។